លោកជំទាវ ហ៊ុន ម៉ាណា កោតសរសើរចំពោះការតស៊ូរបស់កីឡាការិនី ប៊ូ សំណាង សម្រាប់វិស័យកីឡា

នៅរសៀលថ្ងៃទី ១០ ខែឧសភា ឆ្នាំ ២០២៣នេះ លោកជំទាវ ហ៊ុន ម៉ាណា​​ បានសម្តែងការកោតសរសើរ និងលើកទឹកចិត្តចំពោះកីឡាការិនីកម្ពុជា ប៊ូ សំណាង ដែលមានភាពតស៊ូនៅក្នុងវិស័យកីឡា។

បើយោងតាមខ្លឹមសារ ដែលបានបង្ហោះនៅលើបណ្តាញសង្គមហ្វេសប៊ុកផ្លូវការ លោកជំទាវ ហ៊ុន ម៉ាណា​​ បានសរសេថា «កោតសរសើរទឹកចិត្តកីឡាការិនីកម្ពុជា ប្អូនស្រី ប៊ូ សំណាង ដែលប្អូនពិតជាមានភាពតស៊ូណាស់សម្រាប់វិស័យកីឡា។ អរគុណចំពោះការលះបង់សំរាប់កម្ពុជា ទោះជាប្អូនមិនដណ្តើមបានជ័យជំនះជូនកម្ពុជា តែប្អូនបានឆក់យកបេះដូងប្រជាជនកម្ពុជារាប់លាននាក់ ឲ្យស្រក់ទឹកភ្នែកតាម»។

ប៊ូ សំណាង ជាកីឡាការិនីមួយរូប ដែលទទួលបានការចាប់អារម្មណ៍យ៉ាងខ្លាំងពីមហាជន អ្នកសារព័ត៌មានជាតិ និងអន្តរជាតិ ក្នុងអំឡុងពេលប្រកួតកីឡាស៊ីហ្គេមលើកទី ៣២ ឆ្នាំ ២០២៣ លើវិញ្ញាសារត់ចម្ងាយ ៥,០០០ម៉ែត្រ នៅពហុកីឡដ្ឋានជាតិមរតកតេជោ កាលពីថ្ងៃទី ៨ ខែឧសភា ឆ្នាំ ២០២៣ ក្រោមដំណក់ទឹកភ្លៀងយ៉ាងជោគជាំ បើទោះបីជាកីឡាការិនីរូបនេះមិនទទួលបានលទ្ធផលល្អ ប៉ុន្តែ ប៊ូ សំណាង បានតស៊ូពុះពាររត់ដល់ទី ដោយមិនបោះបង់ការប្រកួតឡើយ។

ទន្ទឹមនឹងនោះសម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានឧបត្ថម្ភថវិកា ១ម៉ឺដុល្លារដល់កីឡាការិនី ប៊ូ សំណាង ព្រមទាំងរដ្ឋមន្ត្រីក្រសួងព័ត៌មាន និងសប្បុរសជនជាច្រើនរូប ក៏បានផ្តល់ថវិកាលើកទឹកចិត្តដល់កីឡាការិនីរូបនេះផងដែរ៕