លោក ថោង ខុន ជំរុញឲ្យប្រជាសហគមន៍អេកូទេសចរណ៍ ផាត់សណ្តាយ​ រៀបចំទីតាំងឲ្យបានស្អាត ដើម្បីទាក់ទាញទេសចរជាតិ និងអន្តរជាតិបន្ថែម

ថោង ខុន រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ បានេជំរុញឲ្យប្រជាសហគមន៍អេកូទេសចរណ៍ ផាត់សណ្តាយ ត្រូវចេះរៀបចំទីតាំងខ្លួនឲ្យបានស្អាត ដើម្បីទាក់ទាញភ្ញៀវទេសចរជាតិ និងអន្តរជាតិចូលមកលេងកំសាន្ដដែលជាផ្នែកមួយក្នុងការជួយបង្កើនជីវភាពបានមួយផ្នែកទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឳកាសចុះជួបសំណេះ​សំណាលជាមួយប្រជាសហគមន៍អេកូទេសចរណ៍ផាត់សណ្តាយ ក្នុងភូមិសាស្រ្តឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី១៩ ខែកុម្ភៈ ឆ្នាំ២០២៣ លោក ថោង ខុន បានលើកឡើងថា ក្រៅពីការប្រកបរបរនេសាទដោយស្របច្បាប់ហើយ ត្រូវខិតខំរៀបចំទីតាំងរបស់ខ្លួនឱ្យបានស្អាត និងទាក់ទាញ ដើម្បីបានផ្តល់ឱកាសឱ្យភ្ញៀវទេសចរបានមកទស្សនាកម្សាន្តបន្ថែមទៀត។

ជាមួយគ្នានេះដែរ លោករដ្ឋមន្ត្រីក៏បានអំពាវនាវឲ្យប្រជាសហគមន៍ត្រូវចេះអភិរក្សធានជីវៈចម្រុះ​ និងធនធានធម្មជាតិក្នុងមូលដ្ឋានរបស់ខ្លួនឱ្យបានគង់វង្ស​ ដោយមិនត្រូវប្រកបរបរនេសាទត្រី​ដោយខុសច្បាស់ដែលអាចនាំឱ្យបាត់បង់ពូជត្រី ឫកាប់ព្រៃលិចទឹកដែនជម្រករបស់មច្ឆាជាតិនោះឡើយ។

បើតាមលោក យុក សេងឡុង នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផល ( FACT) បានឱ្យដឹងដែរថា ថ្មីនេះអង្គការ FACT បានទទួលគម្រោងពីក្រសួងបរិស្ថានរបស់អាល្លឺម៉ង ក្នុងការជួយដល់សហគមអេកូទេសចរណ៍ផាត់សណ្តាយ ដែលមានរយៈពេល៥ឆ្នាំបន្តទៀត ដែលគិតចាប់ពីថ្ងៃទី០៥ ខែសីហា ឆ្នាំ២០២០ រហូតដល់ខែកញ្ញា ឆ្នាំ២០២៧ ហើយនឹងមានគម្រោងក្នុងការជួយសាងសង់ ផ្សារអេកូទេសចរណ៍បណ្តែតទឹក ដែលតាមផែនការគ្រោងធ្វើឡើងពីអគារចំនួន៣ ជាអក្សU មាន២ជាន់៕

អត្ថបទ៖ សុខុម