អ្នកឧកញ៉ា គិត ម៉េង៖ ពេលវេលា គឺជារូបិយបណ្ណ​ដ៏មានតម្លៃបំផុត​ដែលមិនគួរចាយផ្តេសផ្តាស

«ខ្សែជីវិតនេះមិនខ្លីទេ ប៉ុន្តែពេលខ្លះ យើងធ្វើឱ្យវាខ្លី»។ សូមផ្តោតពេលវេលារបស់យើងទៅលើសកម្មភាពដ៏មានអត្ថន័យ ហើយចងចាំពីរបៀបដែលយើងកំពុងប្រើពេលវេលារបស់យើង ព្រោះ «ពេលវេលា» គឺជារូបិយបណ្ណដ៏មាន​តម្លៃបំផុត​ដែលមិនគួរចាយផ្តេសផ្តាស។ នេះគឺជាសំណេររបស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា។ អ្នកឧកញ៉ា តែងតែចែករំលែកនូវខ្លឹមសារដ៏មានសារៈសំខាន់ជាច្រើនពាក់ព័ន្ធនឹងបទពិសោធន៍ជីវិត និងការងារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា គិត ម៉េង បានលើកឡើងដូច្នេះទៀតថា «ជីវិតរស់រានរបស់យើងមិនមែនខ្លីនោះទេ តែយើងខ្ជះខ្ជាយ​ពេលវេលាច្រើនលើសកម្មភាពដែលមិនចាំបាច់។ ខ្សែជីវិតនិងពេលវេលារបស់យើងគឺល្មមគ្រប់គ្រាន់ ហើយជីវិតនេះ​បានផ្តល់ឱ្យយើងនូវសមិទ្ធផលខ្ពស់បំផុត ប្រសិនបើយើងប្រើប្រាស់ពេលវេលាលើអ្វីដែលមានសារៈសំខាន់ដល់យើង។ ប៉ុន្តែនៅពេលដែលពេលវេលាដែលអ្នករស់រានត្រូវបានខ្ជះខ្ជាយ ដោយមិនយកចិត្តទុកដាក់ និងចំណាយលើ​សកម្មភាព​មិនល្អ មុននឹងដង្ហើមចុងក្រោយ អ្នកប្រាកដជាមានអារម្មណ៍ថា ជីវិតនេះខ្លីណាស់។ ខ្សែជីវិតមិនខ្លីទេ ហើយពេលវេលា​ដែលអ្នកខ្ជះខ្ជាយនោះហើយដែលធ្វើឱ្យអ្នកបាត់បង់ឱកាសក្នុងការធ្វើឱ្យឆាកជីវិតអ្នកវែង ពោលគឺ អាស្រ័យលើថាតើ​អ្នកចេះប្រើប្រាស់ពេលវេលាដែលអ្នកមានលើអ្វីដែលផ្តល់អត្ថន័យដល់ជីវិតរបស់អ្នកឬអត់»។

អ្នកឧកញ៉ា បានសង្កត់ធ្ងន់ថា យើងទាំងអស់គ្នាមានពេលវេលាគ្រប់គ្រាន់ដើម្បីរស់នៅក្នុងជីវិត​ដែលពោរពេញដោយ​ភាពរីករាយ ប្រសិនបើយើងប្រើពេលវេលាដោយភាពឈ្លាសវៃ ហើយចៀសវាងការខ្ជះខ្ជាយ​ពេលវេលាទៅលើ​សកម្មភាព​ដែលគ្មានសារៈសំខាន់។

អ្នកឧកញ៉ា គិត ម៉េង បច្ចុប្បន្នគឺជាប្រធាសភាពាណិជ្ជកម្មកម្ពុជា។ លោកដឹកនាំក្រោមហ៊ុនធំៗជាច្រើន នៅក្រោម​ក្រុមហ៊ុន The Royal Group មានដូចជា ក្រុមហ៊ុនទូរសព្ទ Cellcard, ក្រុមហ៊ុនធានារ៉ាប់រង Infinity Insurance, ធនាគារ J Trust Royal Bank , ក្រុមហ៊ុន Royal Financial Consultancy , ទូរទស្សន៍ CTN CNC MY TV CEPCO, សណ្ឋាគារ Royal Park Resort នៅសៀមរាប , Titan King Resort & Casino នៅបាវិត​ខេត្តស្វាយរៀង , សណ្ឋាគារ Hotel Cambodiana , ក្រុមហ៊ុនផ្លូវដែក Toll Royal និងក្រុមហ៊ុនជាច្រើនទៀត៕