ព័ត៌មានជាតិ

ក្រសួងអប់រំ នឹងបង្កើតកម្មវិធីសិក្សាថ្មីស្តីពីវិស្វកម្មបរិស្ថាននៅក្នុងសាកលវិទ្យាល័យភូមិន្ទភ្នំពេញ

បានផុស

៤ years មុន

នៅ

ថ្ងៃសៅរ៍ ២០ សីហា ២០២២

ដោយ

ក្រសួងអប់រំ យុវជន និងកីឡា នឹងបង្កើតកម្មវិធីសិក្សាថ្មីស្តីពី “វិស្វកម្មបរិស្ថាន”នៅក្នុងសាកលវិទ្យាល័យភូមិន្ទភ្នំពេញ ដើម្បីជួយលើកកម្ពស់សមត្ថភាព និងចំណេះជំនាញដល់និស្សិតកម្ពុជា។ មហាវិទ្យាល័យវិស្វកម្ម នៃសាកលវិទ្យាល័យភូមិន្ទភ្នំពេញ បានទទួល និងត្រៀមអនុវត្តគម្រោងអភិវឌ្ឍថ្មីមួយ ដោយមានការគាំទ្រពីទីភ្នាក់ងារ KOICA នៃសាធារណរដ្ឋកូរ៉េ ដោយមានកិច្ចសហការជាមួយវិទ្យាស្ថានវិទ្យាសាស្ត្រនិងបច្ចេកវិទ្យាក្វាងជូ ដើម្បីបង្កើតកម្មវិធីសិក្សាស្តីពី “វិស្វកម្មបរិស្ថាន”នេះ។

លោកបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមប្រឹក្សាភិបាលនៃសាកលវិទ្យាល័យភូមិន្ទភ្នំពេញ បានដឹកនាំប្រតិភូនៃគណៈគ្រប់គ្រងសាកលវិទ្យាល័យភូមិន្ទភ្នំពេញ និងមហាវិទ្យាល័យវិស្វកម្ម និងមហាវិទ្យាល័យសិក្សាអភិវឌ្ឍ ដើម្បីជួបពិភាក្សាជាមួយសមភាគីកូរ៉េ នៅអំឡុងថ្ងៃទី១៧ដល់ទី២២ ខែសីហា ឆ្នាំ២០២២។ ក្នុងអំឡុងពេលនៃដំណើរទស្សនកិច្ចនេះ ប្រតិភូក្រសួង និងសាកលវិទ្យាល័យ បានជួបសម្តែងការគួរសមជាមួយសមភាគីកូរ៉េ ក៏ដូចជាបានពិនិត្យមន្ទីរពិសោធន៍ ប្រព័ន្ធគ្រប់គ្រងការសិក្សា បណ្ណាល័យ និងបានជួបជាមួយនិស្សិតកម្ពុជាដែលកំពុងមានវត្តមាននៅក្រុងក្វាងជូ។

គួរបញ្ជាក់ដែរថា តាមរយៈគម្រោងអភិវឌ្ឍថ្មីមួយនេះ សាកលវិទ្យាល័យភូមិន្ទភ្នំពេញ នឹងមានកម្មវិធីសិក្សាថ្នាក់បរិញ្ញាបត្រ និងអនុបណ្ឌិតជំនាញវិស្វកម្មបរិស្ថាន មន្ទីរពិសោធន៍វិទ្យាសាស្រ្ត ការកសាងសមត្ថភាពសាស្ត្រាចារ្យ ការស្រាវជ្រាវរួមគ្នា ក៏ដូចជាឱកាសសម្រាប់ការផ្លាស់ប្តូរនិស្សិត៕

ដោយ៖ សំអឿន