ព័ត៌មានជាតិ

លោកបណ្ឌិត អ៊ិត សំហេង ស្នើក្រុមការងារ បន្តកសាង និងពង្រីកសមាជិកគណបក្សថ្មី ឲ្យបានកាន់តែច្រើនបន្ថែមទៀត

បានផុស

២ ខែ មុន

នៅ

ថ្ងៃចន្ទ ១៦ មករា ២០២៣

ដោយ

លោកបណ្ឌិត អ៊ិត សំហេង សមាជិកគណៈកម្មាធិការកណ្ដាល និងជាប្រធានក្រុមការងារចុះជួយមូលដ្ឋានខណ្ឌចំការមន និងខណ្ឌបឹងកេងកង បានស្នើដល់ក្រុមការងារ បន្តកសាងពង្រីកសមាជិកគណបក្សថ្មីឲ្យបានកាន់តែច្រើនបន្ថែមទៀត ជាពិសេសក្នុងស្រទាប់យុវជន ដែលទើបនឹងគ្រប់អាយុបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនេះបានធ្វើឡើងកាលពីរសៀលថ្ងៃទី ១៥ មករា ក្នុងឱកាសលោកបណ្ឌិត អញ្ជើញប្រកាសសមាជិកគណបក្សថ្មី CPP ជិត ២ ពាន់នាក់ ក្នុងសង្កាត់ចំនួន ៥ របស់ខណ្ឌចំការមន នៅអគារពិព័រណ៍កោះពេជ្រ។

លោកបណ្ឌិត អ៊ិត សំហេង បានមានប្រសាសន៍ថា ទន្ទឹមនឹងការកសាង និងពង្រីកសមាជិកថ្មី ត្រូវបំប៉នទាំងខាងនយោបាយសតិអារម្មណ៍ និងចាត់តាំង ព្រមទាំងជីវភាពរស់នៅធ្វើឲ្យសមាជិកគណបក្សមានភាពកក់ក្ដៅ ផ្សារភ្ជាប់ជាមួយគណបក្ស និងការបោះឆ្នោតជូនគណបក្សឲ្យបានគ្រប់ៗគ្នា។

លោកបណ្ឌិត អ៊ិត សំហេង បានមានប្រសាសន៍ថា «ការរក្សាបានសមាជិកចាស់បូកបញ្ចូលការកសាងសមាជិកបក្សថ្មីបន្ថែម នៅក្នុងខណ្ឌចំការមន គឺជាកម្លាំងសាមគ្គីយ៉ាងរឹងមាំមួយសម្រាប់គណបក្ស ដើម្បីបន្តដឹកនាំប្រទេសជាតិឲ្យកាន់តែរីកចម្រើនថែមទៀត ក៏ដូចជាធ្វើឲ្យប្រទេសជាតិមានសុខសន្តិភាព ស្ថិរភាពសង្គម និងការអភិវឌ្ឍលើគ្រប់វិស័យ»។

លោកបណ្ឌិត បានណែនាំដល់សមាជិកបក្សចាស់ថ្មី ត្រូវខិតខំអនុវត្តឲ្យបានត្រឹមត្រូវតាមកម្មវិធីគោលនយោបាយ និងលក្ខន្តិកៈ របស់គណបក្ស សំដៅការកសាងទំនាក់ទំនងល្អជាមួយប្រជាជន និងខិតខំឃោសនាផ្សព្វផ្សាយអំពីកម្មវិធីនយោបាយរបស់គណបក្ស និងច្បាប់របស់រដ្ឋនានា ដោយត្រូវថែរក្សាធ្លុងសាមគ្គីឯកភាពផ្ទៃក្នុង ការជួយគ្នាទៅវិញទៅមក និងត្រូវខិតខំរៀនសូត្រលើកកម្ពស់សមត្ថភាពទាំងគុណធម៌ សីលធម៌ ដើម្បីសម្រេចភារកិច្ចជូនសង្គមជាតិរបស់យើង។

បន្ថែមពីនេះ លោកបណ្ឌិត ក៏បានលើកឡើងអំពីប្រវត្តិ និងស្នាដៃ របស់គណបក្សប្រជាជនកម្ពុជា ដែលជាគណបក្សមានវ័យចំណាស់ មានភាពចាស់ទុំ បានដាក់ចេញនូវកម្មវិធីនយោបាយដ៏ត្រឹមត្រូវ និងមានគុណបំណាច់ បានកសាងសមិទ្ធផលជាច្រើន ក្នុងបុព្វហេតុជាតិ មាតុភូមិ ព្រមទាំងបានឆ្លងកាត់ការលំបាកគ្រប់បែបយ៉ាងជាមួយប្រជាពលរដ្ឋ រហូតនាំឲ្យប្រទេសមានសុខសន្តិភាពពេញលេញ និងមានការអភិវឌ្ឍដូចសព្វថ្ងៃ។

ជាមួយគ្នានេះ លោកបណ្ឌិត បានបន្ថែមថា គណបក្សប្រជាជនកម្ពុជា ជាគណបក្សដែលមានធនធានមនុស្សគ្រប់គ្រាន់ និងតែងតែគិតគូរអំពីសុខទុក្ខរបស់ប្រជាពលរដ្ឋ នៅគ្រប់ទីកន្លែង និងគ្រប់កាលៈទេសៈ ទោះជាស្ថិតក្នុងដំណាក់កាលណាក៏ដោយ។

ក្នុងឱកាសនោះ លោកបណ្ឌិត អ៊ិត សំហេង បាននាំនូវប្រសាសន៍ផ្ដាំផ្ញើ និងសាកសួរសុខទុក្ខពីសំណាក់ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាប្រធានគណបក្ស ព្រមទាំងថ្នាក់ដឹកនាំគណបក្ស ជូនដល់សមាជិកបក្សទាំង ១ ៨៧៣ រូប ដែលទើបនឹងចូលរួមជីវភាពជាមួយនឹងគណបក្សប្រជាជនកម្ពុជាផងដែរ៕

អត្ថបទ ៖ សំអឿន