កំណែទម្រង់សាលារៀន សិស្សកម្រិតបឋមសិក្សា ឆ្នាំ២០២៣ ត្រូវសិក្សារយៈពេល ១១ខែ

ក្រសួងអប់រំ យុវជន និងកីឡា បានបង្ហាញ សេចក្ដីណែនាំ ស្តីពី ដំណើរការគ្រឹះស្ថានបឋមសិក្សាសាធារណៈក្នុងឆ្នាំសិក្សា ២០២២-២០២៣ ដោយសិស្សានុស្សិសកម្រិតបឋមសិក្សា ត្រូវសិក្សា រយៈពេលជិត ១១ ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងអប់រំ បានឱ្យដឹងថា ក្នុងឆ្នាំសិក្សា ២០២២-២០២៣ ដំណើរការនៃការអប់រំបឋមសិក្សាផ្ដោតសំខាន់លើកំណែទម្រង់ សាលារៀន តាមរយៈការអនុវត្តកម្មវិធីសាលាកុមារមេត្រី និងការគ្រប់គ្រងតាមសាលារៀន ក្នុងគោលបំណង ដើម្បីធានាបានការអប់រំមានគុណភាព ប្រកបដោយសមធម៌ បរិយាបន្ន និងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា ស្របតាមគោលដៅ និងចំណុចដៅនៃកំណែទម្រង់វិស័យអប់រំ និងផែនការយុទ្ធសាស្ត្រ វិស័យអប់រំ។

ក្រសួងអប់រំ យុវជន និងកីឡា បានធ្វើការណែនាំដល់គ្រប់មន្ទីរអប់រំ យុវជន និងកីឡារាជធានី ខេត្ត, ការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ខណ្ឌ និងគ្រឹះស្ថានបឋមសិក្សាសាធារណៈនូវ សកម្មភាពការងារសម្រាប់អនុវត្តក្នុងឆ្នាំសិក្សា២០២២-២០២៣ ដូចខាងក្រោម៖

រយៈពេលនៃឆ្នាំសិក្សា៖ ឆ្នាំសិក្សា ២០២២-២០២៣ ត្រូវចាប់ផ្តើមដំណើរការនាថ្ងៃទី០២ ខែមករា ឆ្នាំ២០២៣ និងបញ្ចប់ទៅ វិញនៅថ្ងៃទី៣០ ខែវិច្ឆិកា ឆ្នាំ២០២៣ ដោយត្រូវអនុវត្ត បើកបវេសនកាលប្រព្រឹត្តទៅនាថ្ងៃទី០២ ខែមករា ឆ្នាំ២០២៣។

វិស្សមកាលប្រព្រឹត្តទៅចំនួនពីរដងគឺ វិស្សមកាលតូច ចាប់ពីថ្ងៃទី០៦ ខែមេសា ដល់ថ្ងៃទី១៨ ខែឧសភា ឆ្នាំ២០២៣ និងមហាវិស្សមកាល ចាប់ពីថ្ងៃទី០១ ដល់ថ្ងៃទី៣១ ខែធ្នូ ឆ្នាំ២០២៣។

ថ្ងៃបើកបវេសនកាលជាផ្លូវការ គ្រប់សាលារៀនត្រូវរៀបចំចងបដា ពាក្យស្លោកអបអរសាទរថ្ងៃបវេសនកាល ឱ្យបានមុនថ្ងៃប្រារព្ធពិធី និងអញ្ជើញថ្នាក់ដឹកនាំ ឬ មន្ត្រីក្រសួងអប់រំ យុវជន និងកីឡា, មន្ទីរអប់រំ យុវជន និងកីឡារាជធានី ខេត្ត, ការិយាល័យអប់រំ យុវជន និង កីឡានៃរដ្ឋបាលក្រុង ស្រុក ខណ្ឌ, អាជ្ញាធរដែនដី, តំណាងសហគមន៍, មាតាបិតា ឬ អ្នកអាណាព្យាបាលសិស្ស ចូលរួមសមស្របតាមគោលការណ៍ប្រតិបត្តិស្តង់ដា ដោយបិទផ្សាយបដាបញ្ជាក់ពីការចូលរៀនដោយឥតបង់ថ្ល។

ចំពោះ ការរៀបចំអនាម័យនៅតាមគ្រឹះសា្ថនបឋមសិក្សា គឺគណៈគ្រប់គ្រងគ្រឹះស្ថានបឋមសិក្សាទាំងអស់ ត្រូវបង្កើតទម្លាប់អនាម័យបែបថ្មី​នៅតាមគ្រឹះស្ថានបឋមសិក្សារបស់ខ្លួន ដោយអនុវត្តតាមគោលការណ៍ប្រតិបត្តិស្តង់ដា (SOP) សម្រាប់ដំណើរការសាលារៀនឡើងវិញ ក្នុងបរិបទកូវីដ-១៩ ចុះថ្ងៃទី០៤ ខែសីហា ឆ្នាំ២០២០៕