រដ្ឋមន្ត្រីការបរទេសអាមេរិក ប្រកាសគម្រោងថ្មីមួយនៅកម្ពុជា ដែលមានទឹកប្រាក់ ២៥ លានដុល្លារ

លោក Antony Blinken រដ្ឋមន្ត្រីការបរទេសអាមេរិក បានប្រកាសនូវគម្រោងថ្មីមួយដែលមានទឹកប្រាក់ ២៥ លានដុល្លារ ក្នុងការលើកកម្ពស់សន្តិសុខស្បៀងអាហារ និងការអភិវឌ្ឍសេដ្ឋកិច្ច លើវិស័យកសិកម្មក្នុង​ប្រទេសកម្ពុជា។

ស្ថានទូតអាមេរិកប្រចាំកម្ពុជា បានឲ្យដឹងថា គម្រោងកម្ពុជាហាវែស III គឺជាគម្រោងមានរយៈពេល ៥ ឆ្នាំ ដែលគ្រប់គ្រងដោយទីភ្នាក់ងារជំនួយអាមេរិក USAID កម្ពុជា។ ខណៈដែលពិភពលោក ប្រឈមនឹងការគំរាមកំហែងកាន់តែកើនឡើង លើការផ្គត់ផ្គង់ស្បៀងអាហារ ដូច្នេះ​ត្រូវការបង្កើននូវសមត្ថភាពកសិកម្ម និងភាពធន់ជុំវិញពិភពលោក ហើយគម្រោង ហាវែស III គឺជានិមិត្តសញ្ញានៃការប្តេជ្ញាចិត្តរបស់អាមេរិកចំពោះគោលដៅមួយនេះ។

សូមជម្រាបថា លោក Antony Blinken រដ្ឋមន្ត្រីការបរទេសអាមេរិក បានធ្វើដំណើរមកដល់ប្រទេសកម្ពុជា កាល ពីយប់ថ្ងៃទី ៣ ខែសីហា ឆ្នាំ ២០២២ ដើម្បីចូលរួមកិច្ចប្រជុំថ្នាក់រដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ។

តាមស្ថានទូតអាមេរិកប្រចាំកម្ពុជា គឺលោក Antony Blinken នឹងជួបទ្វេភាគីជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា, និងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា។ ទស្សនកិច្ចរបស់លោក បញ្ជាក់ពីការប្តេជ្ញាចិត្តរបស់សហរដ្ឋអាមេរិក ចំពោះមជ្ឈភាពអាស៊ាន និងកិច្ចប្រឹងប្រែងរបស់អាមេរិក ក្នុងការពង្រឹងនូវទំនាក់ទំនងទ្វេភាគីជាមួយ​ប្រទេសកម្ពុជា ផងដែរ៕