សម្ដេចតេជោ ហ៊ុន សែន បញ្ជាក់បញ្ហាក្ដៅបំផុតសម្រាប់កិច្ចប្រជុំកំពូលអាស៊ាន ដែលកម្ពុជាជាម្ចាស់ផ្ទះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ បានបញ្ជាក់ថា សម្រាប់កិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ ដែលប្រទេសកម្ពុជាជាម្ចាស់ផ្ទះរៀបចំនាឆ្នាំ ២០២២នេះ គឺស្ថានការណ៍នៅប្រទេសអ៊ុយក្រែន ជាដុំថ្មក្ដៅបំផុត។

សម្តេចតេជោ ហ៊ុន សែន បានថ្លែងក្នុងអញ្ជើញធ្វើសន្និសីទសារព័ត៌មាន ស្ដីពី លទ្ធផលនៃកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ នៅល្ងាចថ្ងៃទី ១៣ ខែវិច្ឆិកានេះថា ស្ថានការណ៍នៅអ៊ុយក្រែន គឺជាបញ្ហាក្ដៅបំផុតសម្រាប់កិច្ចប្រជុំកំពូលអាស៊ាននាឆ្នាំ ២០២២នេះ ដែលប្រទេសចូលរួមមានជំហរលើកឡើងផ្សេងៗគ្នា។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ចំពោះស្ថានការណ៍នៅអ៊ុយក្រែន ខ្ញុំអាចនិយាយបានថា ជាដុំថ្មក្ដៅបំផុត ដែលអាចមើលឃើញថា មានជំហរផ្សេងៗគ្នា ជាពិសេសក្នុងអំឡុងកិច្ចកំពូលអាស៊ីបូព៌ា»។

យ៉ាងណាក៏ដោយ សម្ដេចតេជោ ហ៊ុន សែន បានថ្លែងថា សម្ដេចមានក្ដីរីករាយដែលកម្ពុជា អាចរៀបចំជាម្ចាស់ផ្ទះប្រជុំនេះ ដែលសមាសភាពចូលរួមមានជំហរផ្សេងៗ អាចផ្លាស់ប្ដូរទស្សនៈដ៏ស្មោះត្រង់លើបញ្ហានេះ។ សម្ដេចតេជោ ហ៊ុន សែន បានបន្ថែមទៀតថា «យើងបានបញ្ជាក់ឡើងវិញ នូវការគោរពចំពោះអធិប​តេយ្យភាព ឯករាជ្យភាព និងបូរណភាពទឹកដី»៕

អត្ថបទ៖ ឃួន សុភ័ក្រ