គណបក្សប្រជាជនកម្ពុជាស្រុកស្ទោងប្រកាសបញ្ចូលសមាជិកថ្មីចំនួន ៨១០ នាក់

គណបក្សប្រជាជនកម្ពុជាស្រុកស្ទោងខេត្តកំពង់ធំបានប្រកាសបញ្ចូលសមាជិកថ្មីចំនួន ៨១០ នាក់ធ្វើឲ្យកម្លាំងគណបក្សប្រជាជនកម្ពុជាកាន់តែមានកម្លាំងខ្លាំងក្លាថែមទៀតនៅក្នុងការបំពេញភារកិច្ចបម្រើជាតិ ប្រជាជន និងការអភិវឌ្ឍប្រទេស។

នៅក្នុងពិធីប្រកាសបញ្ចូលសមាជិកថ្មីចំនួន ៨១០ នាក់ជាសមាជិកគណបក្សប្រជាជនកម្ពុជាស្រុកស្ទោងនៅថ្ងៃទី ២២ ខែមេសាឆ្នាំ២០២៣ លោក ថា យ៉ាវ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារ​គណបក្សចុះមូលដ្ឋានស្រុកស្ទោងបានស្វាគមន៍ចំពោះសមាជិកថ្មីចំនួន ៨១០ នាក់ និងបានចាត់ទុកការចូលមករួមរស់ជីវភាពនយោបាយរបស់បងប្អូនទាំង ៨១០ នាក់ ជាមួយគណបក្សប្រជាជនកម្ពុជានាពេលនេះថា ជាការសម្រេចចិត្តដ៏ត្រឹមត្រូវបំផុត ព្រោះបច្ចុប្បន្ននេះមិនមានគណបក្សនយោបាយណាមួយដែលមាន គោលនយោបាយច្បាស់លាស់ក្នុងការដឹកនាំប្រទេសជាតិដូចគណបក្សប្រជាជនកម្ពុជាឡើយ។

ជាងនេះទៀតការចូលរួមរស់ជីវភាពជាមួយគណបក្សប្រជាជននាពេលនេះគឺជាការបង្ហាញឲ្យឃើញយ៉ាងច្បាស់ពីការជឿជាក់និង ការគាំទ្រចំពោះការដឹកនាំដ៏ត្រឹមត្រូវរបស់គណបក្សប្រជាជនកម្ពុជាក៏ដូចជាធ្វើឲ្យកម្លាំងគណបក្សប្រជាជនកម្ពុជាកាន់តែមានកម្លាំងខ្លាំងក្លាថែមទៀតនៅក្នុងការបំពេញភារកិច្ចបម្រើជាតិ ប្រជាជននិងការអភិវឌ្ឍប្រទេស។

លោកបានបន្តថា គណបក្សប្រជាជនកម្ពុជាទទួលស្វាគមន៍គ្រប់ពេលវេលាហើយក៏មិនប្រកាន់ពីនិន្នាការអ្វីទាំងអស់ចំពោះបងប្អូនណាដែលស្ម័គ្រចិត្តដោយស្មោះចូលមករស់ជាមួយគណបក្សប្រជាជនកម្ពុជា។

លោកបានបន្តទៀតថាថ្នាក់ដឹកនាំគណបក្សប្រជាជនកម្ពុជាពិសេស សម្ដេចតេជោ ហ៊ុន សែន ប្រធានគណបក្សសម្ដេចលោកតែងតែរស់នៅរួមសុខរួមទុក្ខជាមួយប្រជាជនកម្ពុជាគ្រប់ពេលវេលា និងគ្រប់កាលៈទេសៈទាំងអស់។ មិនតែប៉ុណ្ណោះនៅពេលប្រជាជនមានការលំបាកគណបក្សប្រជាជនកម្ពុជា មិនដែលបោះបង់ឬរត់ចោលប្រជាជនយើងនោះឡើយ។ពោលថ្នាក់ដឹកនាំគ្រប់លំដាប់ថ្នាក់តែងតែនៅរួមសុខរួមទុក្ខ និងហែលឆ្លងការលំបាកជាមួយប្រជាជនកម្ពុជាជានិច្ច ហើយក៏នៅតែបន្តរួមដំណើរដ៏វែងឆ្ងាយតទៅមុខទៀត ជាមួយគ្នាជាបន្តទៀតដើម្បីភាពសុខសាន្តរបស់ប្រជាពលរដ្ឋ និង ការនាំមកនូវការអភិវឌ្ឍសម្រាប់ជាតិមាតុភូមិ។

លោក ថា យ៉ាវ បានបន្ថែមទៀតថាក្នុងរយៈពេល ៥ឆ្នាំចុងក្រោយនេះ ប្រទេសជាតិក្រោមការដឹកនាំដោយគណបក្សប្រជាជនកម្ពុជាប្រជាជនកម្ពុជានៅទូទាំងប្រទេសបានរស់នៅក្នុងសុខសន្តិភាព ហើយប្រទេសជាតិវិញក៏មានស្ថិរភាពនយោបាយល្អ ក្នុងនោះថែមទាំងថែរក្សាយ៉ាងរឹងមាំនូវលទ្ធិប្រជាធិបតេយ្យហើយក៏កំពុងបន្តចាក់ឫសកាន់តែជ្រៅក្នុងសង្គមជាតិ៕

អត្ថបទ៖ សំអឿន