មន្រ្តី៖ សុខភាពលោក ខៀវ សំផន ក្នុងពន្ធនាគារ គឺល្អប្រសើរ

ក្រុម​ការងារ​នៃគណៈកម្មាធិការសិទ្ធិមនុស្សកម្ពុជា (CHRC) នៅថ្ងៃទី២៤ ខែមីនា ឆ្នាំ២០២៣ បានចុះទៅមើលស្ថានភាពសុខភាព លោក ខៀវ សំផន​ ដែលជាមេដឹកនាំខ្មែរក្រហមម្នាក់ដែលកំពុងឃុំខ្លួននៅក្នុងពន្ធនាគារខេត្តកណ្តាល។ ក្រុមការងារនេះ បានបញ្ជាក់ថា សុខភាពរបស់លោក ខៀវ សំផន នៅតែមានស្ថានភាពល្អប្រសើរ។

គណៈកម្មាធិការសិទ្ធិមនុស្សកម្ពុជា (CHRC) បានបង្ហាញឲ្យដឹងនៅលើគេហទំព័ររបស់ខ្លួនកាលពីថ្ងៃទី២៦ ខែមីនា ឆ្នាំ២០២៣ថា ក្នុងបេសកកម្មចុះពិនិត្យស្ថានភាពសិទ្ធិមនុស្សនៅពន្ធនាគារ ខេត្តកណ្ដាលនេះ អ្នកមើលថែទាំលោក ខៀវ សំផន បានប្រាប់ថា ពីមួយថ្ងៃៗរូបលោកពិសារបាយបានច្រើន ព្រមទាំងអាចរុញរទេះដើរបានតិចៗដោយខ្លួនឯង។

ការចុះពិនិត្យស្ថានភាពសិទ្ធិមនុស្សនៅពន្ធនាគារខេត្តកណ្ដាលនេះ ធ្វើឡើងតាមការចាត់តាំងរបស់លោក កែវ​ រ៉េមី​ រដ្ឋមន្រ្តី​ប្រតិភូអមនាយករដ្ឋមន្រ្តី និង​ជាប្រធានគណៈកម្មាធិការសិទ្ធិមនុស្សកម្ពុជា។ ការចុះ​ពិនិត្យ​ស្ថានភាព​សិទ្ធិ​មនុស្ស​តាមពន្ធនាគារ​នៅទូទាំងប្រទេសកម្ពុជា​ គឺជាបេសកកម្មសំខាន់មួយក្នុងចំណោមបេសកកម្មដ៏ទៃទៀតរបស់គណៈកម្មាធិការសិទ្ធិមនុស្សកម្ពុជា ក្នុងការ​ការពារ​ និងលើកកម្ពស់សិទ្ធិមនុស្ស។ ឆ្លៀតក្នុងឱកាសនេះ លោក កែវ​ រ៉េមី ក៏បានផ្តល់អំណោយតាមរយៈក្រុមការងារជាឱសថចំនួន៨មុខ សម្រាប់ប្រើប្រាស់ក្នុងពន្ធនាគារផងដែរ។

លោក ខៀវ សំផន គឺជាមេដឹកនាំកំពូលមួយរូបនៅក្នុងរបបកម្ពុជាប្រជាធិបតេយ្យ ឆ្នាំ១៩៧៥-១៩៧៩។ ក្រោយរបបនេះដួលរលំ រូបលោកត្រូវបានសាលាក្តីខ្មែរក្រហម ចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ការរំលោភបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩ ឧក្រិដ្ឋកម្មប្រល័យពូជសាសន៍ មនុស្សឃាត ការធ្វើទារុណកម្ម និងការធ្វើទុក្ខបុកម្នេញខាងផ្នែកសាសនា ដែលមានចែងក្នុងក្រមព្រហ្មទណ្ឌឆ្នាំ១៩៥៦។

នៅឆ្នាំ២០២២ លោក ខៀវ សំផន ត្រូវបានអង្គជំនុំជម្រះតុលាការកំពូលនៃសាលាក្ដីខ្មែរក្រហមសម្រេចកាត់ទោសឱ្យជាប់​ពន្ធនាគារ​អស់មួយ​ជីវិតក្រោយពីដំណើរការក្តីអស់រយៈពេល ១៥ឆ្នាំ និងត្រូវផ្ទេរចេញទៅកាន់ពន្ធនាគារខេត្តកណ្តាលដើម្បីបន្ត​អនុវត្ត​ទោស​។ ការឃុំខ្លួនលោក ខៀវ សំផន ត្រូវបានធានាឱ្យមានលក្ខណៈ​សមរម្យសម្រាប់បុគ្គលជាមនុស្សចាស់ជរា ពិបាកចល័តទី និងមានបញ្ហាសុខភាព៕