ក្រសួងដែនដីសម្រេចការចុះបញ្ជីបានចំនួនជិត ១៧ម៉ឺនក្បាលដី នៅឆមាសទី១ឆ្នាំនេះ

គិតត្រឹមឆមាសទី ១ឆ្នាំ ២០២២នេះ ក្រសួងរៀបចំដែនដីនគរូបនីយកម្ម និងសំណង់ បានចុះបញ្ជីបំបែកក្បាលដីបាន​ចំនួន ១៦៩ ២៦៧ ក្បាលដី ស្មើនឹង ២,៤២ភាគរយ ក្នុងនោះ ចុះបញ្ជីដីមានលក្ខណៈជាប្រព័ន្ធបានចំនួន ១៦៧ ៨២១ ក្បាលដី និងចុះបញ្ជីដាច់ដោយដុំបានចំនួន​១៤៤៦ក្បាលដី។ នេះបើតាមការបញ្ជាក់របស់លោក លោក ថេង ច័ន្ទសង្វារ រដ្ឋលេខាធិការ និងជានាយកខុទ្ទកាល័យ ក្រសួងរៀបចំដែនដី ព្រឹកថ្ងៃទី ២៤ ខែ សីហា។

ថ្លែងនៅក្នុងសន្និសីទសារព័ត៌មាន ស្តីពី «សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងរៀបចំដែនដី នគរូបនីយកម្ម និងសំណង់» លោក ថេង ច័ន្ធសង្វារ បានបញ្ជាក់ថា គិតចាប់ពីផ្តើមអនុវត្តដល់ឆមាសទី១ឆ្នាំ ២០២២ ការចុះបញ្ជី និងចេញបណ្ណកម្មសិទ្ធិជូនប្រជាពលរដ្ឋសម្រេចបាន ៦៥៨ ៤៥៧ ៨បណ្ណ ស្មើនឹង ៩៤,០៦ភាគរយ នៃក្បាលដី ប៉ាន់ស្មានសរុប ៧លានក្បាលដី៕