អ៊ីស្រាអែល​ រួមដៃជាមួយ ហ្ស៊កដានី បាញ់ទម្លាក់មីស៊ីលអ៊ីរ៉ង់ និង​ គំរាម​វាយ​បក​ទៅ​លើអ៊ីរ៉ង់​​ឲ្យចាស់ដៃ​​

រដ្ឋមន្ត្រីការពារជាតិអ៊ីស្រាអែល បានប្រកាសថា ប្រទេសរបស់លោកនឹង​វាយ​ប្រហារ​​​​​តប​ទៅលើ​អ៊ីរ៉ង់​វិញ យ៉ាង​ពេញ​ទំហឹង និងប្រកបដោយឥទ្ធិពល ចំពោះការវាយប្រហារណាមួយពីសំណាក់អ៊ីរ៉ង់ បន្ទាប់ពីកងកម្លាំង​អ៊ីស្រាអែល និងហ្ស៊កដានី បានរួមគ្នាបាញ់ទម្លាក់មីស៊ីលរបស់អ៊ីរ៉ង់ ដែលបានបាញ់សំដៅទៅរកទីក្រុង Aqaba នៃប្រទេសហ្ស៊កដានី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចពិភាក្សាអំឡុងពេលចុះបំពេញទស្សនកិច្ចនៅទីតាំងផ្តល់សេវាសង្គ្រោះបន្ទាន់មួយកន្លែង​នៅ​ថ្ងៃទី១៩ ខែកក្កដា រដ្ឋមន្ត្រីការពារជាតិអ៊ីស្រាអែល លោក Israel Katz បានគូសបញ្ជាក់យ៉ាងច្បាស់ថា «ប្រសិនបើអ៊ីរ៉ង់បាញ់មីស៊ីលមកលើអ៊ីស្រាអែល យើងនឹងវាយប្រហារលើពួកគេវិញដោយកម្លាំងពេញទំហឹង»។

លោក​ បានបន្ថែមទៀតថា ប្រសិនបើអាមេរិកផ្លាស់ប្តូរគោលនយោបាយរបស់ខ្លួន ដែលនោះក៏ជាអ្វីដែលអាចកើតឡើងបានដែរ គឺ​ យើងបានត្រៀមលក្ខណៈរួចជាស្រេចទាំងសម្រាប់សកម្មភាពការពារ និងយុទ្ធនាការវាយលុក ប្រឆាំងនឹងទីក្រុងតេហេរ៉ង់ ។

ការព្រមាននេះបានធ្វើឡើង ចំពេលដែលមានការគំរាមកំហែងនៃកម្លាំងសង្គ្រាមតំបន់ទ្រង់ទ្រាយធំជាថ្មី ខណៈដែលកិច្ចព្រមព្រៀងបទឈប់បាញ់ដែលសម្របសម្រួលដោយលោក ដូណាល់ ត្រាំ បានដួលរលំទៅវិញ ជាមួយនឹងការផ្ទុះឡើងនៃជុំថ្មីនៃការវាយប្រហារដោយមីស៊ីលនៅទូទាំងមជ្ឈិមបូព៌ា។

ដោយឡែក មន្ត្រីអាមេរិកម្នាក់បានប្រាប់ទីភ្នាក់ងារសារព័ត៌មាន Reuters ថា អាមេរិកត្រូវបានរំពឹងថានឹងបញ្ជូនយន្តហោះចាក់ប្រេងលើអាកាសបន្ថែមរាប់សិបគ្រឿងទៅកាន់អ៊ីស្រាអែល ដែលជាផ្នែកមួយនៃការងើបឡើងវិញក្នុងការជម្រុញ និងពង្រឹងកម្លាំងយោធារបស់ខ្លួននៅក្នុងតំបន់

កាលពីថ្ងៃអាទិត្យ អ៊ីរ៉ង់បានបើកការបាញ់ស្រោចស្រពមីស៊ីលបាលីស្ទីកជាច្រើនគ្រាប់ សំដៅលើបណ្តារដ្ឋអារ៉ាប់ដែលជាសម្ព័ន្ធមិត្តរបស់អាមេរិក ដោយបានកំណត់គោលដៅលើរោងចក្រថាមពលអគ្គិសនី និងរោងចក្រចម្រោះទឹកស្អាតពីទឹកសមុទ្រជាលើកទីពីរក្នុងរយៈពេលពីរថ្ងៃនៅក្នុងប្រទេសគុយវ៉ែត ព្រមទាំងបានវាយប្រហារលើទីតាំងនានានៅ ហ្ស៊កដានី និងបារ៉ែនផងដែរ ។

ភ្លាមៗនោះ សំឡេងស៊ីរ៉ែនប្រកាសអាសន្នតាមអាកាសបានបន្លឺឡើងនៅក្នុងទីក្រុងអាម៉ាន ខណៈដែលហ្ស៊កដានី បានប្រកាសថា ខ្លួនបានបាញ់ទម្លាក់មីស៊ីលរបស់អ៊ីរ៉ង់ចំនួន ៣ គ្រាប់ដែលបានកំណត់គោលដៅវាយប្រហារលើប្រទេសរបស់ខ្លួន។

អ៊ីស្រាអែល បានគូសបញ្ជាក់ថា ការវាយប្រហារទាំងនេះអាចនឹងរាលដាលឆ្លងចូលមកក្នុងព្រំដែនរបស់ខ្លួន ដែល​នឹង​ធ្វើឲ្យជម្លោះក្នុងតំបន់ផ្ទាល់មួយផ្ទុះឡើងជាថ្មី បន្ទាប់ពីធ្លាប់ត្រូវបានទប់ស្កាត់ ទោះបីជាភាពតានតឹងរវាងរដ្ឋបាល របស់​ប្រធានាធិបតី ត្រាំ និងប្រទេសអ៊ីរ៉ង់ បានហក់ឡើងខ្ពស់ខ្លាំងវិញក្នុងរយៈពេលប៉ុន្មានសប្តាហ៍ថ្មីៗនេះក៏ដោយ៕

អត្ថបទ ៖ សាង ស្រីល័ក្ខ

អាមេរិក ប្រកាសអាសន្ន និងព្រមានពីសន្តិសុខទូទាំងពិភពលោក ដោយបារម្ភថា អ៊ីរ៉ង់ នឹងសងសឹកវិញ​