Connect with us

ព័ត៌មានជាតិ

អាជ្ញាធរស្រុកបូទុមសាគរ សង់រូបព្រះពុទ្ធអង្គធំកម្ពស់ ១២ ម៉ែត្រ នៅវត្តភ្នំប្រជៀវ

បានផុស

នៅ

អាជ្ញាធរ​ស្រុក​បូ​ទូ​ម​សាគរ សហការ​ជាមួយ​អាជ្ញាធរ​ភូមិ-ឃុំ និង​ព្រះចៅ​អធិការ​វត្តភ្នំ​ប្រជៀវ រួម​គ្នា​កសាង​រូប​ព្រះ​ពុទ្ធអង្គ​ធំ​កម្ពស់ ១២ម៉ែត្រ ដើម្បី​ឲ្យ​ប្រជាពលរដ្ឋ និង​អ្នកទេសចរ បាន​គោរព​បូជា​ក្នុង​វិស័យ​សាសនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ក្រូច បូរី​សីហា អភិបាលស្រុក​បូ​ទុម​សាគរ លើកឡើង​នៅ​ថ្ងៃ​ទី ២ ខែ​ធ្នូ​នេះ​ថា ការ​ផ្ដួចផ្ដើម​កសាង​ព្រះពុទ្ធ​អង្គ​ធំ​កម្ពស់ ១២ គុណ ២៥ ម៉ែត្រ និង​ទទឹង ១២ ម៉ែត្រ ស្ថិត​ក្នុង​វត្ត​សុវណ្ណ​តេ​ជោ ហៅ​វត្តភ្នំ​ប្រជៀវ ភូមិ​ព្រែក​ខ្យង ឃុំ​តា​នូ​ន បម្រើ​ដល់​វិស័យ​ពុទ្ធសាសនា ដែល​សាសនា​របស់​រដ្ឋ ដោយ​ពុទ្ធបរិស័ទ ប្រជាពលរដ្ឋ ឬ​អ្នកទេសចរ អាច​មក​គោរព​បូជា​ធ្វើបុណ្យ​ទៅតាម​ជំនឿ​រៀងៗ​ខ្លួន។

ក្នុង​ពិធី​បញ្ចុះ​បឋមសិលា​កសាង​ព្រះពុទ្ធ​រូបអង្គ​ធំ និង​សម្ពោធ​ឆ្លង​សមិទ្ធផល​ខ្លោងទ្វារ ត្រូវ​បាន​លោក​អភិបាលស្រុក​បូ​ទូ​ម​សាគរ បាន​បន្ថែម​ទៀត​ថា ការ​កសាង​ព្រះពុទ្ធ​អង្គ​ធំ​នេះ គ្រោង​ចំណាយ​ថវិកា​ប្រមាណ ៥ ម៉ឺន​ដុល្លារ ទោះ​យ៉ាង​ណា​អាស្រ័យ​លើ​ការ​ចូលរួម​ជា​ថវិកា​បន្ត​របស់​សប្បុរសជន រីឯ​សកម្មភាព​សម្រេច​ក៏​ទៅតាម​នោះ​ដែរ។

លោក ក្រូច បូរី​សីហា ថ្លែង​ថា កិច្ច​លើកកម្ពស់​វិស័យ​ពុទ្ធសាសនា​នេះ​ដែរ វា​ស្រប​ពេល​ប្រទេសជាតិ​យើង​កំពុង​មាន​សុខ​សន្តិភាព​ពេញលេញ​ទូទាំង​ប្រទេស និង​មានការ​អភិវឌ្ឍ​លើ​គ្រប់​វិស័យ ទាំង​ហេដ្ឋារចនាសម្ព័ន្ធ​រូបវន្ត និង​អ​រូបវន្ត។

លោក​រំលឹក​ថា ប្រទេស​កម្ពុជា​កាលពី ៤៣ ឆ្នាំមុន ដឹកនាំ​ដោយ​របប​កម្ពុជា​ប្រជាធិបតេយ្យ “ ខ្មែរក្រហម ” ប្រទេស​ទាំងមូល​ ត្រូវ​បាន​បំផ្លាញ​ដល់​ឫសគល់​ទាំង​ហេដ្ឋារចនាសម្ព័ន្ធ និង​ធនធានមនុស្ស។

ដោយឡែក​វិស័យ​អាណាចក្រ ក៏ដូចជា​ពុទ្ធចក្រ ត្រូវ​បាន​របប​ប៉ុលពត កម្ទេច​ចោល​ទាំងស្រុង ជំនឿ សាសនា​គ្រប់​ប្រភេទ ត្រូវ​បាន​លុបបំបាត់​គ្មាន​សល់ ក្នុង​នោះ​ព្រះពុទ្ធសាសនា ដែល​ប្រជាជន​យើង ជាង ៩០ ភាគរយ គោរព​ប្រតិបត្តិ​នោះ ត្រូវ​បាន​ពួក​ទមិឡ​លុបបំបាត់។ វត្ត​អារាម ត្រូវ​បាន​ប្រែក្លាយ​ជា​កន្លែង​ឃុំឃាំង​មនុស្ស និង​ជា​ជង្រុក​ស្រូវ​សហករណ៍ ព្រះសង្ឃ ត្រូវ​បាន​ពួកគេ​ចាប់​ផ្សឹក និង​បង្ខំ ឲ្យ​ធ្វើ​ពលកម្ម​យ៉ាង​ធ្ងន់ធ្ងរ ព្រមទាំង​កាប់សម្លាប់​គ្មាន​ត្រាប្រណី។

ប៉ុន្តែ​ក្រោយ​ការ​រំដោះ និង​ដឹកនាំ​ដោយ​សម្ដេច​តេ​ជោ ហ៊ុន សែន នាយករដ្ឋមន្ត្រី បាន​ធ្វើ​ឲ្យ​ប្រទេស​កម្ពុជា​មាន​ការ​អភិវឌ្ឍ​រុងរឿង​ជា​លំដាប់​គួរ​ជាទី​មោទនភាព​បំផុត។ ទាំងនេះ ស​បញ្ជាក់​កាន់​តែ​ច្បាស់​ថា មាន​សន្តិភាព ស្ថិរភាព នយោបាយ មានការ​អភិវឌ្ឍ​លើ​គ្រប់​វិស័យ​ទាំង​អាណាចក្រ និង​ពុទ្ធចក្រ​។

លោក​អភិបាលស្រុក​បូ​ទុម​សាគរ ក៏​សង្ឃឹម​យ៉ាង​មុតមាំ​ថា សមិទ្ធផល​ទាំងនេះ បាន​ចំណាយ​ថវិកា​យ៉ាង​ច្រើន ដោយ​ការ​ខិតខំ​ប្រមែប្រមូល​កៀរគរ​ពី​គ្រប់ទិសទី ដើម្បី​ទទួល​បាន​លទ្ធផល​ដូច​ថ្ងៃនេះ ដើម្បី​ទុក​ប្រើប្រាស់​ជា​ប្រយោជន៍​របស់​ពុទ្ធបរិស័ទ​ទាំងអស់ និង​សូម​បន្ត​ជួយ​ថែរក្សា​ឲ្យ​កាន់តែ​គង់វង្ស​យូរអង្វែង​ត​រៀង​ទៅ​តម្កល់ទុក ​ក្នុង​វិស័យ​ព្រះពុទ្ធសាសនា ដែល​ជា​តម្លៃ លេចធ្លោ​មិន​អាច​កាត់ថ្លៃ​បាន៕

អត្ថបទ ៖ សិរីវឌ្ឍនៈ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម