ព័ត៌មានជាតិ

ពលរដ្ឋរងគ្រោះដោយអគ្គិភ័យ ៣ គ្រួសារ ទទួលអំណោយពីកាកបាទក្រហមកម្ពុជា ខេត្តកណ្ដាល

បានផុស

៣ years មុន

នៅ

ថ្ងៃសុក្រ ១២ សីហា ២០២២

ដោយ

នាថ្ងៃទី ១១ ខែសីហា ឆ្នាំ២០២២ លោក ទៀង សុគន្ធ នាយកសាខា តំណាងអភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានដឹកនាំប្រតិភូចុះសួរសុខទុក្ខ និងនាំយកជំនួយសង្គ្រោះទៅឧបត្ថម្ភជូនប្រជាពលរដ្ឋ ៣ គ្រួសារ ដែលបានរងគ្រោះដោយអគ្គិភ័យឆេះផ្ទះសម្បែងអស់ទាំងស្រុង ៣ ខ្នង កាលពីយប់ថ្ងៃទី ១០ ខែសីហា ឆ្នាំ ២០២២ នៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយសង្គ្រោះដែលបានផ្តល់ជូនក្នុង ១ គ្រួសារមាន៖ អង្ករ ៥០ គីឡូក្រាម ,មីខ្លាឃុំ ១ កេស ,ទឹកសុទ្ធដបធំ ១ កេស ,ត្រីខកំប៉ុង ២ យួរ ,ទឹកត្រី ១យួរ ,ទឹកស៊ីអ៊ីវ ១យួរ ,ឃីត ១ កញ្ចប់ ,កៅស៊ូតង់ ១ ផ្ទាំង ,ជែលលាងដៃ ១ ដប ,ម៉ាស ១ ប្រអប់ និងថវិកា ៤០ ម៉ឺនរៀល។ ជាមួយគ្នានេះអនុសាខាកាកបាទក្រហមកម្ពុជាក្រុងតាខ្មៅ ក៏បានឧបត្ថម្ភថវិកាបន្ថែមជូនក្នុង ១ គ្រួសារ ២០ ម៉ឺនរៀលផងដែរ ។ លោក ទៀង សុគន្ធ ក្នុងនាមលោក គង់ សោភ័ណ្ឌ ប្រធានគណៈកម្មាធិការសាខា បាននាំមកនូវការផ្តាំផ្ញើសាកសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនបងប្អូន ប្រជាពលរដ្ឋរងគ្រោះដោយក្តីនឹករឭក អាណិតអាសូរ និងសូមចូលរួមរំលែកនូវការសោកស្តាយជាមួយបងប្អូន ដែលបានទទួលរងគ្រោះខូចខាតនូវទ្រព្យសម្បត្តិ និងផ្ទះសម្បែងដោយសារគ្រោះអគ្គិភ័យនេះ។

លោកនាយកសាខា បានសំណូមពរសុំឲ្យបងប្អូនប្រជាពលរដ្ឋទាំងអស់ត្រូវថែរក្សាសុខភាពឲ្យបានល្អ និងបន្តចូលរួមអនុវត្តតាមប្រសាសន៍ណែនាំដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាគឺ៖ ៣ កុំ និងការពារឲ្យបានខ្ជាប់ខ្ជួន ដើម្បីចូលរួមទប់ស្កាត់ការឆ្លងរាលដាលជាសកលនៃជំងឺកូវីដ-១៩ នៅក្នុងសហគមន៍ផងដែរ ៕