លោក តុប សុភ័ក៖ ៩ខែ ឆ្នាំនេះ កម្ពុជា ទទួលបាន​ទេសចរអន្តរជាតិ ១លាន២សែននាក់

ក្នុងរយៈពេល ៩ខែ ឆ្នាំ២០២២នេះ កម្ពុជា ទទួលបានភ្ញៀវទេសចរអន្តរជាតិ ១លាន២សែននាក់។ នេះបើតាមការ​បញ្ជាក់របស់លោក តុប សុភ័ក  អ្នកនាំពាក្យក្រសួងទេសចរណ៍ នៅក្នុងសន្និសីទសារព័ត៌មាន ស្ដីពី «សមិទ្ធផលសម្រេច​បានរយៈពេល ៥ឆ្នាំកន្លងមករបស់ក្រសួងទេសចរណ៍» នៅទីស្តីការគណៈរដ្ឋមន្រ្តី ព្រឹកថ្ងៃទី ៣០ ខែ កញ្ញា ឆ្នាំ ២០២២។

លោក តុប សុភ័ក បានលើកឡើងថា នៅឆ្នាំ ២០២២នេះ វិស័យទេសចរណ៍បានងើបឡើងវិញជាបណ្តើរៗ ក្រោយវិ​បត្តិកូវីដ-១៩ យាយីខ្លាំងកាលពីឆ្នាំ ២០២០-២០២១។  លោករំលឹកថា កាលពីឆ្នាំ ២០១៩ ទេសចរអន្តរជាតិ មក​ទស្សនាកម្ពុជា មានចំនួន ៦.៦លាននាក់ កើនឡើង ៦.៦ភាគរយ បើធៀបនឹងឆ្នាំ ២០១៨ ដោយបានបង្កើតមុខរបរ និងការងារទេសចរណ៍ប្រមាណ ៦៣ម៉ឺននាក់ ចំណូលទេសចរអន្តរជាតិប្រមាណ ៤.៩១៩លានដុល្លារ និងរួមចំណែក​ប្រមាណ ១២,១ នៃផលិតផលក្នុងស្រុកសរុប។

អ្នកនាំពាក្យបានបន្តថា ឆ្នាំ ២០២២នេះ កម្ពុជា រំពឹងថា អាចនឹងទទួលបានទេសចរអន្តរជាតិប្រមាណ ១.៥លាននាក់ ទៅ ២លាននាក់ និងភ្ញៀវទេសចរផ្ទៃក្នុងប្រមាណ ១០ទៅ ១១លាននាក់៕