កីឡាករកម្ពុជារកបានមេដាយមាស ប្រាក់ និងសំរិទ្ធ ៦គ្រឿង ក្នុងការប្រកួតទូកនៅខេត្តកំពត

ព្រឹត្តិការណ៍ស៊ីហ្គេមលើកទី៣២ ឆ្នាំ២០២៣នៅខេត្តកំពត នាថ្ងៃទី១៤ ខែឧសភា ឆ្នាំ២០២៣ ការប្រកួតកីឡាទូកនាគ និងទូកផ្កាចារ៍ដែលមានក្រុមកីឡាករបានមកចូលរួមមានចំនួន៩ ប្រទេស(អវត្តមានឡាវ)បានបញ្ចប់លើវិញ្ញាសារចំនួន៤ក្នុងរយៈចម្ងាយ៥០០ម៉ែត្រ។

ហើយនៅក្នុងថ្ងៃទី២នេះដែរ ក្រុមកីឡាករទូកកម្ពុជារកមេដាយបានចំនួន២គ្រឿង (មាស១និងសំរិទ្ធ១)បន្ថែមទៀតធ្វើឲ្យក្រុមកីឡាករទូកកម្ពុជាទទួលបានមេដាយសរុបចំនួន៦គ្រឿងមានមេដាយមាស១ និងមេដាយប្រាក់២ និងមេដាយ​សំរិទ្ធ៣គ្រឿង។ ការប្រកួតកីឡាទូក នៅក្នុងព្រឹត្តិការណ៍ស៊ីហ្គេម២០២៣ ដែលរៀបចំធ្វើឡើង នៅកីឡដ្ឋានកីឡាលើទឹកខេត្តកំពត ក្នុងរយៈពេល ២ថ្ងៃនេះ  ក្រុមកីឡាករកម្ពុជាទទួលបានមេដាយចំនួន ៦គ្រឿង ក្នុងនោះមានមាស១ ប្រាក់២ និងសំរិទ្ធ ៣គ្រឿង។

លទ្ធផលនៃការប្រកួតកីឡាទូកលើ ៤វិញ្ញាសារ ចម្ងាយ ៥០០ម៉ែត្រនៅថ្ងៃទី១៤ ខែឧសភា ឆ្នាំ២០២៣នេះ រូមមាន៖  វិញ្ញាសារ ទី១.ទូកបុរស ១២នាក់ អាយុក្រោម ២៤ឆ្នាំ ថៃទទួលបានចំណាត់ថ្នាក់លេខ១ ទទួលមេដាយមាស ឥណ្ឌូនេស៊ីទទួលបានចំណាត់ថ្នាក់លេខ២ ទទួលបានមេដាយប្រាក់ និងមីយ៉ាន់ម៉ា ទទួលបានចំណាត់ថ្នាក់លេខ៣ ទទួលបានមេដាយសំរិទ្ធ។ ទី២. ទូកបុរស ១២នាក់ Open  ក្រុមកីឡករឥណ្ឌូនេស៊ីទទួលបានចំណាត់ថ្នាក់លេខ១ ទទួលបានមេដាយមាស, ថៃទទួលបានចំណាត់ថ្នាក់លេខ២ ទទួលបានមេដាយប្រាក់ និងមីយ៉ាន់ម៉ាទទួលបានចំណាត់ថ្នាក់លេខ៣ ទទួលបានមេដាយសំរិទ្ធ។ វិញ្ញាសាទី៣ ទូកបុរស៥នាក់ អាយុក្រោម២៤ឆ្នាំ ក្រុមកីឡាករកម្ពុជាទទួលបានចំណាត់ថ្នាក់លេខ១ ទទួលបានមេដាយមាស, ថៃទទួលបានចំណាត់ថ្នាក់លេខ២ ទទួលបានមេដាយប្រាក់ និងឥណ្ឌូនេស៊ីទទួលបានចំណាត់ថ្នាក់លេខ៣ ទទួលបានមេដាយសំរិទ្ធ និងវិញ្ញាសាទី៤. ទូកចម្រុះបុរសនារី ១២នាក់ អាយុក្រោម ២៤ឆ្នាំ ក្រុមកីឡាករវៀតណាមទទួលបានចំណាត់ថ្នាក់លេខ១ ទទួលមេដាយមាស ម៉ីយ៉ាន់ម៉ាទទួលបានចំណាត់ថ្នាក់លេខ២ មេដាយប្រាក់ និងកម្ពុជាទទួលបានចំណាត់ថ្នាក់លេខ៣ មេដាយសំរិទ្ធ។

ដោយឡែកសម្រាប់ថ្ងៃស្អែក មិនមានការប្រកួតទេ (ក្រុមកីឡាករសម្រាក)  ខណៈដែល នៅថ្ងៃទី១៦ ខែឧសភា ឆ្នាំ២០២៣  ការប្រកួតទូកនឹងធ្វើឡើងលើ៤វិញ្ញាសារ ក្នុងរយៈចម្ងាយ ៨០០ម៉ែត្រមាន៖ ១.ទូកបុរស ១២នាក់ អាយុក្រោម២៤ឆ្នាំ, ២.ទូកបុរស ១២នាក់ Open , ៣.ទូកបុរស ៥នាក់ អាយុក្រោម ២៤ឆ្នាំ និង ៤.ទូកចម្រុះបុរសនារី ១២នាក់ អាយុក្រោម២៤ឆ្នាំ៕

អត្ថបទ៖ សឹង រ៉ាត់