ជំងឺគ្រុនឈាមកើនឡើងជាង ១ម៉ឺនករណីស្លាប់ ១៨ នាក់ ១១ខែ ឆ្នាំនេះ

នៅក្នុងរយៈពេល១១ខែ ឆ្នាំ ២០២២នេះ មានអ្នកឆ្លងជំងឺគ្រុនឈាមប្រមាណជាង ១១០០០ ករណី និងស្លាប់ ១៨ ករណី ពោលគឺកើនឡើងជាង៥ដង បើធៀបទៅនឹងរយៈពេលពេញមួយឆ្នាំ ២០២១ កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាលមានប្រសាសន៍ នៅរសៀលថ្ងៃទី០៩ធ្នូនេះថា ចាប់ពីខែមករា រហូតមកដល់ខែវិច្ឆិកាឆ្នាំ ២០២២ នេះ មានករណីជំងឺគ្រុនឈាម​ជាង​១១០០០​ករណី។ ក្នុងនោះស្លាប់ ១៨ ករណី មានការកើនឡើងជាង៥ដង បើប្រៀបធៀបទៅនឹងរយៈពេលពេញមួយ​ឆ្នាំ២០២១ កន្លងទៅ ដែលមានប្រមាណ២០០០ករណីនិងមានអ្នកស្លាប់ចំនួន ៨ករណីប៉ុណ្ណោះ។

លោកវេជ្ជបណ្ឌិតបានបន្តថា ខេត្តដែលប្រឈមនឹងជំងឺគ្រុនឈាមខ្ពស់រួមមានខេត្តបន្ទាយមានជ័យ កំពង់ស្ពឺ រាជធានី​ភ្នំពេញ ព្រៃវែង សៀមរាប តាកែវ ពោធិ៍សាត់ និងត្បូងឃ្មុំ។

លោកវេជ្ជបណ្ឌិតបានបន្តទៀតថា ការកើនឡើងនៃករណីជំងឺគ្រុនឈាមនៅឆ្នាំនេះ ដោយសារតែកត្តាការ​ប្រែប្រួល​អាកាសធាតុ ដូចជា អាកាសធាតុក្តៅ អាចបង្កលក្ខណៈងាយស្រួលក្នុងការកកើតមូសខ្លាច្រើន និងកត្តាទឹកភ្លៀង​ពិសេសឆ្នាំ ២០២២ នេះជាឆ្នាំទី ៣ ស្ថិតក្នុងវ័ន្តឆ្នាំ មានការផ្ទុះជំងឺគ្រុនឈាម ដែលមានរយៈពេល ៥ ឆ្នាំម្តង បន្ទាប់ពីកម្ពុជាបានធ្វើទ្រង់ទ្រាយធំកាលពីឆ្នាំ ២០១៩ កន្លងទៅ។

លោកវេជ្ជបណ្ឌិត បានណែនាំដល់ប្រជាពលរដ្ឋ ត្រូវបន្តរស់នៅស្អាត និងអនាម័យ ដោយធ្វើការលប់បំបាត់នូវសំបកកំប៉ុង សំបកដូង សំបកកង់ឡាន និងម៉ូតូ ព្រមទាំងឆ្នាំងចាស់ៗ ទុកចោលនៅក្រៅផ្ទះ ព្រោះថា វត្ថុទាំងនេះអាចដាក់ទឹកបាន ដែលអាចកកើតទៅជាដង្កូវទឹក ហើយវិវត្តន៍ទៅជាមូសខ្លា ដែលជាភ្នាក់ងារចម្លងជំងឺគ្រុនឈាម និងអាចចម្លងទៅមនុស្ស ធ្វើឲ្យអត្រាឆ្លងកាន់តែច្រើនថែមទៀត ។

ជាមួយគ្នានេះ លោកវេជ្ជបណ្ឌិត បានអំពាវនាវដល់ប្រជាពលរដ្ឋគ្រប់រូប បើសង្ស័យថា មានជំងឺគ្រុនឈាម ដូចជា៖ មានអាការៈក្តៅខ្លួនចាប់ពី ៣៩ ទៅដល់ ៤០ អង្សា នឹងមានរោគសញ្ញាផ្សេងៗទៀត ដូចជាមុខក្រហម ឈឺប្រឡង់​កែវភ្នែក​ចាក់ទៅក្រោយ ឈឺក្បាល ចង់ក្អួតឬក្អួត ឈឺពោះ ឈឺសាច់ដុំឈឺសន្លាក់ដៃជើង ស្នាមអុចៗក្រហមលើស្បែក ឬមានហូរឈាមតាមអញ្ចាញធ្មេញជាដើម ត្រូវរួសរាន់បញ្ជូនអ្នកជំងឺទៅកាន់មន្ទីរពេទ្យរដ្ឋ ដែលនៅជិតផ្ទះជាបន្ទាន់ ដើម្បីឲ្យគ្រូពេទ្យពិនិត្យ និងព្យាបាលឲ្យបានទាន់ពេលវេលានិងកុំទៅព្យបាលនៅពេទ្យតូចៗ​ដែលមិនមានជំនាញ​ច្បាស់លាស់​ខ្វះឧបករណ៍សង្គ្រោះធ្វើឱ្យកុមារប្រឈមនឹងគ្រោះថ្នាក់ដល់អាយុជីវិត​ក្នុងរយៈពេល៣ទៅ៤​ថ្ងៃនៃការ​ឆ្លងជំងឺគ្រុនឈាម៕

អត្ថបទ៖ សំអឿន