បង្ក្រាបគ្រឿងញៀន ប្រមាណ ៤១គីឡូក្រាម ឃាត់ខ្លួន២នាក់ នៅខេត្តស្ទឹងត្រែង

នគរបាលមន្ទីរប្រឆាំងគ្រឿងញៀន សហការជាមួយកម្លាំងនគរបាលខេត្តស្ទឹងត្រែង ស្រាវជ្រាវបង្ក្រាបបទល្មើសគ្រឿងញៀននៅឃាត់ខ្លួនជនសង្ស័យ ២នាក់ដកហូតថ្នាំញៀនប្រមាណ ៤១គីឡូក្រាម ។

នគរបាលមន្ទីរប្រឆាំងគ្រឿងញៀន ប្រាប់ឱ្យដឹងថា កាលពីវេលាម៉ោង២០ និង១០នាទី យប់ថ្ងៃទី ១៤ ខែមករា ឆ្នាំ២០២១ កម្លាំងជំនាញ (ក៩) នៃមន្ទីរប្រឆាំងបទល្មើសគ្រឿងញៀន ដឹកនាំដោយលោកនាយករង យិន បញ្ញារិទ្ធ សហការជាមួយកម្លាំងជំនាញរបស់ស្នងការដ្ឋាននគរបាល ខេត្តស្ទឹងត្រែង ដោយមានការសម្រប សម្រួលពីលោកព្រះរាជអាជ្ញា ជេត ខេមរា បានបើកការស៊ើបអង្កេត ស្រាវជ្រាវបង្រ្កាបករណីដឹកជញ្ជូន ជួញដូរ គ្រឿងញៀនឆ្លងដែនខុសច្បាប់ នៅចំណុច ស្ពានទី២ (ច្រករបៀង) ស្ថិតក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង (ចម្ងាយប្រមាណជិត ២គ.ម ពីច្រកទ្វារអន្តរជាតិ ត្រពាំងគ្រៀល) ។

ក្នុងប្រតិបត្តិការនេះ សមត្ថកិច្ចឃាត់ខ្លួនជនសង្ស័យ ២នាក់ (ប្រុស) ចាប់យកវត្ថតាង រួមមាន មេតំហ្វេតាមីន (ICE) ចំនួន ៤១ កញ្ទប់ធំ ទម្ងន់ប្រមាណ ៤១គីឡូក្រាម ដែលជនល្មើសទម្លាក់ទុកក្នុងព្រៃ ៕

អត្ថបទ ៖ រ៉ាវុទ្ធ