ព័ត៌មានជាតិ

ខេត្តតាកែវមានសហគ្រាសតូចធំជាង ៥០០ មូលដ្ឋាន រួមទាំងរោងចក្រខ្នាតធំ ៧៨ កន្លែង

បានផុស

៤ years មុន

នៅ

ថ្ងៃពុធ ៣១ សីហា ២០២២

ដោយ

ខេត្តតាកែវ មានការទាក់ទាញការវិនិយោគតាមរយៈការបង្កើតសហគ្រាសតូចធំ រួមទាំងរោងចក្រធំៗជាច្រើនកន្លែង ដែលបានផ្តល់ការងារដល់ពលរដ្ឋរាប់ម៉ឺននាក់។

លោក លី សាវេត អ្នកនាំពាក្យនិងជាអភិបាលរងខេត្តតាកែវបានឲ្យកម្ពុជាថ្មីដឹងថា ខេត្តតាកែវមានរោងចក្រ ៧៨ កន្លែង រួមទាំងសហគ្រាសខ្នាតតូចនិងមធ្យម ៥៤២ មូលដ្ឋាន ដែលបានរួមចំណែកបង្កើតការងារ ចូលរួមលើកស្ទួយជីវភាពគ្រួសារតាមជនបទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ខេត្តតាកែវមានភូមិសាស្ត្រនៅកៀករាជធានីភ្នំពេញ ជាទីតាំងប្រកបដោយសក្តានុពលសម្រាប់ការវិនិយោគស្របជាមួយខេត្តនេះមានកម្លាំងពលកម្មវ័យក្មេងយ៉ាងច្រើនសម្រាប់ប្រើប្រាស់ក្នុងខ្សែសង្វាក់ផលិតកម្មតាមរោងចក្រសហគ្រាសផ្សេងៗ។

ក្រៅពីមានសហគ្រាសតូចធំនិងរោងចក្រជាច្រើនកន្លែង ខេត្តតាកែវក៏មានតំបន់សេដ្ឋកិច្ចមួយកន្លែងដែលវិនិយោគដោយឧកញ៉ា ដួង ឈីវ។ តំបន់សេដ្ឋកិច្ចពិសេស ដួង ឈីវ ភ្នំដិន វិនិយោគនៅលើផ្ទៃដីទំហំ ៧៩ហិកតា ដែលមានទីតាំងនៅឃុំភ្នំដិន ស្រុកគីរីវង់ ខេត្តតាកែវ ជាប់ច្រកទ្វារអន្តរជាតិផ្លូវគោករវាងកម្ពុជា-វៀតណាម (ស្រុកគីរីវង់ ខេត្តតាកែវ និងស្រុកទិនបៀងខេត្តអាងយ៉ាង)។

នៅក្នុងតំបន់សេដ្ឋកិច្ចពិសេស ដួង ឈីវ ភ្នំដិន មានគម្រោងសាងសង់ហេដ្ឋារចនាសម្ព័ន្ធដូចជា សណ្ឋាគារ មជ្ឈមណ្ឌលកំសាន្ដ ធនាគារ ផ្សារទំនើប ផ្សារទេសចរណ៍ ផែស្ងួត ឃ្លាំងស្តុកទំនិញ រោងចក្រសិប្បកម្ម-ឧស្សាហកម្មស្ដងដារអន្ដរជាតិ និងចំណតរថយន្តគ្រប់ប្រភេទជាដើម៕

Related Topics:សហគ្រាសធុនតូច និងមធ្យម