ព័ត៌មានជាតិ

អភិបាលរាជធានី ជំរុញមន្ទីរ អាជ្ញាធរ និងកងកម្លាំង ត្រៀមអបអរសាទរបុណ្យចូលឆ្នាំថ្មី

បានផុស

១ year មុន

នៅ

ថ្ងៃចន្ទ ២០ មីនា ២០២៣

ដោយ

ភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានជំរុញអោយមន្ទីរពាក់ព័ន្ធ អាជ្ញាធរខណ្ឌទាំ១៤ និងកម្លាំងមានសមត្ថកិច្ចទាំងអស់ត្រៀមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ និងត្រៀមពិធី ទទួលគោរមងារអ្នកសង្គ្រោះសាសនាពិភពលោកនៅថ្ងៃទី០៤ ឧសភា ឆ្នាំ២០២៣ខាងមុខ ដោយត្រូវជួសជុលកែលំអរមណីយដ្ឋានប្រវត្តិសាស្ត្រវត្តភ្នំ ជាមួយនិងការរៀបចំសណ្ដាប់ធ្នាប់ របៀបរៀបរយ អនាម័យ បរិស្ថាន ការតុបតែង កែលម្អសោភណភាពទីតាំងនេះអោយបានល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញបែបនេះបានធ្វើឡើងនារសៀលថ្ងៃទី២០ មីនា ឆ្នាំ២០២៣នេះ ក្នុងខណ្ឌប្រជុំជាមួយអភិបាលខណ្ឌទាំ១៤ មន្ទីរពាក់ព័ន្ធនិងកម្លាំងមានសមត្ថកិច្ចទាំងប៉ូលិសនិងកងរាជអាវុធហត្ថ នៅសាលារាជធានីភ្នំពេញ។

លោក ឃួង ស្រេង បានមានប្រសាសន៍លើកឡើងថា សម្រាប់រមណីយដ្ឋានប្រវត្តិសាស្ត្រវត្តភ្នំ មន្ទីរសាធារណការនិងដឹកជញ្ជូនរាជធានីភ្នំពេញ ជាអ្នកទទួលការជួសជុល តុបតែង កែលម្អសោភណភាព ជាមួយនិងការគិតគូរពីការរៀបចំសណ្ដាប់ធ្នាប់ របៀបរៀបរយ អនាម័យ បរិស្ថានផងដែរ ដើម្បីត្រៀមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំថោះ បញ្ចស័ក ពុទ្ធសករាជ ២៥៦៧ ថ្ងៃសុក្រ ៩ រោចរនោច ខែចេត្រ ត្រូវនឹងថ្ងៃទី ១៤ ខែមេសា គ្រិស្តសករាជ ២០២៣ វេលាម៉ោង ១៦ និង ០០ នាទីរសៀល និងត្រៀមពិធី ទទួលគោរមងារអ្នកសង្គ្រោះសាសនាពិភពលោកនៅថ្ងៃទី០៤ ឧសភា ឆ្នាំ២០២៣ខាងមុខ ខណៈអ្នកដែលត្រូវទទួលបានគោរមងារអ្នកសង្គ្រោះសាសនាពិភពលោក មានចំនួន៣ព្រះអង្គ/នាក់ ក្នុងនោះមាន សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងនាយឧត្ដមសេនីយ៍បណ្ឌិត ហ៊ុន ម៉ាណែត។

បន្ថែមពីនេះ លោកឃួង ស្រេង បានជំរុញអោយមានការពង្រឹងសន្តិសុខ សុវត្ថិភាព អោយបានខ្លាំងក្លាផងដែរ មិនថានៅទីតាំងរមណីយដ្ឋានប្រវត្តិសាស្ត្រវត្តភ្នំ និងនៅតាមមូលដ្ឋានខណ្ឌទាំង១៤នោះទេ ព្រោះថា នៅពេលបុណ្យចូលឆ្នាំថ្មីប្រពៃណីខ្មែរនេះ ពួកគាត់ភាគច្រើន ត្រូវចាក់សោរផ្ទះចោល ដើម្បីទៅដើរលេងកំសាន្ត ឬ ទៅលេងស្រុកកំណើត ។ដូច្នេះ ក្នុងនាមអាជ្ញាធរនិងកងកម្លាំងជាអ្នកមើលខុសត្រូវផ្ទះសំបែងរបស់ពួកគាត់ កុំមានអំពើចោរកម្មកើតឡើង៕

ដោយ ៖ ស្រីរ័ត្ន