ព័ត៌មានជាតិ

អេស៊ីលីដា បង្កើតគម្រោងសហហិរញ្ញប្បទានចូលរួមស្តារ និងជំរុញកំណើន ក្នុងវិស័យទេសចរណ៍

បានផុស

២ ខែ មុន

នៅ

ថ្ងៃចន្ទ ១៨ កក្កដា ២០២២

ដោយ

ធនាគារ អេស៊ីលីដា បានបង្កើតគម្រោងសហហិរញ្ញប្បទាន ដែលមានអត្រាការប្រាក់ទាប ដើម្បីចូលរួមស្តារ និងជំរុញកំណើនក្នុងវិស័យទេសចរណ៍នៅកម្ពុជា ឱ្យកាន់តែប្រសើរឡើងក្រោយពីវិស័យនេះ បានទទួលរងផលប៉ះពាល់យ៉ាងធ្ងន់ធ្ងរពីវិបត្តិជំងឺកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងនេះ ត្រូវបានធនាគារ អេស៊ីលីដា កាលពីថ្ងៃទី ១៦ ខែមិថុនា ឆ្នាំ ២០២២ បានចុះហត្ថលេខា លើកិច្ចព្រមព្រៀង ស្តីពីការអនុវត្តគម្រោងសហហិរញ្ញប្បទានស្តារ និងជំរុញកំណើនក្នុងវិស័យ ទេសចរណ៍ ដោយមានការចូលរួមមូលនិធិ ៥០% ពីធនាគារសហគ្រាសធុនតូច និងមធ្យមកម្ពុជា និង ៥០% ទៀត ចូលរួមពីគ្រឹះស្ថានធនាគារ និងហិរញ្ញវត្ថុ។

បើតាមលោក សឹង ភន នាយកប្រតិបត្តិឥណទានរបស់ធនាគារអេស៊ីលីដា បានមានប្រសាសន៍ថា គម្រោង សហហិរញ្ញប្បទាន គឺពិតជាមានសារៈសំខាន់ក្នុងការចូលរួមចំណែកស្តារការងើបឡើងវិញនៃម្ចាស់អាជីវកម្ម និងសហគ្រិននានាក្នុងវិស័យទេសចរណ៍ ជាមួយនិងការទទួលបានប្រាក់កម្ចីដែលមានអត្រាការប្រាក់ទាប។

លោកបានបន្តថា«គម្រោងនេះ គឺជាគម្រោងដ៏ល្អមួយ ដែលផ្តល់ឱកាសដល់សហគ្រិន ដែលមានអាជីវកម្មក្នុងវិស័យទេសចរណ៍ដោយពួកគាត់អាចទទួលបានប្រាក់កម្ចី ដែលមានអត្រាការប្រាក់ដ៏ល្អគឺអតិបរមាត្រឹម ៦,៥ ភាគរយតែប៉ុណ្ណោះក្នុង ១ ឆ្នាំ។ ស្របជាមួយគ្នានោះ គឺមិនមានការគិតសោហ៊ុយផ្សេងៗផងដែរ ដូច្នេះសូមអតិថិជនដែលមានអាជីវកម្មក្នុងវិស័យនេះ ប្រញាប់រួសរាន់ដាក់ពាក្យស្នើសុំកម្ចីមកធនាគារអេស៊ីលីដា ព្រោះថាទឹកប្រាក់កម្ចីក្នុងគម្រោងនេះ មានចំនួនកំណត់»។

សម្រាប់គម្រោងនេះ មានគោលដៅផ្តល់ហិរញ្ញប្បទានដល់ម្ចាស់អាជីវកម្ម ក្នុងវិស័យទេសចរណ៍ រួមមានដូចជា៖ សណ្ឋាគារ, ផ្ទះសំណាក់, ភោជនីយដ្ឋាន, ការផ្គត់ផ្គង់អាហារ និងភេសជ្ជៈ និង ការផ្គត់ផ្គង់ ផលិតផល-សេវាកម្មដទៃទៀត ដែលគាំទ្រឧស្សាហកម្មទេសចរណ៍ ដែលមានតម្រូវការ ឥណទានសម្រាប់ធ្វើ ប្រតិបត្តិការអាជីវកម្មឡើងវិញ កែលម្អ និងទំនើបកម្មពង្រីកខ្លួនបន្ថែម។

ចំពោះទំហំឥណទានផ្តល់ជូនរហូតដល់ ៤០០.០០០ ដុល្លារអាមេរិក ឬសមមូលជាប្រាក់រៀល។ រីឯអត្រាការប្រាក់អតិបរមា ៦.៥០% ក្នុងមួយឆ្នាំដែលរយៈពេលខ្ចីមានរហូតដល់ ៧ ឆ្នាំហើយមិនមានសោហ៊ុយផ្សេងព្រមទាំងមានរយៈពេលអនុគ្រោះរហូតដល់ ១២ ខែ (សងតែការប្រាក់)។

សម្រាប់តម្រូវការប្រើប្រាស់សេវាធនាគារ អេស៊ីលីដា ឬព័ត៌មានផ្សេងៗ សូមទាក់ទងទូរស័ព្ទលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ (បម្រើ ២៤ ម៉ោង)៕

Related Topics:ធនាគារ អេស៊ីលីដា