ព័ត៌មានជាតិ

អភិបាលរងខេត្តកោះកុង ដាស់តឿនយុវវ័យកុំឲ្យប្រព្រឹត្តខុសប្រាសចាកពីប្រពៃណីទំនៀមទម្លាប់ខ្មែរ

បានផុស

៣ years មុន

នៅ

ថ្ងៃអង្គារ ១៤ កុម្ភៈ ២០២៣

ដោយ

លោកស្រីអភិបាលរងខេត្តកោះកុង នៅថ្ងៃទី ១៤ ខែកុម្ភៈ ឆ្នាំ ២០២៣ នេះ បានផ្ញើសារដាស់តឿនដល់យុវជននៅទូទាំងខេត្ត ពិសេសក្នុងតំបន់សេដ្ឋកិច្ចពិសេសខេត្ត កុំឲ្យប្រព្រឹត្តអំពើប្រាសចាកប្រពៃណីទំនៀមទម្លាប់ស្ត្រីខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃទី ១៤ ខែកុម្ភៈ ជាទិវាក្ដីស្រឡាញ់ អាជ្ញាធរខេត្តកោះកុង បានជួបសំណេះសំណាលជាមួយកម្មករ កម្មការិនីរោងចក្រកាត់ដេរសំលៀកបំពាក់ KKN នៅក្នុងតំបន់សេដ្ឋកិច្ចពិសេសខេត្ត ដោយលោកស្រី ឈី វ៉ា អភិបាលរងខេត្ត ពន្យល់ជាច្រើនអំពីថ្ងៃមួយនេះ។

លោកស្រីអភិបាលរងខេត្ត បញ្ជាក់ថា សូមបងប្អូន កម្មករ កម្មការិនី និងយុវវ័យមួយចំនួន កុំយល់ច្រឡំថា ថ្ងៃទិវាអន្តរជាតិនេះ ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍។ សូម បងប្អូន ទាំងអស់គ្នា គិតពិចារណា និងប្រុងប្រយ័ត្នខ្លួន ត្រូវដឹងអ្វីដែលគួរធ្វើ និងអ្វីដែលមិនគួរធ្វើ ជាពិសេសនៅថ្ងៃទិវា នៃក្ដីស្រលាញ់ ១៤ កុម្ភៈនេះ។

លោកស្រី ឈី វ៉ា សង្កត់ធ្ងន់ទៀតថា សូមកុំប្រព្រឹត្តទង្វើប្រាសចាកពីប្រពៃណី និងទំនៀមទម្លាប់របស់ខ្មែរ តែសូមបង្ហាញនូវការស្រលាញ់ដោយចិត្តស្មោះ ការដឹងគុណ និងក្ដីគោរព។ ទិវានេះគឺជាថ្ងៃដែលបញ្ជាក់អំពីសេចក្ដីស្រឡាញ់ជាទូទៅ ដោយមិនចាំបាច់សម្រាប់តែគូស្នេហ៍ទេ ហើយសេចក្ដីស្រឡាញ់មានលក្ខណៈទូលំទូលាយណាស់ បងប្អូនគួរតែបង្ហាញក្ដីស្រឡាញ់ ដោយការដឹងគុណ ដល់គ្នាទៅវិញទៅមក រវាងអ្នកមានគុណ បុព្វការីជន រវាងកូន និងឪពុកម្ដាយ យាយតា រវាងបងប្អូន ប្ដីប្រពន្ធ ក្រុមគ្រួសារ រវាងគូសង្សារ រវាងមិត្តភ័ក្ដិ រវាងមិត្តរួមការងារ សង្គមជាតិ និងសាសនា ដោយក្នុងអត្ថន័យ នៃក្ដីស្រឡាញ់ដ៏បរិសុទ្ធ និងការគោរពឲ្យតម្លៃ ចំពោះគ្នា និងគ្នា។

បន្ថែមលើនេះ ក្នុងនាមអាជ្ញាធរខេត្តកោះកុង លោកស្រី ក៏ថ្លែងអំណរអរគុណដល់កម្មករ កម្មការិនី ដែលបានចូលរួមយ៉ាងផុលផុសចាក់វ៉ាក់សាំងគ្រប់ចំនួនដូស ដើម្បីទប់ស្កាត់ការឆ្លងជំងឺកូវីដ-១៩ ជាមួយនឹងរាជរដ្ឋាភិបាលកម្ពុជា អភិវឌ្ឍន៍ស្ដារសេដ្ឋកិច្ចសង្គមឡើងវិញ៕

អត្ថបទ ៖ សិរីវឌ្ឍនៈ