លោកស្រី ម៉ីសន សុធារី ប្រាប់ពីរឿង៣យ៉ាង ដែលអ្នកកាសែតមិនត្រូវធ្វើដាច់ខាតពេលសរសេរព័ត៌មាន

លោកស្រី ម៉ីសន សុធារី អ្នកសារព័ត៌មានជើងចាស់នៅកម្ពុជា បានប្រាប់ពីរឿង៣យ៉ាង ដែលអ្នកសារព័ត៌មានមិនត្រូវធ្វើដាច់ខាតកំឡុងពេលសរសេរអត្ថបទព័ត៌មាន នោះគឺ មិនសរសេរនៅពេលមានអារម្មណ៍ខឹង រំភើប ហើយអ្នកសារព័ត៌មាន គឺមិនត្រូវមានមនោសញ្ចេតនាឡើយ។

នៅក្នុងវេទិកាជជែកពិភាក្សាពិសេសរបស់កម្ពុជាថ្មីនាព្រឹកថ្ងៃពុធនេះ លោកស្រី ម៉ីសន សុធារី បានលើកឡើងថា រឿងទី១ គឺអ្នកសារព័ត៌មានមិនសរសេរនៅពេលដែលខឹង ស្អប់ ឬ ខ្នាញ់លើនរណាម្នាក់ទេ។ ពេលអ្នកកាសែតមានអារម្មណ៍បែបនេះ គួរតែធ្វើសកម្មភាពផ្សេងៗដូចជា ទទួលទានទឹក ឬ ទៅសម្រាកពីការងារសិន។ ទី២ អ្នកកាសែត ក៏មិនសរសេរនៅពេលមានអារម្មណ៍ថា ស្រឡាញ់ខ្លាំង រំភើបពេក ដែលធ្វើឱ្យអត្ថបទព័ត៌មាននោះមានភាពលំអៀង ឬបម្រើជាប្រយោជន៍ដល់បុគ្គលណាម្នាក់។ រឿងទី៣ គឺអ្នកសារព័ត៌មាន មិនត្រូវមានមនោសញ្ចេតនាឡើយ ទោះបីមានសាច់ញាតិសុំឱ្យដកអត្ថបទ ឬប្តូរដាក់អត្ថបទថ្មី ក៏អ្នកសារព័ត៌មាន មិនអាចធ្វើជាដាច់ខាត ។

លោកស្រី ម៉ីសន សុធារី មានប្រសាសន៍ថា៖ “មនុស្សបែបនេះ គេហៅថាធនធានមនុស្ស ជាកំពូលមនុស្សដែលជ្រោងវិជ្ជាជីវៈ នៃប្រជាជាតិមួយឱ្យអណ្តែតឡើង ហើយដូចគ្នានេះដែរ មនុស្សដែលអត់មានសក្តានុពលទាំងអស់នេះ គាត់ជាអ្នកធ្វើឱ្យវិជ្ជាជីវៈអាជីពមួយនោះ ធ្លាក់ដល់ចំណុចសូន្យ”។

ស្ត្រីដែលជាអ្នកសារព័ត៌មានជើងចាស់រូបនេះ បានសង្កត់ធ្ងន់ថា តួនាទីរបស់អ្នកសាព័ត៌មានក្នុងការកសាងសន្តិភាព គឺរំពឹងតែមួយគត់ នោះ គឺធនធានមនុស្ស។ ធនធានមនុស្ស ជាធនធានទី១ ដែលសំខាន់បំផុត ព្រោះបើគ្មានធនធានមនុស្សល្អទេ ធនធានដទៃទៀត ក៏មិនអាចដើរបានឡើយ។

ជាមួយគ្នានេះ លោកស្រី ក៏ស្នើសុំដល់មហាជនគ្រប់រូបដែលដើរតួនាទីជាអ្នកអានព័ត៌មាន ហើយចោទប្រកាន់អ្នកសារព័ត៌មានមិនមានវិជ្ជាជីវៈ គួរសួរសំណួរមួយសម្រាប់ខ្លួនឯងជាមុនសិន គឺសួរថា តើអ្នកកាសែតធ្វើឱ្យមហាជនមិនពេញចិត្ត ព្រោះខុសពីការចង់បានរបស់មហាជន ឬ ខុសពីការពិត? លោកស្រី ម៉ីសន សុធារី បន្ថែមថា បើមិនចង់បាត់បង់ព័ត៌មានដែលជាការពិតទេ មហាជនគួរកុំឱ្យអ្នកសារព័ត៌មានសរសេរពីអ្វីដែលផ្គាប់ចិត្តរបស់ខ្លួន ហើយកុំដោយសារតែព័ត៌មាននោះមិនត្រូវចិត្តខ្លួន ទៅនិយាយថាអ្នកកាសែត ឬ ស្ថាប័ននោះ ខុសពីវិជ្ជាជីវៈសារព័ត៌មាន៕