សម្ដេចតេជោ ហ៊ុន​ សែន នឹងអញ្ជើញទៅចូលរួមកិច្ចប្រជុំលើកទី ៣ ស្ដីពី គំនិតផ្តួចផ្តើមខ្សែក្រវ៉ាត់មួយ ផ្លូវមួយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា សម្ដេច នឹងដឹកនាំគណៈប្រតិភូអញ្ជើញ​ទៅចូលរួមកិច្ចប្រជុំលើកទី ៣ ស្ដីពី គំនិតផ្តួចផ្តើមខ្សែក្រវ៉ាត់មួយ ផ្លូវមួយ នៅប្រទេសចិន នាខែតុលាខាងមុខ។

ការឲ្យដឹងរបស់សម្ដេចតេជោ ហ៊ុន សែន បានធ្វើឡើងក្នុងពិធីសំណេះសំណាលជាមួយកម្មករ-និយោ​ជិត ទស្សនាពិព័រណ៍សមិទ្ធផល និងពិធីសម្ពោធដាក់ឲ្យដំណើរការរោងចក្រផលិតសំបកកង់ ដើម្បីអបអរសាទរខួបលើកទី ១០ នៃគំនិតផ្តួចផ្តើមខ្សែក្រវ៉ាត់មួយ ផ្លូវមួយ នៅតំបន់សេដ្ឋកិច្ចពិសេស ក្រុងព្រះសីហនុ នៅព្រឹកថ្ងៃទី ២២ ខែឧសភា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា សម្ដេច បានឆ្លើយតបជាមួយលោក ស៊ី ជីនពីង ប្រធានាធិបតីចិនរួចហើយ ក្នុងការទៅចូលរួមក្នុងកិច្ចប្រជុំលើកទី ៣ ស្ដីពី គំនិតផ្តួចផ្តើមខ្សែក្រវ៉ាត់មួយ ផ្លូវមួយ នៅប្រទេសចិន នាខែតុលាខាងមុខ។

សម្ដេចតេជោ ហ៊ុន សែន ថ្លែងបែបនេះថា «ហើយបានឆ្លើយតបជាមួយឯកឧត្ដម ស៊ី ជីនពីង ហើយ ខែតុលានឹងមានការប្រជុំលើកទី ៣ អំពីគំនិតផ្តួចផ្តើមខ្សែក្រវ៉ាត់មួយ ផ្លូវមួយ ខ្ញុំនឹងចូលរួមៗ ប៉ុន្តែចូលរួមនៅក្នុងក្របខ័ណ្ឌនៃរដ្ឋាភិបាលថ្មីហើយពេលនោះ»។

សម្ដេចតេជោ ហ៊ុន សែន លើកឡើងដែរថា ប្រទេសកម្ពុជា នឹងរៀបចំការបោះឆ្នោតថ្នាក់ជាតិនៅខែកក្កដា ឆ្នាំ ២០២៣ ខាងមុខ ហើយការបង្កើតរាជរដ្ឋាភិបាលថ្មី អាចនៅចុងខែសីហា ឬដើមខែកញ្ញា ឆ្នាំ ២០២៣។ ដូច្នេះការទៅចូលរួម គឺក្នុងនាមរាជរដ្ឋាភិបាលថ្មី តែនៅតែស្ថិតក្រោមការដឹកនាំរបស់គណបក្សប្រជាជនកម្ពុជា ដដែល៕