រាជរដ្ឋាភិបាល មានថវិកាគ្រប់គ្រាន់​ក្នុងការគ្រប់គ្រងវិបត្តិសុខភាព និងសេដ្ឋកិច្ច

សុខភាពដ៏ល្អប្រសើរនៃប្រព័ន្ធហិរញ្ញវត្ថុសាធារណៈកម្ពុជា បានធ្វើឱ្យរាជរដ្ឋាភិបាល មានថវិកាសន្សំគ្រប់​គ្រាន់សម្រាប់ដោះស្រាយបញ្ហាជាយកថាហេតុទាំងឡាយ នាគ្រាកន្លងទៅ ដូចជា ការឆ្លើយតប​ទៅនឹងស្ថាន​ភាពមិនអំណោយផល បង្កឡើងដោយវិបត្តិសេដ្ឋកិច្ច និងហិរញ្ញវត្ថុសកល ក៏ដូចជាគ្រោះមហន្តរាយ និងគ្រោះ​ធម្មជាតិផ្សេងៗ ដែលមិនអាចស្មានទុកជាមុនបាន។ នេះជាការលើកឡើងរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា។

ថ្លែងនៅក្នុងពិធីប្រកាសដាក់ឱ្យអនុវត្តចក្ខុវិស័យ និងយុទ្ធសាស្ត្រ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ នាព្រឹកថ្ងៃទី ២០ មីនា សម្តេច បានលើកឡើងថា រាជរដ្ឋាភិបាលកម្ពុជា មានលទ្ធភាពគ្រប់គ្រាន់​ខាងផ្នែកហិរញ្ញវត្ថុ ក្នុងការគ្រប់គ្រងប្រកបដោយប្រសិទ្ធភាពខ្ពស់ នូវវិបត្តិសុខុមាលភាពសង្គម និងសេដ្ឋកិច្ច ដែលបណ្តាលមកពីការរីករាលដាលជាសកលនៃជំងឺកូវីដ-១៩ រហូតកម្ពុជា ត្រូវបានទទួលស្គាល់ នៅក្នុងកម្រិត​សកលថា ជាប្រទេសគ្រប់គ្រងជំងឺកូវីដបានយ៉ាងល្អ និងជាប្រទេសងើបស្ទុះឡើងវិញពីវិបត្តិនេះ បានយ៉ាងរហ័ស។

សម្តេចបានបន្តថា រិតតែសំខាន់ថែមទៀត ក្នុងបុព្វហេតុឯករាជ្យអធិបតេយ្យជាតិ សមិទ្ធកម្មដ៏ល្អនៃកម្មវិធីកំណែ​ទម្រង់ហិរញ្ញវត្ថុសាធារណៈ បានពង្រឹងឱ្យកាន់តែមាំមួនឡើង នូវភាពជាម្ចាស់ និងតួនាទីរបស់រាជរដ្ឋាភិបាលកម្ពុជា ក្នុងការទទួលខុសត្រូវលើជោគវាសនានៃប្រទេសជាតិ ដែលបានកាត់បន្ថយការពឹងពាក់លើការ​ខ្ចីពីខាងក្រៅប្រទេស។

សម្តេចតេជោ បានសង្កត់ធ្ងន់ថា បច្ចុប្បន្នការខ្ចីពីក្រៅប្រទេសប្រចាំឆ្នាំរបស់កម្ពុជា មានទំហំមិនស្មើ ២០ភាគរយ នៃថវិកាជាតិសរុបនោះទេ។

ទន្ទឹមនឹងនេះ សម្ដេចតេជោ ហ៊ុន សែន បានណែនាំឱ្យបន្តពង្រឹងយន្តការសម្របសម្រួល សង្គតិភាព និងភាពប្រទាក់​ក្រឡាគ្នា រវាងកម្មវិធីកែទម្រង់សំខាន់ៗទាំងឡាយរបស់រាជរដ្ឋាភិបាល ពិសេសកម្មវិធីកែទម្រង់ ៣ បូក ១ ស្របតាម​ឯកសារចក្ខុវិស័យ និងយុទ្ធសាស្រ្ដ ស្ដីពី សុខុមនីយកម្ម ការកែទម្រង់ ៣ បូក ១ នៃរាជរដ្ឋាភិបាល ដែលសម្រេច​ឲ្យដាក់អនុវត្ត កាលពីពេលថ្មីៗកន្លងទៅនេះ។ ​

បើតាមសម្តេចតេជោ ការអភិបាលកិច្ចល្អ ត្រូវការសមាសធាតុសំខាន់ចំនួន ៤ ដែលជាកម្មវិធីនៃការកែទម្រង់ ៣ បូក ១ ក្នុងនោះ រួមមាន៖ ទី១. ការគ្រប់គ្រងធនធានហិរញ្ញវត្ថុប្រកបដោយប្រសិទ្ធ​ភាព និងស័ក្ដិសិទ្ធិភាព, ទី២. ធនធានមនុស្ស និងស្ថាប័នសាធារណៈប្រកបដោយគុណភាព ភាពស្អាតស្អំ និងសមត្ថភាព, ទី៣. ការកំណត់បែងចែងមុខងារច្បាស់​លាស់ ការធ្វើប្រតិភូកម្ម​ត្រឹមត្រូវ និងសម្របសម្រួលអនុវត្តមុខងារប្រកបដោយប្រសិទ្ធភាព, និង៤. ប្រព័ន្ធច្បាប់ និងយុត្តិធម៌ប្រកបដោយប្រសិទ្ធភាព៕