សម្ដេចតេជោ បញ្ជាក់ពីការបន្តធ្វើការកាន់តែជិតស្និទ្ធជាមួយភាគីវៀតណាមលើកិច្ចសហប្រតិបត្តិការសភា

ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានបញ្ជាក់ពីការប្ដេជ្ញាចិត្តក្នុងការពង្រឹងឱ្យកាន់តែស៊ីជម្រៅថែមទៀតចំពោះកិច្ចសហប្រតិបត្តិការរវាងស្ថាប័នសភារបស់កម្ពុជា និងវៀតណាម ខណៈលោក Tran Thanh Man ត្រូវបានបន្តតំណែងជាប្រធានសភាវៀតណាម។

ក្នុងសម័យប្រជុំលើកដំបូងរបស់រដ្ឋសភាជាតិវៀតណាម នីតិកាលទី១៦ កាលពីព្រឹកថ្ងៃទី៦ ខែមេសា ឆ្នាំ២០២៦ លោក Tran Thanh Man ត្រូវបានអង្គសភាបោះឆ្នោតជ្រើសតាំងសារជាថ្មីឱ្យកាន់តំណែងជាប្រធានរដ្ឋសភាវៀតណាម។

ភ្លាមៗក្រោយការជាប់ឆ្នោតនេះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានផ្ញើសារលិខិត ដោយសម្ដែងការអបអរសាទរលោក Tran Thanh Man ដែលត្រូវបានបោះឆ្នោតជ្រើសរើសសារជាថ្មីជាប្រធានរដ្ឋសភាវៀតណាម។ សម្ដេចតេជោបានចាត់ទុកការជាប់ឆ្នោតសារជាថ្មីនេះថា បានបង្ហាញពីការជឿជាក់ និងទំនុកចិត្តរបស់គណបក្ស រដ្ឋ និងប្រជាជនវៀតណាមចំពោះការដឹកនាំដ៏ឆ្នើមរបស់លោក Tran Thanh Man និងការបន្តប្តេជ្ញាចិត្តក្នុងការលើកកម្ពស់តួនាទីរបស់រដ្ឋសភា ដើម្បីសម្រេចបាននូវវិបុលភាពកាន់តែធំធេងសម្រាប់ប្រជាជនវៀតណាម។

តាមរយៈលិខិតនោះ ស​ម្ដេចតេជោ ប្រធានព្រឹទ្ធសភា ក៏បានគូសរំលេចពីទំនាក់ទំនងជិតស្និទ្ធរវាងស្ថាប័ននីតិប្បញ្ញត្តិរបស់កម្ពុជា និងវៀតណាមផងដែរ ដោយសម្ដេចតេជោ ពិពណ៌នាថា តែងតែបានរួមចំណែកយ៉ាងសំខាន់ចំពោះការអភិវឌ្ឍនៃទំនាក់ទំនងទ្វេភាគីជារួមរវាងប្រទេសទាំងពីរ ដោយបានលើកកម្ពស់ការយោគយល់គ្នា និងការជឿជាក់គ្នាទៅវិញទៅមកកាន់តែខ្លាំងឡើង ព្រមទាំងបាននាំមកនូវផលប្រយោជន៍ជាក់ស្តែងដល់ប្រជាជនទាំងពីរ។

សម្ដេច ហ៊ុន សែន បានបញ្ជាក់ជាថ្មីពីការត្រៀមធ្វើការយ៉ាងជិតស្និទ្ធជាមួយលោក Tran Thanh Man ដើម្បីពង្រឹងពង្រីកនូវកិច្ចសហប្រតិបត្តិការសភាទាំងពីរបន្ថែមទៀត ដើម្បីឧត្តមប្រយោជន៍រួមហើយតាមរយៈនេះក៏នឹងបានរួមចំណែកដល់សន្តិភាព ស្ថិរភាព និងវិបុលភាពក្នុងតំបន់ និងពិភពលោកផងដែរ៕