កម្ពុជាលែងត្រី និងបង្កង ១,៥ លាន​​ក្បាល នៅចំថ្ងៃ ទិវាមច្ឆជាតិ

ក្រសួងកសិកម្មរុក្ខាប្រមាញ់ និងនេសាទនៅថ្ងៃទី ០១ ខែកក្កដា ឆ្នាំ ២០២៤ បានរៀបចំទិវាមច្ឆជាតិ​លើកទី ១៩ និងបានលែងត្រី និងវារីសត្វចំនួន ១,៥ ​លាន​​ក្បាល ចូលទៅក្នុងបឹងធំ ស្ថិតនៅភូមិកំពង់សំណាញ់ ស្រុកព្រៃឈរ ខេត្តកំពង់ចាម។

ត្រីមេពូជ និង​កូន​​ត្រីដែលមាន ២០ប្រភេទ ដូចជា ត្រីប្រា ត្រីពោ ត្រីឆ្ពិន ត្រីកាហែ ត្រីគល់រាំង បង្កង​ទឹក​សាប អណ្តើក កន្ធាយត្រូវបានលែងចូលក្នុងបឹងធំនេះ។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាមានប្រសាសន៍នៅក្នុងពិធីទិវាមច្ឆជាតិ ០១ កក្ដដា ឆ្នាំ ២០២៤ ដោយសម្ដេចបានជំរុញឱ្យអាជ្ញាធរពង្រឹង​ការភិរក្សធនធាន​ជលផល ព្រៃលិចទឹក និងបន្ត​លែកូនត្រី និងត្រីមេពូជទៅក្នុងជម្រកធម្មជាតិ។

សម្ដេចធិបតីក៏បានណែនាំឱ្យក្រសួងស្ថាប័នពាក់ព័ន្ធដាំព្រៃលិចទឹក និងព្រៃកោងកាងឡើងវិញ​ ដើម្បីផ្ដល់ជាជម្រកពងកូន សម្រាប់វារីសត្វគ្រប់ភេទ។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងថា ក្រសួងបាននិង​កំពុងចាត់​វិធាន​ការបទល្មើសនេសាទ និងការផលិតចែកចាយឧបករណ៍នេសាទ​ខុសច្បាប់ និងជំរុញចលនាលែងត្រីមេពូជ និងត្រីរង​គ្រោះថ្នាក់ចូលក្នុងដែនជម្រកធម្មជាតិវិញ។

លោករដ្ឋមន្ត្រីកសិកម្មបានបញ្ជាក់ថា នៅក្នុងឆ្នាំ ២០២៣ កម្ពុជាប្រមូលផលត្រីទឹកសាបបានជាង ៤២ ម៉ឺនតោន (៤២៦ ០០០) មានការកើនឡើង ៥% បើធៀបនឹងឆ្នាំ ២០២២៕

អត្ថបទ៖ ឡេង ដេត