ជិះយប់​មិន​បាច់ភ័យ​ តាម​ផ្លូវ​ជាតិ ប្រជុំជន អាជ្ញាធរខេត្ត​ត្បូងឃ្មុំ ពង្រាយ​​បង្គោល​ភ្លើង​បំភ្លឺ​ផ្លូវ​ សម្រួល​ចរាចរ​ពេល​យប់​

រដ្ឋបាលខេត្តត្បូងឃ្មុំ កំពុងបន្តគម្រោងដាំបង្គោល ដាក់អំពូលភ្លើងបំភ្លឺផ្លូវនាពេលរាត្រី នៅតាមទីប្រជុំជន​ក្នុងស្រុក​ទាំង៧ ទូទាំងខេត្ត។ ជាគម្រោងដែលមានបង្គោលភ្លើងជាង១៦០០បង្គោល ដើម្បីដាក់តាមទីសាធារណៈ នៅ​កន្លែងប្រជុំ​ជន​មានផ្សារ មានមនុស្សច្រើនជាដើម។

គម្រោងសាងសង់បង្គោលភ្លើងបំភ្លឺផ្លូវសាធារណៈ ដោយ​ប្រើអំពូល LED ដើរដោយថាមពលអគ្គិសនី កើតមាន​ឡើងជាបន្តបន្ទាប់ ស្ទើតែទូទាំងខេត្តត្បូងឃ្មុំ។

អភិបាលរងខេត្តត្បូងឃ្មុំ លោក កេង ប៊ុនណា បានប្រាប់កម្ពុជាថ្មី នៅថ្ងៃទី ៧ ខែមករា ឆ្នាំ ២០២១ នេះថា អាជ្ញាធរ​កំពុង​អនុវត្ត នៅតាមបណ្តារក្រុងស្រុកទាំង៧ ដែលជាទីប្រជុំជន ដូចជាផ្សារសួង អាជ្ញាធរបានដាក់ឃ្លាត​ពីផ្សារចម្ងាយ​មួយគីឡូម៉ែត្រ និងទីតាំងថ្នល់ទទឹង និងស្រុកក្រូចឆ្មារជាដើម។

លោក កេង ប៊ុនណា បន្តថា បច្ចុប្បន្នរដ្ឋបាលខេត្តកំពុងរិះរកវិធីបន្ថែមទៀត ដោយដាក់បំពាក់ផ្ទាំងសូឡាវិញ ដោយសារ​ជួបផលលំបាកក្នុងការចំណាយទៅលើអគ្គិសនីនៅតាមទីដាច់ស្រយ៉ាល ដោយអាជ្ញាធររដ្ឋបាលខេត្តនៅបន្តរហូត។

លោកឱ្យដឹងថា រដ្ឋបាលខេត្តជាអ្នកចំណាយ និងសប្បុរសជន ព្រមទាំងក្រុមហ៊ុនឯកជនដែលបានដាក់ផ្ទាំងផ្សព្វផ្សាយពាណិជ្ជកម្មតាមដងផ្លូវ។

យ៉ាងណាគម្រោងបំភ្លឺផ្លូវតាមទីប្រជុំជននេះ មិនទាន់រាប់បញ្ចូល ពីការសាងសង់បង្គោលភ្លើងបំភ្លឺផ្លូវក្នុងក្រុង នឹងតាមផ្លូវជាតិដែលមានបង្គោលភ្លើងរាប់រយបង្គោល ពីបុរីរដ្ឋបាលខេត្តរហូតទៅដល់ក្រុងសួង ដែលមានជាង ៦៥០ បង្គោលភ្លើង និងទីតាំងរដ្ឋបាលខេត្តទៅព្រះធាតុ រាប់រយបង្គោលទៀត។

ដ្បិតថា ខេត្តត្បូងឃ្មុំទើបតែត្រូវប្រកាសបង្កើតនៅដើមឆ្នាំ ២០១៤ ប៉ុន្តែហេដ្ឋារចនាសម្ព័ន្ធក្នុងខេត្តមួយនេះ បាន​រីកដុះ ដាល​ឡើងស្កឹមស្កៃ ដូចជាអគាររដ្ឋបាល មន្ទីរពេទ្យ  សាលារៀន ដងផ្លូវ បំពាក់ដោយភ្លើងចម្រុះពណ៌ ទទួល​បានការអភិវឌ្ឍយ៉ាងឆាប់រហ័ស មិនថាហេដ្ឋារចនាសម្ព័ន្ធ លំហូរសេដ្ឋកិច្ច និងការវិនិយោគ៕

អត្ថបទ៖ ឡេង ដេត