ក្រសួងហាមលេងជះទឹក និងប៉ាតម្សៅតាមសាលារៀន ដើម្បីសុវត្ថិភាព

ក្រសួងអប់រំ យុវជន និងកីឡា បានធ្វើការហាមដាច់ខាតការលេងបាញ់ទឹក ជះទឹក គប់ស្បោងទឹក ប៉ាតម្ស៉ៅនៅតាមសាលារៀនរដ្ឋ និងឯកជនក្នុងអំឡុងពេលចូលឆ្នាំប្រពៃណីជាតិព្រោះល្បែងទាំងនេះនឹងធ្វើឱ្យប៉ះពាល់ដល់ភាពថ្លៃថ្នូរបស់ជាតិ និងមិនស័ក្តសមជាកុលបុត្រកុលធីតាខ្មែរទេ។

លោក ហង់ជួន ណារ៉ុន រដ្ឋមន្ត្រីក្រសួងអប់រំបានណែនាំថា សិស្សានុសិស្សមួយចំនួននៅតាមគ្រឹះស្ថានមធ្យមសិក្សាបានកំពុងលេងល្បែងដែលមិនមែនជាល្បែងប្រជាប្រិយខ្មែររួមមានលេងបាញ់ទឹក ជះទឹក គប់ស្បោងទឹក ប៉ាតម្ស៉ៅទៅលើគ្នាទៅវិញទៅមកដោយគ្មានសណ្ដាប់ធ្នាប់គ្មានរបៀបរៀបរយគ្មានភាពថ្លៃថ្នូរព្រមទាំងគ្មានសុវត្ថិភាព។

លោករដ្ឋមន្ត្រីបានបន្តថា ដើម្បីទប់ស្កាត់ និងចៀសវាងបាតុភាពកើតឡើងជាយថាហេតុព្រមទាំងធានាបាននូវភាពថ្លៃថ្នូរព្រមទាំងសុវត្ថិភាពដល់សិស្សានុសិស្សក្រសួងអប់រំយុវជន និងកីឡាសូមណែនាំដល់ស្ថានមធ្យមសិក្សាត្រូវហាមឃាត់ជាដាច់ខាតនិងទប់ស្កាត់ជាបន្ទាន់រាល់ល្បែងទាំងឡាយណាដែលមិនមែនជាល្បែងឬរបាំប្រជាប្រិយខ្មែរនិងល្បែងមួយចំនួនដែលប្រឈមនឹងហានិភ័យអសុវត្តិភាពនឹងបង្កឱ្យមានគ្រោះថ្នាក់ដូចជាលេងបាញ់ទឹក ជះទឹក គក់ស្បោងទឹក លាបម្ស៉ៅដែលធ្វើឱ្យប៉ះពាល់ដល់ភាពថ្លៃថ្នូរដ៏ផូរផង់របស់ជាតិនិងមិនស័ក្តសមជាកុលបុត្រកុលធីតាខ្មែរឡើយ។

លោករដ្ឋមន្ត្រីបានណែនាំដល់គណៈគ្រប់គ្រងលោកគ្រូអ្នកគ្រូ និងក្រុមប្រឹក្សាកុមារក្រុមប្រឹក្សាយុវជនត្រូវរៀបចំបែងចែកការទទួលខុសត្រូវតាមថ្ងៃតាមវេនដើម្បីជួយសម្របសម្រួលឱ្យសិស្សបានចូលរួមលេងល្បែងប្រជាប្រិយខ្មែរប្រកបដោយភាពសប្បាយរីករាយនិងមានសុវត្ថិភាព។

ត្រូវយកចិត្តទុកដាក់ក្នុងការថែរក្សាសុខភាពនិងអនាម័យចៀសវាងការឆ្លងជំងឺរាតត្បាតផ្សេង និងត្រូវសហការជិតស្និតជាមួយមាតាបិតាឬអ្នកអាណាព្យាបាលសិស្សសហគមន៍អាជ្ញាធរដែនដីដើម្បីផ្ដល់ និងទទួលព័ត៌មានពាក់ព័ន្ធនឹងសកម្មភាពអវិជ្ជមានផ្សេងៗដែលប្រព្រឹត្តដោយសិស្សានុសិស្សដើម្បីផ្ដល់ការអប់រំណែនាំ និងកែលម្អឲ្យបានទាន់ពេលវេលា៕

អត្ថបទ៖ សំអឿន