អភិបាលខេត្តក្រចេះ បញ្ជាឱ្យបង្រ្កាប​ល្បែងស៊ីសងខុសច្បាប់ទាំងអស់ដោយភាពទន់ភ្លន់

លោកវ៉ា ថន អភិបាលខេត្តក្រចេះ និងជាប្រធានគណៈបញ្ជាការឯកភាពខេត្តបានដាក់បទបញ្ជាឱ្យអាជ្ញាធរ​ចុះបង្រ្កាបបទល្មើសល្បែងស៊ី សងខុសច្បាប់នានា ដែលមានទីតាំងក្នុងខេត្ត ឲ្យដូចជាភ្លៀងរលឹម រាប់ទាំងមុខសញ្ញាល្បែងឆ្នោតឡូតូ និងកន្ទុយលេខផងដែរ តបទៅតាមអនុសាសន៍ដ៏ខ្ពង់ខ្ពស់របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

នៅក្នុងកិច្ចប្រជុំបន្ទាន់របស់គណៈបញ្ជាការឯកភាពខេត្ត ដើម្បីចាត់វិធានការបង្រ្កាបបទល្មើសល្បែងស៊ីសងខុសច្បាប់ ដែលមានក្នុងខេត្តកាលពីរសៀលថ្ងៃទី១៧កញ្ញា លោក វ៉ា ថន បានជំរុញដល់រដ្ឋបាលក្រុង ស្រុក រួមនិងកម្លាំងប៉ុស្តិ៍នគរបាល កម្លាំងមេបញ្ជាការទាំងអស់ ត្រូវស្រង់បញ្ជីឈ្មោះម្ចាស់អាជីវកម្មតូបកាហ្វេ រោងគុយទាវ និងត្រូវធ្វើការណែនាំ កុំឱ្យមានការលួចលាក់លេងល្បែងស៊ីសងខុសច្បាប់ ការជល់មាន់តាមអនឡាញ ឱ្យមានប្រសិទ្ធិភាពបំផុត ជាពិសេសត្រូវពង្រឹងសន្តិសុខសណ្តាប់ធ្នាប់ សាធារណៈ ទាក់ទងទៅនឹងគោល​នយោបាយភូមិឃុំសង្កាត់មានសុវត្ថិភាពទាំង ៧ ចំណុចឲ្យខានតែបាន។

លោកអភិបាលខេត្តបានមានប្រសាសន៍ថា ជាមួយគ្នានេះដែរត្រូវដោះស្រាយបញ្ហាសំណូមពរ និងទុក្ខកង្វល់របស់​ប្រជាពលរឲ្យបានឆាប់រហ័សហើយ ត្រូវធ្វើផែនការសកម្មភាពប្រចាំថ្ងៃ ក្នុងការអនុវត្តបង្ក្រាបល្បែងស៊ីសងនៅ​មូលដ្ឋានរបស់ខ្លួនដើម្បីរាយ ការណ៍ជាប្រចាំជូនប្រធានគណៈបញ្ជាការឯកភាពរដ្ឋបាលខេត្ត-ក្រុង-ស្រុក និងដើម្បីរាយការណ៍ទៅក្រសួងមហាផ្ទៃ។

ក្នុងនោះដែរលោក វ៉ា ថន បានមានប្រសាសន៍ណែនាំដល់មេបញ្ជាការកងកម្លាំងទាំងបី និង ក្រុង ស្រុកទាំងអស់ ត្រូវរួមគ្នាអនុវត្តកិច្ចការនេះឲ្យមានប្រសិទ្ធភាព ត្រូវធ្វើជាគំរូនិងមានឥរិយាបថល្អដល់ ប្រជាពលរដ្ឋ ត្រូវចៀសវាង​នូវកាប្រព្រឹត្តអំពើមិនគប្បីណាមួយដែលនាំឲ្យប្រជាពលរដ្ឋ មើលបំណាំ និងត្រូវបង្កើនការយក​ចិត្តទុកដាក់ថែមទៀត លើកទឹកចិត្តដល់បងប្អូនកងកម្លាំងប្រជាការពារ ក្នុងការបំពេញកិច្ចការរក្សាសន្តិសុខក្នុងមូលដ្ឋាន ហើយនាំមកនូវ​សេចក្តីសុខសុភមង្គលជូនប្រជាពលរដ្ឋ និងបញ្ចៀសកុំឱ្យមានចោរឆក់ ចោរប្លន់ ក្នុងសង្គមដោយសារតែល្បែងស៊ីសង។

លោកអភិបាលខេត្តបានបន្ថែមថា« ល្បែងស៊ីសងវាមិនបានចំណេញ ដល់សេដ្ឋកិច្ចជាតិនោះទេ ផ្ទុយទៅវិញបាន​នាំឱ្យប្រជាពលរដ្ឋដែលងប់ងុលនឹងល្បែង ត្រូវលក់គោលក់ក្របី ផ្ទះសម្បែង និងខាតពេលវេលារកស៊ី ធ្វើអោយបែកបាក់គ្រួសារ និងប៉ះពាល់ដល់អនាគតកូន ដោយ សារតែការចាញ់ល្បែងនេះ »៕សំអឿន