ព័ត៌មានជាតិ

៤ ឆ្នាំនេះ ខេត្តកោះកុងមាននិស្សិតទទួលអាហារូបករណ៍សម្ដេចតេជោសរុប ៥៥ នាក់

បានផុស

៤ years មុន

នៅ

ថ្ងៃចន្ទ ២៦ ធ្នូ ២០២២

ដោយ

៤ ឆ្នាំមកនេះ សម្ដេចតេជោ និងសម្ដេចកិត្តិព្រឹទ្ធបណ្ឌិត បានផ្ដល់អាហារូបករណ៍សិក្សាដល់និស្សិតក្រីក្រនៅខេត្តកោះកុង សរុបចំនួន ៥៥ នាក់ ដោយពួកគេកំពុងផ្ដោតលើការរៀនសូត្រដោយទំនួលខុសត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហាក់ ឡេង តំណាងក្រុមការងារសមាគមសិស្ស-និស្សិតអាហារូបករណ៍ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត (អ.ម.ត) ខេត្តកោះកុង ថ្លែងថា ខេត្តកោះកុងសិស្សនិស្សិតចំនួន ៥៥ នាក់ ក្នុងនោះមានស្ត្រី ២៤ នាក់ បាននិងកំពុងសិក្សាសាកលវិទ្យាល័យគ្រប់គ្រង និងសេដ្ឋកិច្ចខេត្ត និងវិទ្យាស្ថានជាតិពហុបច្ចេកទេសកម្ពុជា (NPIC) ខេត្តកោះកុង។ បើគិតចាប់តាំងពីឆ្នាំ ២០១៩ មកទល់សព្វថ្ងៃ។

លោក ហាក់ ឡេង បានបន្ថែមថា បើគិតចាប់ពីឆ្នាំ ២០០៨ មកដល់ឆ្នាំ ២០១៨ សិស្ស-និស្សិត ដែលបានទទួលអាហារូបករណ៍ អ.ម.ត ត្រូវបានបញ្ជូនទៅសិក្សានៅតាមគ្រឹះស្ថានរដ្ឋ និងឯកជនជាង ៣០ គ្រឹះស្ថាន សម្រាប់ឆ្នាំសិក្សា ២០១៨-២០១៩។

សមាគមសិស្ស-និស្សិតក្រីក្រ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ក៏លេចជារូបរាងឡើងតាមការចុះបញ្ជីនៅក្រសួងមហាផ្ទៃ កាលពីថ្ងៃទី ០៧ ខែឧសភា ឆ្នាំ ២០១៤ និងបន្តចងក្រងបណ្ដាញសិស្ស-និស្សិត អាហារូបករណ៍ទាំងអស់ឲ្យមានការទំនាក់ទំនង ស្គាល់គ្នា និងរួបរួមសាមគ្គីភាពគ្នា បង្កើតឲ្យមានអត្តសញ្ញាណរួមមួយ ដើម្បីចូលរួមសកម្មភាពនានា ដែលជាប្រយោជន៍ដល់សិស្ស-និស្សិត និងសង្គម។

លោក ហាក់ ឡេង ឲ្យដឹងទៀតថា រាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រចតុកោណដំណាក់កាលទី ៤ ដែលជាគោលនយោបាយក្នុងការបន្តការអនុវត្តកម្មវិធីកំណែទម្រង់នានា ជាមួយនឹងការពង្រឹងសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សង្គម ការអភិវឌ្ឍសេដ្ឋកិច្ចប្រកបដោយចិរភាពតាមរយៈការខិតខំកាត់បន្ថយភាពក្រីក្ររបស់ប្រជាពលរដ្ឋ។

សមាគមសិស្ស និស្សិតក្រីក្រ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ក៏បានរួមចំណែកយ៉ាងសកម្មជាមួយរាជរដ្ឋាភិបាល ក្នុងការអភិវឌ្ឍធនធានមនុស្សតាមរយៈវិស័យអប់រំ ដែលជាគ្រឹះយ៉ាងរឹងមាំសម្រាប់ការកសាងប្រទេស ជាពិសេសការបណ្ដុះបណ្ដាលប្អូនៗសិស្ស-និស្សិត ឲ្យក្លាយជាយុវជនបន្តវេនពោរពេញដោយសមត្ថភាព។

ក្នុងពិធីប្រកាសតែងតាំងក្រុមការងារគ្រប់គ្រងសិស្ស-និស្សិតអាហារូបករណ៍ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ខេត្តកោះកុង កាលពីរសៀលថ្ងៃទី ២៥ ខែធ្នូ ឆ្នាំ ២០២២ លោកស្រី មិថុនា ភូថង អភិបាលខេត្ត លើកឡើងថា សម្ដេចទាំងទ្វេ តែងតែគិតគូរដល់អនាគតរបស់ប្អូនៗយុវជន សិស្ស និស្សិត ក្រីក្រទាំងឡាយ ក្នុងនាមជាថ្នាក់ដឹកនាំកំពូលរបស់កម្ពុជា។

លោកស្រីអភិបាលខេត្ត អះអាងដែរថា ក្រោមម្លប់សន្តិភាព និងការអភិវឌ្ឍលើគ្រប់វិស័យ សមាគមសិស្ស និស្សិតក្រីក្រ របស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ក៏បានរួមចំណែកយ៉ាងសកម្មជាមួយរាជរដ្ឋាភិបាលក្នុងការអភិវឌ្ឍធនធានមនុស្ស តាមរយៈវិស័យអប់រំនៅកម្ពុជា ដែលជាគ្រឹះយ៉ាងរឹងមាំសម្រាប់ការកសាងប្រទេស ជាពិសេសការបណ្ដុះបណ្ដាលប្អូនៗសិស្ស និស្សិត ឲ្យក្លាយជាយុវជនបន្តវេនពោរពេញដោយសមត្ថភាព៕

អត្ថបទ ៖ សិរីវឌ្ឍនៈ