ព័ត៌មានជាតិ

ជាង ៣០ ឆ្នាំនេះ កូរ៉េខាងត្បូង ផ្ដល់ជំនួយជាង ៣៣០ លានដុល្លារ ជួយអភិវឌ្ឍន៍កម្ពុជា

បានផុស

៣ years មុន

នៅ

ថ្ងៃសៅរ៍ ១០ ធ្នូ ២០២២

ដោយ

នៅក្នុងរយៈពេលជាង ៣០ ឆ្នាំនេះ សាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA) បានផ្តល់ជំនួយដែលមានទឹកប្រាក់ជាង ៣៣០ លានដុល្លារអាមេរិក ដើម្បីចូលរួមអភិវឌ្ឍន៍ប្រទេសកម្ពុជា។

ថ្លែងក្នុងសន្និបាតសមាគមគិលានុបដ្ឋាកកម្ពុជាឆ្នាំ ២០២២ “កាលពីថ្ងៃទី ០៩ ធ្នូ នៅសណ្ឋាគារភ្នំពេញ លោក នោ ហ្យន់ជូន (Rho Hyunjun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំនៅកម្ពុជា បានមានប្រសាសន៍ថា ចាប់ពីឆ្នាំ ១៩៩១ ដល់ឆ្នាំ ២០២២ នេះ កយកា-KOICA បាននិងកំពុងផ្ដល់គម្រោង និងកម្មវិធីជាច្រើនក្នុងវិស័យគ្រប់គ្រងធនធានទឹក និងសុខភាពសាធារណៈ ការអប់រំ កសិកម្ម និងការអភិវឌ្ឍជនបទ និងការដឹកជញ្ជូន ដែលមានតម្លៃប្រហែល ៣៣៦.៧ លានដុល្លារអាមេរិក។

លោកបានបន្តថា ក្នុងចំណោមគម្រោង និងកម្មវិធីទាំងនោះ វិស័យអាទិភាពរបស់ កយកា-KOICA គឺវិស័យសុខាភិបាលរបស់ប្រទេសកម្ពុជា ពីព្រោះការកែលម្អសុខភាពប្រជាជនមានអាទិភាពខ្ពស់ក្នុងប្រទេសកម្ពុជា។

លោកបានបន្ថែមថា លើសពីនេះទៀត ក្នុងឆ្នាំ ២០២២ នេះ កយកា- KOICA មានគម្រោងសាងសង់អគារមួយទៀតនៅក្នុងមន្ទីរពេទ្យកុមារជាតិ ហើយ កយកា-KOICA បានពិចារណាថា នឹងសាងសង់អគារមួយបន្ថែមទៀតនៅក្នុងមន្ទីរពេទ្យបង្អែកដង្កោចាប់ពីឆ្នាំ ២០២៤ តទៅ។

គួររំលឹកថា ដើម្បីជាផ្នែកមួយ នៃកិច្ចខិតខំប្រឹងប្រែងរបស់ កយកា-KOICA ក្នុងការលើកកម្ពស់គុណភាព និងលទ្ធភាពទទួលបានសេវាថែទាំសុខភាពសាធារណៈ កយកា-KOICA បានសាងសង់នូវអគារចំនួន ៣ នៃមន្ទីរពេទ្យជាតិចំនួនពីរ គឺ ១)-អគារមិត្តភាពកម្ពុជា-កូរ៉េ នៅមន្ទីរពេទ្យកុមារជាតិ និង ២)-អគារភ្នែក និង អគារត្រចៀកច្រមុះបំពង់ក នៅមន្ទីរពេទ្យព្រះអង្គឌួង និងអគារមន្ទីរពេទ្យបង្អែកខេត្តចំនួន ៣ រួមមាន ១)-មន្ទីរពេទ្យមាតា និងទារកក្នុងមន្ទីរពេទ្យខេត្តសៀមរាប ២)-មន្ទីរពេទ្យបង្អែកបាធាយ និង ៣)-មន្ទីរពេទ្យមិត្តភាពកម្ពុជា-កូរ៉េ កំពង់ឆ្នាំង និងក៏បានសាងសង់មណ្ឌលសុខភាពមាតា និងទារកចំនួន ៥ នៅខេត្តមណ្ឌលគិរី និងរតនគិរី។

ក្នុងឱកាសនោះ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងអំណរគុណចំពោះ កយកា-KOICA រដ្ឋាភិបាល និងប្រជាជន នៃសាធារណរដ្ឋកូរ៉េ ដែលបានជួយឧបត្ថម្ភផ្នែកបច្ចេកទេស សម្ភារៈ និងហិរញ្ញវត្ថុ សម្រាប់វិស័យសុខាភិបាលកម្ពុជា៕

អត្ថបទ ៖ សំអឿន

Related Topics:កយកា-KOICA