លោក​ ហែម វណ្ណឌី៖ កម្ពុជាមានសក្តានុពលច្រើន តែប្រព័ន្ធអេកូឡូស៊ីមិនទាន់ប្រទាក់ក្រឡាគ្នា

រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានវត្តន៍ លោក ហែម វណ្ណឌី បាន​ថ្លែង​ថា កម្ពុជានៅ​មាន​សក្តានុពល​ច្រើន ប៉ុន្តែ​ប្រព័ន្ធអេកូឡូស៊ី​យើង​មិន​ទាន់​ជា​ខ្សែច្រវាក់​ដែល​ប្រទាក់ក្រឡាគ្នាពេញ​លេញ និងកង់​ច្រវាក់ខ្លះ​ពុំទាន់មាន​ការអភិវឌ្ឍ​ជ្រោមជ្រែង​ឱ្យបានរឹងមាំ​ធ្វើឱ្យយើង​ខកខាន​មិនទាន់​បាន​ប្រែក្លាយ​ឱកាស និង​សក្តានុពល ទៅ​ជា​ផល​ប្រយោជន៍​ជាក់ស្តែង។

ក្នុង​វេទិកាបង្ហាញសក្តានុពលអាជីវកម្ម និងឧស្សាហកម្មគាំទ្រលើកទី១ ដើម្បីពង្រឹងខ្សែច្រវាក់ផលិតកម្មក្នុងស្រុក នៅ​ថ្ងៃ​ទី​២៧ ខែ​វិច្ឆិកា ឆ្នាំ​២០២៥ លោក ហែម វណ្ណឌី បាន​លើក​ឡើង​ថា សហគ្រាសធុនតូច និងមធ្យម​បាន​ដើរ​តួនាទី​យ៉ាង​សំខាន់​ក្នុងការជំរុញ​ពិពិធកម្ម​សេដ្ឋកិច្ច បង្កើត​ការងារ អភិវឌ្ឍជំនាញឯកទេសនិងបច្ចេកទេស សហគ្រិន​ភាព និងការច្នៃប្រឌិត​បច្ចេកវិទ្យា​ថ្មីៗ ដើម្បីធានា​បាន​នូវ​ការ​ទ្រទ្រង់​កំណើន​សេដ្ឋកិច្ច​ប្រកប​ដោយ​ជវភាព។

លោក​រដ្ឋមន្ត្រី បាន​សង្កត់​ធ្ងន់​ថា កម្ពុជានៅមានសក្តានុពលច្រើន ប៉ុន្តែប្រព័ន្ធអេកូឡូស៊ីយើងមិនទាន់ជាខ្សែច្រវាក់​ដែលប្រទាក់ក្រឡាគ្នាពេញ​លេញ និងកង់ច្រវាក់ខ្លះពុំទាន់មានការអភិវឌ្ឍជ្រោមជ្រែងឱ្យបានរឹងមាំ។ កង្វះទិន្នន័យ ព័ត៌មាន និងការយល់ដឹង​អំពីសក្តានុពល​រវាងគ្នា ធ្វើឱ្យយើងខកខានមិនទាន់បានប្រែក្លាយឱកាស និងសក្តានុពល ទៅជាផលប្រយោជន៍ជាក់ស្តែង។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកំណត់ផលិតផលអាទិភាពក្នុងអនុវិស័យចំនួន ៧ ដែលផ្តល់ឱកាសទីផ្សារភ្លាមៗ និងភាពពាក់ព័ន្ធជាយុទ្ធសាស្រ្តសម្រាប់ការពង្រឹងខ្សែច្រវាក់តម្លៃក្នុងស្រុក និងឧស្សាហកម្មប្រតិគមន៍របស់កម្ពុជា ដែលរួមមានអនុវិស័យវាយនភ័ណ្ឌ, អាហារ និងភេសជ្ជៈ, កៅស៊ូ និងផ្លាស្ទិក, កម្មន្តសាលគីមី និងផលិតផលប្រើប្រាស់ប្រចាំថ្ងៃ, កម្មន្តសាលគ្រឿងបង្គំយានយន្ត និងអេឡិចត្រូនិច, ការវេចខ្ចប់ និងផ្លាកសញ្ញា, និងគ្រឿងសង្ហារឹម។

តាមរយៈវេទិកានេះ ក្រសួងមានគោលបំណងកៀរគរការវិនិយោគក្នុងស្រុក នៅក្នុងអនុវិស័យសក្តានុពលទាំង ៧ ពង្រឹងការតភ្ជាប់ខ្សែច្រវាក់ផ្គត់ផ្គង់រវាងសហគ្រាសធុនតូចនិងមធ្យម ជាមួយនឹងរោងចក្រធុនធំ និងឧស្សាហកម្ម លើកកម្ពស់សមត្ថភាព និងគុណភាពផលិតផល តាមរយៈការចាប់យកបច្ចេកវិទ្យា គ្រឿងម៉ាស៊ីន ឌីជីថលភាវូបនីយកម្ម ជំរុញការអនុវត្តតាមស្តង់ដារជាតិ និងអន្តរជាតិ ដូចជា ISO, GMP និង GHP ព្រមទាំងលើកកម្ពស់ការប្រើប្រាស់ផលិតផលក្នុងស្រុក និងពង្រីកការនាំចេញរបស់សហគ្រាសកម្ពុជា៕