ព័ត៌មានជាតិ

ផ្លូវជាតិពីរខ្សែក្រវាត់ព្រំដែនខ្មែរថៃ ស្រោចកៅស៊ូរលោងស្រិល ភ្ជាប់ពីខេត្តប៉ៃលិនដល់ខេត្តឧត្តរមានជ័យ

បានផុស

៤ years មុន

នៅ

ថ្ងៃចន្ទ ៨ សីហា ២០២២

ដោយ

ផ្លូវជាតិពីរខ្សែបានស្ថាបនារួចរាល់ទាំងស្រុង ដែលជាផ្លូវយុទ្ធសាស្រ្តសាងសង់សសៀរតាមក្រវាត់ព្រំដែនខ្មែរថៃពីខេត្តប៉ៃលិនរហូតដល់ក្រុងសំរោងខេត្តឧត្តរមានជ័យ។ ផ្លូវជាតិទាំងពីរខ្សែនេះ ក្រៅជាផ្លូវយុទ្ធសាស្រ្តរបងការពារជាតិ ក៏ជាបណ្តាញផ្លូវសេដ្ឋកិច្ចសម្រាប់ការដឹកជញ្ជូនទំនិញ និងការធ្វើចរាចរណ៍របស់ប្រជាពលរដ្ឋនៅតាមតំបន់ព្រំដែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវជាតិលេខ ៥៩ បានស្ថាបនានិងដាក់ឲ្យប្រើប្រាស់ក្នុងអំឡុងឆ្នាំ ២០១៥។ ផ្លូវនេះសាងសង់ឆ្លងកាត់ខេត្តចំនួន ៣ គឺខេត្តបន្ទាយមានជ័យ បាត់ដំបង និងប៉ៃលិន ដោយបំបែកចេញពីផ្លូវជាតិលេខ ៥ កាត់តាមស្រុកម៉ាឡៃ សំពៅលូន ភ្នំព្រឹកកំរៀង បន្តរហូតទៅដល់ខេត្តប៉ៃលិនមានប្រវែងជាង ១០០ គីឡូម៉ែត្រ។

ដោយឡែកផ្លូវជាតិលេខ ៥៨ ក៏ជាផ្លូវយុទ្ធសាស្រ្តមួយទៀត ទើបសម្ពោធដាក់ឲ្យប្រើប្រាស់នៅដើមឆ្នាំ២០២០។ មានប្រវែងសរុបជាង ១៧៤ គីឡូម៉ែត្រការសាងសង់ចាប់ពីផ្លូវជាតិលេខ ៥ ពីក្រុងប៉ោយប៉ែតខេត្តបន្ទាយមានជ័យ ទៅដល់ក្រុងសំរោង ខេត្តឧត្តរមានជ័យ។ កំណាត់ផ្លូវនេះក៏មានការសាងសង់ផ្លូវខ្នែងប្រវែង ៨ គីឡូម៉ែត្រ ឡើងទៅច្រកព្រំដែនខ្មែរថៃចំនួន ៤ មាន ច្រកអូរបីជាន់ ច្រកបឹងត្រកួន ច្រកជប់គគីរ និងច្រកថ្មដូន។

គម្រោងស្ថាបនាផ្លូវជាតិលេខ ៥៨ ប្រើប្រាស់ប្រាក់កម្ចីសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សរុបប្រមាណជាង ១២២ លានដុល្លារសហរដ្ឋអាមេរិក៕