អតីតប្រធានរដ្ឋសភាសាធារណរដ្ឋកូរ៉េ ដឹកនាំ​គណៈ​ប្រតិភូពិនិត្យគម្រោងជំនួយរបស់កូរ៉េនៅមន្ទីរពេទ្យព្រះអង្គឌួង

លោក Park Byeong- Seug អតីតប្រធានរដ្ឋសភាជាតិនៃសាធារណរដ្ឋកូរ៉េ នៅរសៀលថ្ងៃទី១២ ខែមករាឆ្នាំ២០២៣នេះ បានដឹកនាំគណៈប្រតិភូចុះពិនិត្យមើលគម្រោងរបស់កូរ៉េនៅមន្ទីរពេទ្យព្រះអង្គឌួង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកសាស្ត្រាចារ្យ លូ លីឃាង ទីប្រឹក្សាអមប្រសួងសុខាភិបាល និងជានាយកមន្ទីរពេទ្យព្រះអង្គឌួង បានមានប្រសាសន៍ថា គណៈប្រតិភូសភាកូរ៉េបានមកបំពេញទស្សនកិច្ចនៅកម្ពុជាចាប់ពីថ្ងៃទី១១ ដល់ថ្ងៃទី១៣ ខែមករា ដើម្បីធ្វើទស្សកិច្ចសិក្សាមើលគម្រោងជំនួយនានារបស់កូរ៉េ តាមរយៈអង្គការកយកាដែលបានជួយនៅប្រទេសកម្ពុជា។

លោកសាស្ត្រាចារ្យបានបន្តថា សម្រាប់នៅមន្ទីរពេទ្យព្រះអង្គឌួងភាគីកូរ៉េបានជួយសាងសង់អគារចំនួនពីរ គឺទី១ អគារចក្ខុរោគ មិត្តភាពកម្ពុជា-កូរ៉េ មានកម្ពស់៣ជាន់ ដែលបានដាក់ឱ្យដំណើរការនៅឆ្នាំ២០១៥ និងអគារទី២អគារជំងឺ
ត្រចៀក ច្រមុះ បំពង់ក មិត្តភាពកម្ពុជា-កូរ៉េ ដែលមានកម្ពស់៥ជាន់ បានដាក់ឱ្យដំណើរការនៅឆ្នាំ២០២២។

លោកនាយកមន្ទីរពេទ្យបានបន្តថា តាមរយៈអគារមន្ទីរពេទ្យដែលជាជំនួយរបស់អង្គការកយការនេះបានជួយកែលម្អសេវាវេជ្ជសាស្រ្តនៅក្នុងមន្ទីរពេទ្យព្រះអង្គឌួងកាន់តែប្រសើរថែមទៀត ខណៈចប្ចុប្បន្ននេះគិតជាមធ្យមក្នុង១ថ្ងៃមន្ទីរពេទ្យបានទទួលអ្នកជំងឺមកពិគ្រោះជំងឺក្រៅប្រមាណពី១៣០០ទៅ១៥០០នាក់ដែលភាគច្រើនជាប្រជាពលរដ្ឋទូទៅ និងកម្មកររោងចក្រ និងវះកាត់ជាមធ្យមក្នុង១ថ្ងៃចំនួន១៣០នាក់ ក្នុងនោះវះកាត់ភ្នែកត្រចៀកច្រមុះ និងបំពង់កប្រមាណ១០០នាក់ព្រោះ​ថា អគារនីមួយៗមានបំពាក់ដោយឧបករណ៍ទំនើបៗសម្រាប់ការធ្វើរោគវិនិច្ឆ័យការព្យាបាល និងការវះកាត់ ប្រកប​ដោយគុណភាពខ្ពស់។

បើតាមមន្តី្រអង្គការកយកាបានឱ្យដឹងថា គណៈប្រតិភូសភាកូរ៉េមកបំពេញទស្សនកិច្ចនៅកម្ពុជាក៏ដើម្បីពង្រឹងទំនាក់ទំនងរវាងសាធារណរដ្ឋកូរ៉េនិងប្រទេសកម្ពុជាឱ្យកាន់តែរឹងមាំបន្ថែមទៀតហើយគណៈប្រតិភូគ្រោងនឹងអញ្ជើញចូលជួបសំដែងការគួរសមជាមួយសម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា។​ ក្រៅពីចុះពិនិត្យមើលអគារជាគម្រោងជំនួយរបស់អង្គការកយកាគណៈប្រតិភូក៏នឹងអញ្ជើញទៅពនិត្យមើលគម្រោងជំនួយរបស់កូរ៉េនៅសារមន្ទីរទួលស្លែងផងដែរ៕

អត្ថបទ៖ សំអឿន