មន្ត្រីជាន់ខ្ពស់ក្រសួងសង្គមកិច្ច ជំរុញដល់មន្ត្រីជំនាញពាក់ព័ន្ធបង្កើនកិច្ចការពារជនរងគ្រោះ ដោយអំពើជួញដូរមនុស្ស

លោក តូច​ ចាន់នី​ អគ្គនាយក​ នៃអគ្គនាយកដ្ឋានសេវាសង្គមកិច្ច​ ក្រសួងសង្គមកិច្ច​ អតីតយុទ្ធជន​ និងយុវនីតិសម្បទា បានជំរុញដល់មន្ត្រីជំនាញពាក់ព័ន្ធ បង្កើនកិច្ចការពារជនរងគ្រោះដោយអំពើជួញដូរមនុស្ស ដើម្បីផ្តល់សេវាសមស្របដល់ជនរងគ្រោះ។  

លោក តូច​ ចាន់នី​ ជំរុញបែបនេះ ខណៈអញ្ជើញជាអធិបតីក្នុងវគ្គបណ្តុះបណ្តាលគោលនយោបាយ និងបទដ្ឋានអប្បបរមា ស្តីពី កិច្ចការពារជនរងគ្រោះដោយអំពើជួញដូរមនុស្ស និងដំណើរការគ្រប់គ្រងករណីដល់អជ្ញាធរ អ្នកផ្តល់សេវាមូលដ្ឋាន ដើម្បីផ្តល់សេវាសមស្របដល់ជនរងគ្រោះដោយអំពើជួញដូរមនុស្ស នាព្រឹកថ្ងៃទី ១៥​ ខែវិច្ឆិកា ឆ្នាំ ២០២២នេះ។

វគ្គបណ្តុះបណ្តាលគោលនយោបាយ និងបទដ្ឋានអប្បបរមា ស្តីពី កិច្ចការពារជនរងគ្រោះដោយអំពើជួញដូរមនុស្ស នោះបានដំណើរការឡើងដោយមានការចូលរួមកិត្តិយស​ពី អភិបាលរង នៃគណៈអភិ​បាល ខេត្តព្រះវិហារ លោកប្រធាននាយកដ្ឋាន គាំពារជនរងគ្រោះ លោកប្រធាននាយកដ្ឋានកិច្ចការពារកុមារ តំណាងលោក ប្រធានមន្ទីរសង្គមកិច្ច​ អតីតយុទ្ធជន​ និងយុវនីតិសម្បទា​ ខេត្តព្រះវិហារ លោកប្រធានគម្រោងកម្មវិធី នៃអង្គការអាស៊ានអូស្ត្រាលីប្រយុទ្ធប្រឆាំងអំពើជួញដូរមនុស្សនៅកម្ពុជា និងនាយកអង្គការបណ្តាញប្រតិបត្តិការជួយសង្រ្គោះ ព្រមទាំងមានការចូលរួមពីសិក្ខាកាម លោក លោកស្រីប្រធាន អនុប្រធានការិយាល័យសង្គមកិច្ច និងសុខុមាលភាពសង្គមស្រុក លោកមេឃុំ មេភូមិ មណ្ឌលសុខភាព នាយកសាលា នៅស្រុកជាំក្សាន្តជាច្រើននាក់។

លោក តូច​ ចាន់នី​ អគ្គនាយក​ នៃអគ្គនាយកដ្ឋានសេវាសង្គមកិច្ច​ ក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ បានថ្លែងថា វគ្គបណ្តុះបណ្តាលនេះមានអត្ថប្រយោជន៍ណាស់ ដើម្បីផ្តល់សេវាសមស្របដល់ជនរងគ្រោះដោយអំពើជួញ ដូរមនុស្ស ពិសេសបន្តរួមគ្នាបង្កើនកិច្ចការពារជនរងគ្រោះដោយអំពើជួញដូរមនុស្សតែម្ដង។

សូមបញ្ជាក់ថា វគ្គបណ្តុះបណ្តាលនេះមានរយៈពេល ៣ថ្ងៃ  ត្រូវបានសហការរៀបចំដោយនាយកដ្ឋានគាំពារជនរងគ្រោះ នៃអគ្គនាយកដ្ឋានសេវាសង្គមកិច្ច​ ក្រសួង​ ស.អ.យ​ និងឧបត្ថម្ភគាំទ្រដោយអង្គការអាស៊ានអូស្ត្រាលីប្រយុទ្ធប្រឆាំងអំពើ ជួញដូរមនុស្សនៅកម្ពុជា និងអង្គការបណ្តាញប្រតិបត្តិការជួយសង្គ្រោះ៕

អត្ថបទ៖ វិមាន