គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា អនុសាសន៍របស់ភាគីពាក់ព័ន្ធ ទាក់​ទងនឹងសេចក្តីព្រាងបទបញ្ជា និងនីតិវិធីសម្រាប់ការបោះឆ្នោត ជ្រើសតាំងតំណាងរាស្ត នីតិកាលទី ៧ ត្រូវបាន គ.ជ.ប សម្រេចទទួលយក និងមួយចំនួនទៀតមិនទទួលយក។

សេចក្ដីប្រកាសព័ត៌មានរបស់ គ.ជ.ប បានឲ្យដឹងថា លោក ប្រាជ្ញ ចន្ទ ប្រធាន គ.ជ.ប កាលពីព្រឹកថ្ងៃទី ២២ ខែធ្នូ ឆ្នាំ ២០២២ បានដឹកនាំកិច្ចប្រជុំដើម្បីពិនិត្យសម្រេចលើយោបល់របស់ភាគី ពាក់ព័ន្ធទាក់ទងនឹងសេចក្តីព្រាងបទបញ្ជា និងនីតិវិធីសម្រាប់ការបោះឆ្នោត ជ្រើសតាំងតំណាងរាស្ត នីតិកាលទី ៧ ឆ្នាំ២០២៣។

ពាក់ព័ន្ធនឹងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ២០២៣ គ.ជ.ប បានពិនិត្យគ្រប់អនុសាសន៍របស់ភាគីពាក់ព័ន្ធ ដែលបានផ្ដល់យោបល់មកឲ្យ គ.ជ.ប។ បន្ទាប់ពីបានពិភាក្សាគ្នាយ៉ាងល្អិតល្អន់ ដោយឈរលើគោលការណ៍ច្បាប់ជាធរមាន រួមនឹងបទពិសោធន៍ក្នុងការបោះឆ្នោតកន្លងមក អនុសាសន៍មួយចំនួន ត្រូវបាន គ.ជ.ប សម្រេចទទួលយក និងមួយចំនួនទៀតមិនទទួលយក។

អង្គប្រជុំ គ.ជ.ប សម្រេចឲ្យលោក ទេព នីថា អគ្គលេខាធិការ គ.ជ.ប កែសម្រួលតាមស្មារតីនៃអង្គប្រជុំ និងឆ្លើយតបជាលាយលក្ខណ៍អក្សរទៅភាគីទាំងនោះវិញ ដោយត្រូវបញ្ជាក់ហេតុផលច្បាស់លាស់ ទាំងអនុសាសន៍ទទួលយក និងមិនទទួលយក។

លោក ប្រាជ្ញ ចន្ទ ប្រធាន គ.ជ.ប បានណែនាំដល់អង្គភាពជំនាញ ឲ្យយកចិត្តទុកដាក់ដល់ការបណ្តុះបណ្តាល និងអប់រំដល់មន្ដ្រីបោះឆ្នោត ក្នុងការអនុវត្តបទបញ្ញ និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ ឲ្យបានត្រឹមត្រូវ និងមានប្រសិទ្ធភាព ជាពិសេសមន្ត្រីការិ​យាល័យបោះឆ្នោត និងរាប់សន្លឹកឆ្នោត៕