ព័ត៌មានជាតិ

អភិបាលខេត្តប៉ៃលិន បង្ហើបទីតាំងមានរ៉ែត្បូងច្រើនជាងគេនៅខេត្តប៉ៃលិន

បានផុស

៣ years មុន

នៅ

ថ្ងៃព្រហស្បតិ៍ ២៣ កុម្ភៈ ២០២៣

ដោយ

ខេត្តប៉ៃលិនកាលពីជំនាន់មុន គេស្គាល់ជាទឹកដីត្បូងពេជ្ររបស់ប្រទេសកម្ពុជា តែបច្ចុប្បន្នអតីតទឹកដីសមរភូមិប្រយុទ្ធបានប្រែក្លាយជាដីកសិកម្ម ខណៈធនធានរ៉ែត្បូងកាន់តែខ្សត់ខ្សោយទៅ។

យ៉ាងណាមិញ បើតាមការអះអាងរបស់អភិបាលខេត្តប៉ៃលិន ខេត្តជាប់ជាយដែនថៃនេះនៅតែសេសសល់ត្បូងដ៏មានតម្លៃជាអត្តសញ្ញាណរបស់ខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិនបានឆ្លើយតបសំនួររបស់កម្ពុជាថ្មីក្នុងសន្និសីទនៅព្រឹកនេះថា តើខេត្តប៉ៃលិននៅសល់ត្បូងដ៏មានតម្លៃដែរទេ? លោកជំទាវបានឆ្លើយតបថាគឺនៅមាន ថែមទាំងបង្ហើបទីតាំងត្បូងបញ្ជាក់ថែមទៀតផង។

លោកជំទាវអះអាងថា «ភ្នំយ៉ាតនៅទាំងអស់ ១០០% ហ៊ានធានា។ ខែភ្លៀងបើប្រជាពលរដ្ឋទៅលេងខេត្តប៉ៃលិន កុំងើយមើលលើ នៅហ្នឹងដីអ្នកស្គាល់នឹងដឹងថាជាដុំថ្មត្បូង តែបើអ្នកអត់ស្គាល់ប្រាកដជាគិតថាជាដុំថ្មធម្មតា»។

លោកជំទាវបានបន្តថា រ៉ែត្បូងក្នុងខេត្តប៉ៃលិនបានរងការធ្វើអាជីវកម្មគ្មានច្បាប់ទម្លាប់យ៉ាងអនាធិបតេយ្យ ជំនាន់មុនសមាហរណកម្មកងកម្លាំងខ្មែរក្រហម ប៉ុន្តែបច្ចុប្បន្នមិនមានទៀតទេ។ យ៉ាងណាមិញ ក៏នៅមានបងប្អូនមួយចំនួននៅរុករកជាលក្ខណៈតូចតាច បើថាក្រុមហ៊ុនអាជីវកម្មធុំដុំគឺអត់មានទេ។

ត្បូងល្អជាងគេនៅក្នុងចំណោមត្បូងរបស់ប្រទេសកម្ពុជា មានតែត្បូងខេត្តប៉ៃលិនប៉ុណ្ណោះ។ ត្បូងប៉ៃលិនមានពីរប្រភេទ គឺត្បូងទទឹម (ពណ៌ក្រហម) និងត្បូងកន្តៀង (ពណ៌ខៀវ) ដែលមានគុណភាពទទួលស្គាល់នៅលើពិភពលោក។

រ៉ែត្បូងនៅខេត្តប៉ៃលិន ដែលនៅសេសសល់គេចផុតពីការជីករុករកភាគច្រើននៅក្នុងតំបន់ភ្នំយ៉ាត ដែលជាភ្នំស្ថិតនៅចំកណ្តាលទីក្រុងប៉ៃលិន។ ភ្នំយ៉ាតត្រូវបានរាជរដ្ឋាភិបាលកម្ពុជាដាក់ចូលជាតំបន់អភិរក្សសម្បត្តិបេតិកភណ្ឌវប្បធម៌ធម្មជាតិ ដើម្បីទុកបម្រើឱ្យវិស័យទេសចរណ៍ សម្រាប់ភ្ញៀវជាតិនិងអន្តរជាតិមកទស្សនាកម្សាន្ត៕