សម្ដេចតេជោ ហ៊ុន សែន ថា លោក ស៊ន តារា មានកំហុសធំណាស់ ដែលបានប្រមាថឪពុកខ្លួនឯង

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា អ្នកអត្ថាធិប្បាយតាមហ្វេសប៊ុកលោក ស៊ន តារា ដែលប្រមាថឪពុករបស់ខ្លួន គឺមានកំហុសធំណាស់។ ដូច្នេះការវាយប្រហាររបស់លោក ស៊ន តារា ទៅលើបុគ្គលដទៃទៀត ក៏មិនមានអ្វីចម្លែកដែរ។

នៅក្នុងពិធីប្រគល់សញ្ញាបត្រជូននិស្សិត​សាកលវិទ្យាល័យ​ភូមិន្ទភ្នំពេញជាង ៧ពាន់នាក់ នាព្រឹកថ្ងៃទី ២៤ ខែកុម្ភៈនេះ សម្ដេចតេជោ ហ៊ុន សែន បានថ្លែងថា លោក ស៊ន តារា មានកំហុសធំណាស់ ដែលបានប្រមាថឪពុកខ្លួនឯងថា «ប៉ាឯងកុំចេះ ខ្ញុំរៀនចេះជាងប៉ាឯង» ហើយមិនមានអ្វីចម្លែកទេ​ ដែលលោក ស៊ន តារា វាយប្រហារទៅលើអ្នកដទៃ។

សម្ដេចតេជោ ហ៊ុន សែន បានថ្លែងបែបនេះថា «ស៊ន តារា ក្មួយស្ដាប់ពូឲ្យច្បាស់ វាមិនចម្លែកទេ បើក្មួយប្រមាថឪពុកខ្លួនឯងថា ប៉ាឯងកុំចេះ ខ្ញុំរៀនចេះជាងប៉ាឯង ប្រសិនបើក្មួយប្រើភាសាដូចអ្វីដែលឪពុករបស់ក្មួយឯងនិយាយ ក្មួយខុសធំហើយ»។

សម្ដេចតេជោ ហ៊ុន សែន លើកឡើងថា បើលោក ស៊ន តារា ធ្វើដាក់ឪពុក-ម្ដាយរបស់ខ្លួនបែបនេះហើយ វាមិនចាំបាច់គិតនោះទេ ចំពោះការវាយប្រហារទៅលើអ្នកដទៃ រាប់ទាំងការវាយប្រហារទៅលើព្រះមហាក្សត្រ វាយប្រហារទៅលើនាយករដ្ឋមន្ត្រី ឬកូនប្រុសរបស់សម្ដេច ជាដើម៕