ព័ត៌មានជាតិ

រដ្ឋបាលខេត្តកំពត រៀបចំការប្រណាំងទូក ប្រព្រឹត្តទៅយ៉ាងអធិកអធម ប្រកបដោយភាពសប្បាយរីករាយ

បានផុស

៣ years មុន

នៅ

ថ្ងៃសៅរ៍ ៣១ ធ្នូ ២០២២

ដោយ

រដ្ឋបាលខេត្តកំពត បានរៀបចំការប្រណាំងទូកអ្នកនេសាទ និងទូកម៉ាស៊ីន និងទូកផ្កាចារសមុទ្រ ដើម្បីអបអរសាទរក្នុងពិធីបុណ្យឆ្លងឆ្នាំសាកល ឆ្នាំ ២០២២ ឈានចូល ឆ្នាំ ២០២៣ បានចាប់ផ្តើមបើកនៅរសៀលថ្ងៃទី ៣០ ខែធ្នូ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរសៀលថ្ងៃទី ៣០ ខែធ្នូ ឆ្នាំ ២០២២ រដ្ឋបាលខេត្តកំពត បានរៀបចំព្រឹត្តិការណ៍ប្រណាំងទូកប្រជានេសាទ នៅបរិវេណឆ្នេរខ្សាច់កម្សាន្ត កោះស្មៅ ដែលស្ថិតនៅក្នុងភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត ដោយក្នុងកម្មវិធីប្រណាំងនេះ មានទូកប្រជានេសាទ (និងទូកម៉ាស៊ីន និងទូកផ្កាចារ) ក្រោមអធិបតីយភាពឯកឧត្តម ម៉ៅ ធនិន អភិបាលខេត្តកំពត និងលោកជំទាវ រួមជាមួយ ឯកឧត្តម ជឹង ផល្លា ប្រធានក្រុមប្រឹក្សាខេត្តកំពត និងលោកជំទាវផងដែរ។

ឯកឧត្តម ម៉ៅ ធនិន អភិបាលខេត្តកំពតបានមានប្រសាសន៍ថា ការរៀបចំកម្មវិធីនេះឡើង ដើម្បីអបអរសាទរពិធីបុណ្យឆ្លងឆ្នាំសាកល ឆ្នាំ ២០២២ ឈាមចូលឆ្នាំ ២០២៣ និងដើម្បីផ្តល់ភាពសប្បាយរីករាយដល់ក្រុមគ្រួសារបងប្អូនប្រជានេសាទផង និងផ្តល់ទស្សនីយភាពថ្មីប្លែកភ្នែក សម្រាប់ភ្ញៀវទេសចរ ដែលមកឆ្លងឆ្នាំនៅខេត្តកំពតផងដែរ។

ប្រជានេសាទចូលរួមក្នុងការប្រណាំងទូកបានបង្ហាញអំពីចំណាប់អារម្មណ៍របស់ខ្លួនថា ពួកគាត់ពិតជារីករាយ និងសប្បាយចិត្តខ្លាំងមែនទែន ដែលបានមកចូលរួមកម្សាន្តសប្បាយ ក្នុងការប្រណាំងទូកនេសាទ ព្រោះបានជួបជុំគ្នាផង និងអាចឈ្នះរង្វាន់ជយលាភីច្រើនទៀត។ ប្រជានេសាទទាំងនោះ ក៏បានប្រាប់អំពីការអភិវឌ្ឍន៍រីកចម្រើនរបស់ខេត្តកំពត ក្រោមកិច្ចខិតខំដឹកនាំក្នុងរយៈពេលដ៏ខ្លីរបស់ឯកឧត្តម ម៉ៅ ធនិនផងដែរថា បានផ្លាសប្តូរមុខមាត់ខេត្តច្រើន ដូចជាការស្ថាបនាផ្លូវបេតុងច្រើនខ្សែ ស្ថាបនាឆ្នេរខ្សាច់កម្សាន្តជាច្រើនកន្លែង ការដោះស្រាយវិវាទក្រៅប្រព័ន្ធតុលាការ ការបង្កើតជាព្រឹត្តិការកម្សាន្តសប្បាយ ដូចថ្ងៃនេះជាដើម ហើយពួកគាត់ចង់ឲ្យមានព្រឹត្តិការណ៍បែបនេះ ធ្វើឡើងជារៀងរាល់ឆ្នាំ។

ក្នុងនោះ ការប្រណាំងទូកសរុបមានចំនួន ១០៤ គូ ស្មើ ២០៨ ទូកក្នុងនោះ ទូកម៉ាស៊ីន ១១០ ប្រណាំងរយៈចម្ងាយ ១,០០០ ម៉ែត្រ, ទូកផ្កាចារ ៩៨ ទូក ប្រណាំងរយៈចម្ងាយ ៥០០ ម៉ែត្រ។ ឆ្លងកាត់ការប្រណាំងថ្ងៃទី ១ បានជម្រុះទូក ម៉ាស៊ីន ៥៥ ទូក ទូកផ្កាចារ ៤៩ ទូក ហើយស្អែកនឹងប្រណាំងជ្រើសរើសទូកឈ្នះជយលាភី។

រដ្ឋបាលខេត្តបានប្រាប់ឲ្យដឹងថា ចំពោះទូកដែលមានជយលាភី លេខ ១ នឹងទទួលបានប្រាក់រង្វាន់ ចំនួន ១០ លានរៀល និងទូកដែលទទួលជយលាភីលេខ ២ បានប្រាក់រង្វាន់ចំនួន ៧ លានរៀល និងទូកដែលទទួលជយលាភីលេខ ៣ បានប្រាក់រង្វាន់ចំនួន ៥ លានរៀល ចំណែកទូកដែលមិនបានជាប់ចំណាត់ថ្នាក់ ក៏ទទួលបានប្រាក់ឧបត្ថម្ភលើកទឹកចិត្តចំនួន ១ លានរៀលផងដែរ៕