ព័ត៌មានជាតិ

តំបន់ដីខ្មែរស្រែថៃជាង ២០០ ហិកតានៅអូរបីជាន់ គ្រោងបង្កើតជាច្រកតំបន់ជាមួយថៃ

បានផុស

៣ years មុន

នៅ

ថ្ងៃអង្គារ ២៨ មីនា ២០២៣

ដោយ

ពាក់ព័ន្ធទៅតំបន់ដីខ្មែរស្រែថៃ នៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យបានលើកឡើងថា ដីនៅតំបន់នោះកំពុងទទួលការវិនិយោគ និងថ្ងៃខាងមុខគ្រោងអភិវឌ្ឍប្រែក្លាយជាច្រកទ្វារតំបន់ជាមួយថៃថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និសីទសារព័ត៌មានជោគជ័យរយៈពេល ៥ ឆ្នាំ របស់រដ្ឋបាលខេត្តបន្ទាយមានជ័យនៅព្រឹកនៅថ្ងៃទី ២៨ ខែមីនា ឆ្នាំ២០២៣ នេះ ឆ្លើយតបសំណួររបស់សារព័ត៌មាន«កម្ពុជាថ្មី» លោក អ៊ុំ រាត្រី បានឲ្យដឹងថា តំបន់ដែលពលរដ្ឋច្រើនហៅថា «ដីខ្មែរ ស្រែថៃ មានភូមិសាស្រ្តស្ថិតនៅក្នុងបង្គោលឡាក់លេខ ៤៣ នៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ»។ ដីនៅតំបន់នោះមានទំហំជាង ២០០ហិតា ត្រូវបានអ្នកវិនិយោគខ្មែរទិញយកស្ទើរទាំងអស់ នៅសល់តិចតួចប៉ុណ្ណោះ។

យ៉ាងណាមិញ លោកអភិបាលខេត្តបញ្ជាក់ថា «ទោះបីស្ថិតនៅក្រោមការគ្រប់គ្រងរបស់អាជ្ញាធរខ្មែរ តែជាគោលការណ៍សម្ដេចតេជោ ហ៊ុន សែន បានផ្ដល់ឱកាសឱ្យពលរដ្ឋថៃបន្តធ្វើស្រែចម្ការនៅលើផ្ទៃដីនោះនៅឡើយ ប៉ុន្តែត្រូវសុំការអនុញ្ញាតទើបមានសិទ្ធិធ្វើស្រែចម្ការបាន»។

បន្ថែមពីនេះ លោក អ៊ុំ រាត្រី បានគូសបញ្ជាក់បន្ថែមថា បច្ចុប្បន្នអាជ្ញាធរខេត្តបានដាក់គោលការណ៍ស្នើសុំទៅកាន់ក្រសួងមហាផ្ទៃ ដើម្បីរៀបចំកែសម្រួលបើកជាច្រកតំបន់ជាមួយប្រទេសថៃនៅពេលខាងមុខ។

ដោយ៖ ថារី