កិច្ចប្រជុំពិនិត្យវឌ្ឍនភាពត្រីមាសទី១ គម្រោងអភិវឌ្ឍន៍វិស័យអប់រំមធ្យមសិក្សា ទុតិយភូមិទី២

ក្រសួងអប់រំ យុវជន និងកីឡា បានរៀបចំកិច្ចប្រជុំពិនិត្យវឌ្ឍនភាពត្រីមាសទី១ ឆ្នាំ២០២៣ របស់គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ (USESDP-II) ក្រោមអធិបតីភាព បណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា និងជានាយកគម្រោង ព្រមទាំងមានការចូលរួមពីថ្នាក់ដឹកនាំ គ្រប់គ្រងគម្រោង មន្ត្រីសម្របសម្រួល ទីប្រឹក្សាគម្រោងសរុប ៤៣រូប។

កិច្ចប្រជុំនេះមានគោលបំណង ពិនិត្យមើលវឌ្ឍនភាពរួមនៃការអនុវត្តគម្រោងគិតត្រឹមត្រីមាសទី១ ឆ្នាំ២០២៣ វឌ្ឍនភាពតាមសមាសភាគ និងផ្នែកជំនាញ ព្រមទាំងការពិភាក្សាអំពីការរៀបចំផែនការចុះគាំទ្រសាលារៀន ក្នុងការអនុវត្តការគ្រប់គ្រងតាមសាលារៀន (SBM)។

គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ បានការគាំទ្រហេដ្ឋារចនាសម្ព័ន្ធ សង្ហារិម សម្ភារ និងថវិកាសម្រាប់ការបណ្ដុះបណ្ដាលស្ទែម (STEM) បណ្ណាល័យពិសោធន៍វិទ្យាសាស្ត្រដល់សាលាមធ្យមសិក្សាធនធានគោលដៅទាំង៥០។ ផែនការបន្ទាប់គឺការចុះអនុវត្តការគ្រប់គ្រងតាមសាលារៀន ដែលបានរៀបចំយន្តការរួចរាល់។

កិច្ចប្រជុំបានពិភាក្សាដោះស្រាយបញ្ហានានា និងសម្រេចអំពីទិសដៅក្នុងការអនុវត្តក្នុងត្រីមាសបន្ទាប់ ក៏ដូចជាការត្រៀមលក្ខណៈក្នុងការចុះបេសកកម្មគាំទ្ររួមគ្នារវាងក្រសួងអប់រំ យុវជន និងកីឡា និងធនាគារអភិវឌ្ឍន៍អាស៊ី នៅដំណាច់ខែមេសា ឆ្នាំ២០២៣ ខាងមុខ។

គួរបញ្ជាក់ថា គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២មានការគាំទ្រផ្ដោតសំខាន់ដល់ វិទ្យាស្ថានជាតិអប់រំ សាលាមធ្យមសិក្សាធនធានទាំង៥០ និងវិទ្យាល័យបណ្ដាញ ៨៧៕