លោក ស សុខា ៖ តម្លៃសារព័ត៌មាន គឺការផ្សព្វផ្សាយព័ត៌មានពិត ប្រកបដោយវិជ្ជាជីវៈ

លោក ស សុខា ប្រធានកិត្តិយសសមាគមសម្ព័ន្ធសារព័ត៌មានឯករាជ្យ បានថ្លែងថា គុណតម្លៃនៃសារព័ត៌មាន គឺជាការផ្សព្វផ្សាយព័ត៌មានពិត ប្រកបដោយក្រមសីលធម៌វិជ្ជាជីវៈ។ លោក ស សុខា ថ្លែងបែបនេះក្នុងឱកាសបើកសន្និបាតបូកសរុបលទ្ធផលការងារឆ្នាំ ២០២២ និងលើកទិសដៅឆ្នាំ ២០២៣ របស់សមាគមសម្ព័ន្ធសារព័ត៌មានឯករាជ្យ នៅថ្ងៃទី ២៤ ខែមីនានេះ។

លោក ស សុខា លើកឡើងថា ការផ្សព្វផ្សាយព័ត៌មានមិនពិត ឬព័ត៌មានក្លែងក្លាយនឹងអាចធ្វើឲ្យមានការសម្រេចចិត្តខុសលើកិច្ចការណាមួយ។ លោកបន្តថា បើព័ត៌មានក្លែងក្លាយនោះ មានចរិតនយោបាយ ញុះញង់ បំបែកបំបាក់ថែមទៀត នោះនឹងកាន់តែប្រឈមនឹងហានិភ័យសង្គមខ្ពស់ ដែលបង្កជាភាពចលាចល ភាពវឹកវរក្នុងប្រទេស និងអាចឈានទៅកើតមានសង្គ្រាមក៏ថាបាន។

ហេតុដូច្នេះហើយ សន្និបាតរបស់សមាគមសម្ព័ន្ធសារព័ត៌មានឯករាជ្យ នៅថ្ងៃនេះ បានរៀបចំធ្វើឡើងក្រោមប្រធានបទ៖ «រួមគ្នាផ្សព្វផ្សាយព័ត៌មានពិត កុំប្រឌិតព័ត៌មានក្លែងក្លាយ ដើម្បីសង្គម និងមនុស្សជាតិទាំងមូល»។ តាមរយៈប្រធានបទនេះ លោក ស សុខា បញ្ជាក់ថា គឺបានឆ្លុះបញ្ចាំងពីឆន្ទៈរបស់ថ្នាក់ដឹកនាំ ក៏ដូចជាសមាជិក-សមាជិកានៃសមាគម ក្នុងការចូលរួមចំណែកជាមួយរាជរដ្ឋាភិបាល ក្នុងការបង្ក្រាបព័ត៌មានក្លែងក្លាយឲ្យមានប្រសិទ្ធភាព និងបានទាន់ពេលវេលា។

លើសពីនេះ លោក ស សុខា ក៏បានចាប់អារម្មណ៍ និងកត់សម្គាល់ឃើញពីលក្ខណៈពិសេសរបស់សមាគមសម្ព័ន្ធសារព័ត៌មានឯករាជ្យ ដែលជាសមាគមសារព័ត៌មានក្នុងគោលបំណង និងបេសកកម្មមិនផ្ដោតតែទៅលើវិស័យសារព័ត៌មានតែប៉ុណ្ណោះទេ។ ផ្ទុយទៅវិញ សមាគមសម្ព័ន្ធសារព័ត៌មានឯករាជ្យ គឺបាននិងកំពុងចូលរួមសកម្មភាពមួយចំនួនទៀតដូចជា៖ ការងារសង្គម មនុស្សធម៌ អប់រំ កីឡា សិល្បៈ វប្បធម៌ ចរាចរណ៍ គ្រឿងញៀន និងរអភិវឌ្ឍធនធានមនុស្ស ជាដើម។

ក្នុងនាមជាប្រធានកិត្តិយសសមាគមសម្ព័ន្ធសារព័ត៌មានឯករាជ្យ លោក ស សុខា ក៏បានថ្លែងអំណរគុណចំពោះអង្គការ-សមាគមក្រៅរដ្ឋាភិបាល ក្រុមហ៊ុនជាដៃគូរបស់សមាគមសម្ព័ន្ធសារព័ត៌មានឯករាជ្យទាំងអស់ ដែលបានចូលរួមឧបត្ថម្ភគាំទ្រសកម្មភាពនានារបស់សមាគម នាពេលកន្លងមក ផងដែរ៕

ដោយ៖ ធឿន វ៉ាន់សុង