ព័ត៌មានជាតិ

គ្មានឡើយការឈូសឆាយផ្លូវឡើងទៅភ្នំខ្នងផ្សារ

បានផុស

៣ years មុន

នៅ

ថ្ងៃអាទិត្យ ១២ កុម្ភៈ ២០២៣

ដោយ

ថ្មីៗនេះ រូបភាពសកម្មភាពនៃការឈូសឆាយផ្លូវទៅកាន់តំបន់ទេសចរណ៍ភ្នំខ្នងផ្សារ ត្រូវបានចែកចាយនៅលើបណ្តាញសង្គម។ យ៉ាងណាមិញ រដ្ឋបាលខេត្តកំពង់ស្ពឺបានច្រានចោល ខណៈអាជ្ញាធរនៅតែអះអាងនឹងរក្សាតំបន់នេះមិនឲ្យមានការប៉ះពាល់លក្ខណៈដើមដើម្បីទាក់ទាញភ្ញៀវទេសចរ។

លោក វ៉ី សំណាង អភិបាលខេត្តកំពង់ស្ពឺបានឆ្លើយតបសំនួររបស់អ្នកសារព័ត៌មានកម្ពុជាថ្មីនៅក្នុងសន្និសីទជោគជ័យរយៈពេល ៥ ឆ្នាំ ដែលរៀបចំឡើងដោយអង្គភាពអ្នកនាំពាក្យរដ្ឋាភិបាលនៅសប្ដាហ៍នេះថា រដ្ឋបាលខេត្តមិនមានគម្រោងស្ថាបនាផ្លូវទៅរមណីយដ្ឋានភ្នំខ្នងផ្សារនោះទេ។ រូបភាពដែលមានការបង្ហោះពីការឈូសឆាយផ្លូវទៅតំបន់ភ្នំខ្នងផ្សារ គឺដើម្បីអូសខ្សែបញ្ជូនអគ្គិសនីសម្រាប់ប្រើប្រាស់តែប៉ុណ្ណោះ។

«គេឈូសផ្លូវដើម្បីងាយស្រួលដឹកសម្ភារៈអូសខ្សែអគ្គិសនី មិនមែនជាគម្រោងស្ថាបនាផ្លូវអីនោះទេ»។ នេះបើតាមការអះអាងរបស់លោក វ៉ី សំណាង។

លោកបន្តថា ដោយសារកំណើននៃរោងចក្រសហគ្រាស ដែលតម្រូវឲ្យខេត្តត្រូវការប្រភពថាមពលបន្ថែម។

«ដូចបញ្ជាក់កន្លងទៅ តំបន់នេះយើងទុកសម្រាប់អ្នកទេសចរផ្សងព្រេងទៅកម្សាន្ត យើងមិនចង់ឲ្យមានការអភិវឌ្ឍអីច្រើនទេ។ ដូចពាក្យស្លោក ដើម្បីឃើញទេសភាពដ៏ស្រស់ស្អាត ត្រូវតែឆ្លងកាត់ផ្លូវដ៏លំបាក។ អីចឹង យើងនៅតែរក្សាតំបន់ទេសចរណ៍នេះ ដោយមិនឲ្យប៉ះពាល់លក្ខណៈដើមនោះទេ»។