ក្រសួងប្រៃសណីយ៍ និងទូរគមនាគមន៍ ក្រសួងអប់រំ យុវជន និងកីឡា ក្រសួងសេដ្ឋកិច្ច និងហិរញ្ញវត្ថុ និងក្រសួងព័ត៌មាន បានរួ​បរួមគ្នាបង្កើតស្ថាប័នផ្សព្វផ្សាយអប់រំកម្ពុជា(EBC) ដើម្បីចូលរួមចំណែកពង្រឹងវិស័យអប់រំនៅកម្ពុជា កាន់តែមានគុណភាព ភាពសម្បូរបែប និងទូលំទូលាយ ផ្តល់ជូនទាំងគ្រូបង្រៀន និងសិស្សានុសិស្សទូទាំងប្រទេស។

នៅថ្ងៃទី២៣ ខែមករា ឆ្នាំ២០២៣ម្សិលមិញ លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានដឹកនាំតំណាងក្រសួង ៣ ផ្សេងទៀត បង្កើតឱ្យមានកិច្ចប្រជុំស្តីពីវឌ្ឍនភាពនៃគម្រោងប្រតិបត្តិការ និងបង្កើតស្ថាប័នផ្សព្វផ្សាយអប់រំកម្ពុជា (EBC)។ ក្នុងកិច្ចប្រជុំនេះ លោក សុខ ពុទ្ធិវុធ បានលើកឡើងពីសារៈសំខាន់នៃការបង្កើតស្ថាប័ននេះឡើងមក ជាពិសេស ក្នុងសម័យកូវីដ-១៩។ វា ជាការពន្លឿនផ្នែកអប់រំតាមរយៈឌីជីថល និងអភិវឌ្ឍន៍វិស័យអប់រំ និងបណ្តុះបណ្តាលផ្សេងៗនៅកម្ពុជា។

លោកបន្ថែមថា គម្រោងនេះ ក៏ជាសកម្មភាពអាទិភាពមួយក្នុងក្របខណ្ឌគោលនយោបាយសេដ្ឋកិច្ច និងសង្គមឌីជីថល ឆ្នាំ២០២១-២០៣៥ និងគោលនយោបាយរដ្ឋាភិបាលឌីជីថល ឆ្នាំ២០២២-២០៣៥ ដើម្បីកសាងពលរដ្ឋឌីជីថលប្រកបដោយការរួមបញ្ចូលគ្នា។ នៅក្នុងកិច្ចប្រជុំនេះ លោក សុខ ពុទ្ធិវុធ ព្រមទាំងសមាជិកនៅក្នុងអង្គប្រជុំ បានពិនិត្យមើលបន្ទប់ស្ទូឌីយូ បន្ទប់កាត់ត បន្ទប់បញ្ចូលសំឡេង និងបន្ទប់បណ្តុះបណ្តាលនៅ EBC ផងដែរ។ បើតាមរបាយការណ៍ EBC កំពុងផលិតមាតិកាអប់រំឌីថល អភិវឌ្ឍ គ្រប់គ្រងមាតិកាឌីជីថល និងថ្នាលអប់រំបណ្តុះបណ្តាល ដើម្បីចូលរួមចំណែកជំរុញវិស័យអប់រំនៅកម្ពុជាឱ្យមានគុណភាព និងទូលំទូលាយ។

EBC គឺជាគម្រោងមួយ ដែលត្រូវបានបង្កើតឡើងដោយក្រសួង៤ ដូចបានរៀបរាប់ខាងលើ ដែលទទួលជំនួយឥតសំណងពីក្រសួងវិទ្យាសាស្ត្រ បច្ចេកវិទ្យា គមនាគមន៍ និងព័ត៌មាន (MSIT) នៃសាធារណរដ្ឋកូរ៉េ និងអនុវត្តដោយស្ថានីយ៍ផ្សព្វផ្សាយអប់រំកូរ៉េ (EBS)។

សព្វថ្ងៃ EBC ផលិតបានមាតិកាអប់រំជាវីដេអូច្រើនប្រភេទចំនួន ៤.៩៥៤ភាគ ជាមួយនឹងវីដេអូកម្មវិធីបង្រៀនថ្នាក់ទី៧ ដល់ទី១២ ព្រមទាំងកំពុងសាកល្បងអនុវត្តកម្មវិធីសិក្សាតាមអ៊ីនធឺណិតជាមួយវិទ្យាល័យ ហ៊ុន សែន សេរីភាព នៅក្រុងតាខ្មៅ ដែលមានសិស្សសរុបជាង ៥ពាន់នាក់។ ក្នុងនោះ EBC បានរៀបចំបន្ទប់ចំនួន២ បំពាក់ដោយកុំព្យូទ័រយួរដៃ ២៥ គ្រឿង ថេបប្លេត២៥គ្រឿង និងសម្ភារៈផ្សេងៗ។ ជាមួយគ្នានេះ ក៏មានដំឡើងសេវាអ៊ីនធឺណិតគ្របដណ្តប់ទូទាំងសាលាផងដែរ។ ក្រោយពីការដំឡើងបាន និងភាពជោគជ័យដាក់ឱ្យសាកល្បងនៅវិទ្យាល័យ ហ៊ុន សែន សេរីភាពរួចមក លោក សុខ ពុទ្ធិវុធ សង្ឃឹមថា នឹងអាចពង្រីកគម្រោងនេះដល់សាលារៀនផ្សេងទៀតនៅកម្ពុជា ក្នុងរយៈពេលដ៏ខ្លីខាងមុខ៕

ដោយ៖អុន ស្រីមាន