រដ្ឋមន្ត្រីសុខាភិបាល អំពាវនាវឱ្យពលរដ្ឋប្រុងប្រយ័ត្ន​ចំពោះការពុលចំអាហារឬពុលស្រាក្នុងពិធីបុណ្យចូលឆ្នាំចិន

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានធ្វើការក្រើនរំលឹក និងអំពាវនាវដល់ប្រជាពលរដ្ឋគ្រប់រូបត្រូវបន្តការប្រុងប្រយ័ត្នចំពោះការពុលចំអាហារ ឬពុលស្រា ស ស្រាថ្មាំ នៅក្នុងពិធីសែនដូនតាផ្សេងៗ និងឱកាសចូលឆ្នាំចិនខាងមុខ។

ការអំពាវនាវនេះបានធ្វើឡើងដោយសារនៅក្នុងពិធីសែនដូនតាផ្សេងៗ និងបុណ្យចូលឆ្នាំចិនតែងតែមានការពុលចំណីអាហារ ឬពុលស្រាសនៅតាមតំបន់ ឬទីតាំងមួយចំនួននៅក្នុងប្រទេសដែលបណ្តាលមកពីការទុកចំណីអាហារមិនបានត្រឹមត្រូវ និងមិនមានអនាម័យនិងការបិទស្រាមិនស្របតាមស្តង់ដារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្ដីណែនាំក្រើនរំលឹករបស់ក្រសួងសុខាភិបាលចុះកាលពីយប់ថ្ងៃទី១៧មករា លោករដ្ឋមន្ត្រីណែនាំដល់ពលរដ្ឋត្រូវលាងដៃឱ្យបានញឹកញាប់ជាមួយសាប៊ូ និងទឹកស្អាតឱ្យបានញឹកញាប់ បន្ទាប់ពីការប៉ះពាល់សត្វ បោចសំអាតសត្វ​បសុបក្សី ឬវត្ថុផ្សេងៗដែលអាចជាប្រភពចម្លងរោគ ព្រមទាំងប្រកាន់ខ្ជាប់នូវការអនុវត្ដអនាម័យ និងចំណីអាហារដែលមានសុវត្ថិភាពល្អ និងចម្អិនម្ហូបអាហារឱ្យបានឆ្អិនល្អមុននឹងបរិភោគ។ ត្រូវទុកដាក់អាហារឆៅ និងឆ្អិន ជាច់ដោយឡែកពីគ្នា។ ត្រូវចម្អិនម្ហូបអាហារឱ្យបានឆ្អិនល្អ ជាពិសេសសាច់ សត្វស្លាប ស៊ុត និងអាហារសមុទ្រ។ ត្រូវទុកដាក់ចំណីអាហារក្នុងសីតុណ្ហភាពមានសុវត្ថិភាព បើត្រជាក់ ត្រូវតិចជាង ៥អង្សាសេ និងបើក្ដៅ គឺត្រូវលើសពី៦០អង្សាសេ ឬចម្អិនអាហារមួយពេលសម្រាប់តែមួយពល ដោយមិនទុកអាហារសេសសល់យូរដែលអាចជូរផ្អូម ឬមានដុះផ្សិត ដែលបង្កឱ្យមានការរាគរាករូស ឈឺពោះ ក្អួតជាដើម។ ត្រូវប្រើប្រាស់ទឹកស្អាត និងវត្ថុធាតុដើមឆៅល្អដែលល្អត្រឹមត្រូវ។

លោករដ្ឋមន្ត្រីបានអំពាវនាវ និងធ្វើការក្រើនរំលឹកដល់បងប្អូនប្រជាពលរដ្ឋគ្រប់រូបត្រូវបន្តការប្រុងប្រយ័ត្នផ្ទាល់ខ្លួនប្រកបដោយស្មារតីទទួលខុសត្រូវខ្ពស់ ក្នុងការការពារសុខភាពពីការចម្លងជំងឺកូវីដ-១៩ ជាពិសេសជំងឺអូមីក្រុង ជំងឺផ្តាសាយបក្សី និងជំងឺឆ្លងផ្សេងៗទៀត រួមទាំងការបង្ការសុខភាពបណ្តាលមកពីការពុលចំអាហារ ឬពុលស្រា ស នៅក្នុងការរស់នៅជាប្រចាំថ្ងៃរបស់ខ្លួន ក៏ដូចជានារដូវបុណ្យទាន ពិធីសែនដូនតាផ្សេងៗ និងនាឱកាសចូលឆ្នាំចិន។

ជាមួយគ្នានេះដែរលោករដ្ឋមន្ត្រីបានណែនាំឱ្យពលរដ្ឋត្រូវអនុវត្តឱ្យបានខ្ជាប់ខ្លួននូវវិធានការ ៣ការពារ រួមមានពាក់ម៉ាស់
លាងដៃឱ្យញឹកញាប់ជាមួយសាប៊ូ ឬអាល់កុល ឬជែលនិងរក្សាម្លាតសុវត្ថិភាពបុគ្គលពីមួយម៉ែត្រកន្លះឡើង និង៣កុំ​ដោយកុំទៅកន្លែងមានមនុស្សច្រើន កុំទៅកនែ្លង បិទជិតគ្មានខ្យល់ចេញចូលកុំប៉ះពាល់គ្នា កុំចាប់ដៃគ្នា កុំកៀកស្មាគ្នា ជាដើម។ ទន្ទឹមនឹងនេះលោករដ្ឋមន្ត្រីបានជំរុញឱ្យអាជ្ញាធរ ខេត្ត ស្រុក ក្រុង ខណ្ឌរដ្ឋបាលឃុំ/សង្កាត់ ត្រូវចាត់តាំងកម្លាំងគ្រប់គ្រង ឃ្លាំមើល និងធ្វើការណែនាំការអនុវត្តវិធានការការពារខាងលើ ជាពិសេសនៅតាមកសិដ្ឋានទីផ្សារលក់សត្វបសុបក្សីរស់ ដោយមានការត្រួតពិនិត្យការអនុវត្តវិធានការការពារឱ្យបានហ្មត់ចត់ដើម្បីជៀសផុតពីការផ្ទុះចេញនូវជំងឺផ្ដាសាយបក្សីក្នុងសហគមន៍របស់ខ្លួន។ នៅមូលដ្ឋានរបស់ខ្លួន ចាត់ចែងការត្រួតពិនិត្យចំពោះ វិធានការ ៣ការពារ ៣កុំនិងវិធានការសុវត្ថិ ភាពចំណីអាហារ។

ជាងនេះទៀតត្រួតពិនិត្យទីតាំងទស្រា ស ឬផលិតស្រា.ស ហើយអ្នករៀបចំឬអ្នកផលិតស្រា ស ត្រូវ អនុវត្តតាមក្បួនបច្ចេកទេសត្រឹមត្រូវដោយមិនយកសារធាតុមេតាណុល មកលាយធ្វើជាស្រា ស ផ្តេសផ្តាសនោះឡើយ។ ដាច់ខាតមិនត្រូវទិញ ឬផលិត ឬបរិភោគស្រាសដែលមិនមានប្រភពផលិតច្បាស់លាស់ ហើយដែលមិនគោរពតាមបទដ្ឋានបច្ចេកទេសត្រឹមត្រូវឬយកមេតាណុលមកលាយធ្វើជាស្រាសដែលបង្កឱ្យមានការពុល រហូតដល់ស្លាប់បាត់បង់ជីវិត។

គួរបញ្ជាក់ថាពិធីបុណ្យសែនចិនឆ្នាំនេះនឹងប្រព្រឹត្តិទៅនៅថ្ងៃទី២១ខែមករាឆ្នាំ២០២៣និងបុណ្យចូលឆ្នាំចិននឹងប្រព្រឹត្តិរយៈពេល៣ថ្ងៃគឺចាប់ពីថ្ងៃទី២២ទី២៣និងទី២៤ ខែមករា ឆ្នាំ២០២៣ខាងមុខនេះ៕

អត្ថបទ៖ សំអឿន