សម្ដេចតេជោ ៖ កំហុសខាងនយោបាយនៃការធ្វើរដ្ឋប្រហារឆ្នាំ ១៩៧០ នាំឲ្យប្រទេសកម្ពុជា ត្រូវបានបំផ្លាញដល់ឬសគល់  

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងពិធីប្រគល់សញ្ញាបត្រជូននិស្សិតជ័យលាភី នៃសាកលវិទ្យាល័យវេស្ទើនជាង ៣ពាន់នាក់ នាព្រឹកថ្ងៃទី ២៦ ខែមករានេះ បានបន្តរំលឹកថា ប្រសិន​បើ​គ្មានសង្រ្គាមក្នុងឆ្នាំ ១៩៧០ទេនោះ ប្រទេសកម្ពុជា មិនដឹងថា មានការអភិវឌ្ឍបែបណានោះទេ។ សង្រ្គាមនោះ កើតឡើងដោយសារកំហុសខាងនយោបាយ នៃការសម្រេចចិត្តធ្វើរដ្ឋប្រហារទម្លាក់សម្ដេចព្រះនរោត្តម សីហនុ ចេញពីព្រះប្រមុខរដ្ឋ ពីសំណាក់លោក​សេនាប្រមុខ លន់ នល់ និងបក្ខពួកមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន បានថ្លែងបែបនេះថា «ប្រទេសនេះ (ប្រទេសកម្ពុជា) បើសិនកុំមានសង្រ្គាមឆ្នាំ ១៩៧០ ផ្ដើមដោយរដ្ឋប្រហារ ១៨ មីនា ១៩៧០ ដែលនៅសល់តែប៉ុន្មានខែទៀត រំលងតែមួយខែទៀត វាដល់ ១៨ មីនា ១៩៧០​ហើយ ដែលឆ្នាំនេះជាខួបលើកទី ៥៣ នៃថ្ងៃធ្វើរដ្ឋប្រហារទម្លាក់សម្ដេចព្រះនរោត្តម សីហនុ»។

សម្ដេចតេជោ ហ៊ុន សែន បានលើកឡើងថា អំឡុងពេលនោះ ប្រទេសកម្ពុជា មានការអភិវឌ្ឍគួរឲ្យកត់សម្គាល់ ហើយវិស័យនានាក៏មានការអភិវឌ្ឍផងដែរ។ សម្រាប់យុវជនសម័យនោះ បានទទួល និងទាញយកផលប្រយោជន៍យ៉ាងច្រើន ពីសន្តិភាពដែលកើតចេញក្រោយសម័យឯករាជ្យ ដឹកនាំដោយសម្ដេចព្រះបិតាជាតិ ព្រះបរមរតនកោដ្ឋ។

សម្ដេចតេជោ ហ៊ុន សែន ថ្លែងបែបនេះទៀតថា «ប៉ុន្តែកំហុសខាងនយោបាយ នៃការសម្រេចចិត្តធ្វើរដ្ឋប្រហារទម្លាក់សម្ដេច​ព្រះនរោត្តម សីហនុ នាំឲ្យប្រទេសនេះ (ប្រទេសកម្ពុជា) មិនត្រឹមតែមិនអាចអភិវឌ្ឍបានទេ ក៏ប៉ុន្តែប្រទេសនេះ ត្រូវបានបំផ្លាញដល់ឬសគល់តែម្ដង»៕