កូរ៉េ សន្យាជួយស្តារនីតិសម្បទាដល់កម្មករនិយោជិត​ដែលទទួលរងគ្រោះថ្នាក់ការងារនៅកន្លែងធ្វើការ

សាធារណរដ្ឋកូរ៉េ បានសន្យាថានឹងជួយទាំងថវិកា ការបណ្តុះបណ្តាលជំនាញ និងចែករំលែកបទពិសោធន៍ការងារល្អៗមួយចំនួនដល់កម្ពុជា ដើម្បីស្តារនីតិសម្បទាដល់បងប្អូនកម្មករនិយោជិត ដែលទទួលរងនូវគ្រោះថ្នាក់ការងារនៅកន្លែងធ្វើការ។

ការសន្យានេះ បានធ្វើឡើងក្នុងជំនួបពិភាក្សាការងាររវាងលោក JAEKAP LEE អតីតរដ្ឋមន្រ្តីក្រសួងការងារ និងមុខរបរ​នៃសាធារណរដ្ឋកូរ៉េ និងបច្ចុប្បន្នជាអ្នកគ្រប់គ្រងគម្រោងជំនួយអភិវឌ្ឍន៍ផ្លូវការផ្នែកស្តារនីតិសម្បទានៅកម្ពុ
ជា ដឹកនាំគណៈប្រតិភូមកបំពេញទស្សនកិច្ចនៅកម្ពុជា ហើយបានចូលជួបសម្តែងការគួរសម ជាមួយលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២៥ ខែសីហា ឆ្នាំ២០២២ នៅទីស្តីការក្រសួងការងារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបនោះ លោកបណ្ឌិត អ៊ិត សំហេង បានគាំទ្រចំពោះលោក JAEKAP LEE ដែលបានជួយឧបត្ថម្ភគាំទ្រលើផ្នែកស្តារនីតិសម្បទាដល់កម្មករនិយោជិតរបស់កម្ពុជា ដែលជួបគ្រោះថ្នាក់ការងារនៅកន្លែងធ្វើការ។ លោករដ្ឋមន្ត្រីសង្ឃឹម​ថា តាមរយៈបទពិសោធន៍ការងារជាអតីតរដ្ឋមន្ត្រីក្រសួងការងារ និងមុខរបរនៃសាធារណរដ្ឋកូរ៉េ នឹងបានចែករំ​លែក​បទពិសោធន៍ការងារជួយមកដល់កម្ពុជា ឲ្យវិស័យមួយនេះទទួលបាននូវលទ្ធផលល្អ។

លោកJAEKAP LEE បានមានប្រសាសន៍ថា លោកមានបទពិសោធន៍លើកិច្ចការងារស្តារនីតិសម្បទារបស់កម្មករនិយោជិតដែលទទួលរងនូវគ្រោះថ្នាក់ការងារនេះ ដោយរូបលោកធ្លាប់បានចូលរួមចងក្រងជាគោលនយោបាយសម្រាប់គាំពារកម្មករនិយោជិតកូរ៉េដែលទទួលរងគ្រោះថ្នាក់នៅកន្លែងការងារ និងស្តារនីតិសម្បទាជូនពួកគាត់អាចវិលត្រឡប់ទៅធ្វើការដូចដើមវិញបាន។ ក្រុមការងាររបស់ឯកឧត្តម នឹងជួយក្រុមការងារកម្ពុជា លើផ្នែកនេះដើម្បីយកទៅអនុវត្តកាន់តែមានប្រសិទ្ធភាព និងជោគជ័យ។

ពាក់ព័ន្ធនឹងកិច្ចសហការ និងផ្តល់ការគាំទ្រដល់កម្ពុជាពីរដ្ឋាភិបាលសាធារណរដ្ឋកូរ៉េ លោកបណ្ឌិតរដ្ឋមន្ត្រីបានលើកឡើងថា គឺមានទំនាក់ទំនងល្អប្រសើរណាស់បន្ទាប់ពីមានដំណើរទស្សនកិច្ចជាផ្លូវការរបស់សម្តេចតេជោ ហ៊ុន សែន
នាយករដ្ឋមន្ត្រីកម្ពុជា នៅសាធារណរដ្ឋកូរ៉េ ធ្វើឲ្យប្រទេសទាំងពីរក្លាយជាទំនាក់ទំនងជាយុទ្ធសាស្ត្រគ្រប់ជ្រុងជ្រោយ
រួមទាំងពាណិជ្ជកម្មសេរីរបស់ប្រទេសយើងទាំងពីរផងបានផ្តល់ប្រយោជន៍ពីគ្នាទៅវិញទៅមកប្រកបដោយផ្លែផ្កាដ៏ល្អបំផុត។ លំហូរនៃអ្នកវិនិយោគកូរ៉េចូលមកកាន់កម្ពុជា មានការកើនឡើងជាលំដាប់បានធ្វើការវិនិយោគស្ទើរតែគ្រប់វិស័យទាំងអស់។

ចំពោះទំនាក់ទំនងលើវិស័យការងារវិញ លោករដ្ឋមន្ត្រីគូសបញ្ជាក់ថា ពលករកម្ពុជាដែលកំពុងបម្រើការងារនៅសាធារណ​រដ្ឋកូរ៉េ ប្រមាណជាង៥ម៉ឺននាក់ទទួលបាននូវចំណេះ ជំនាញ ប្រាក់ចំណូល បទពិសោធន៍ការងាររហូតក្លាយជាសហគ្រិនភាពដ៏ចំណាន។ មួយវិញទៀត លើប្រព័ន្ធសុវត្ថិភាព និងសុខភាពការងារ(OSH) កូរ៉េបានផ្តល់ការគាំទ្រទាំងថវិកា និងបច្ចេកទេស​មកដល់កម្ពុជា រួមជាមួយនឹងសេវាការងារដល់NEA ផងដែរ។ កូរ៉េមានបទពិសោធន៍ច្រើន ទំាងគោលនយោបាយ យន្តការ និងសេវាសម្បូរបែបលើការគ្រប់គ្រង និងដោះសា្រយបញ្ហាគ្រោះថ្នាក់ការងារជូនដល់កម្មករនិយោ​ជិត​របស់ខ្លួននឹងចែករំលែកបទពិសោធន៍ទាំងនេះមកខាងប.ស.ស យកទៅអនុវត្តឲ្យទទួលបានជោគជ័យបន្ថែមទៀត។

ជាមួយគ្នានេះដែរ លោករដ្ឋមន្រ្តី ក៏បានលើកឡើងពីការអភិវឌ្ឍរបបសន្តិសុខសង្គមរបស់កម្ពុជា មកដល់ពេលនេះកម្ពុជាបានអនុវត្តរបបសន្តិសុខសង្គមចំនួន ៣ រួមមាន៖ ទី១.ផ្នែកហានិភ័យការងារ អនុវត្តនៅឆ្នាំ២០០៨, ទី២.ផ្នែកថែទាំសុខភាពអនុវត្តនៅឆ្នាំ២០១៦, និងទី៣.ផ្នែកប្រាក់សោធន ទើបប្រកាសដាក់ឱ្យអនុវត្តចាប់ពីថ្ងៃទី១ ខែកក្កដា ឆ្នាំ២០២២នេះ
ហើយបាននិងកំពុងធ្វើយុទ្ធនាការ រយៈពេល ៩០ថ្ងៃ ផ្សព្វផ្សាយការដាក់ឱ្យអនុវត្តរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ ស្តីពីការងារ។

លោក JAEKAP LEE បានថ្លែងអំណរគុណដល់លោកបណ្ឌិត អ៊ិត សំហេង ដែលបានគាំទ្រចំពោះការអនុវត្តគម្រោងរបស់លោកនៅកម្ពុជាហើយសង្ឃឹមថា ការជួយជ្រោមជ្រែងរបស់លោករដ្ឋមន្ត្រី នឹងធ្វើឲ្យដំណើរការអនុវត្តនូវគម្រោងមួយនេះពិតជាទទួលបានជោគជ័យដ៏ធំធេង៕

អត្ថបទ៖ សំអឿន