កម្ពុជា-ថៃ ដាក់ឱ្យប្រើប្រាស់ឃ្យូអរកូតដំណាក់កាលទី២ សម្រាប់ទូទាត់​ពាណិជ្ជកម្មឆ្លងដែន

កម្ពុជា-ថៃបានប្រកាសដាក់ឱ្យប្រើប្រាស់ការទូទាត់ឆ្លងដែនតាមរយៈឃ្យូអរកូត(QR Code) ដំណាក់​កាលទី២ដែលអនុញ្ញាតឱ្យជនជាតិថៃអាចស្កេនឃ្យូអរកូតនៅកម្ពុជាបានខណៈដំណាក់កាលទី១ ពលរដ្ឋកម្ពុជាអាចស្កេនឃ្យូអរកូតនៅប្រទេសថៃបាន ដែលដាក់ឱ្យដំណើរការកាលពីថ្ងៃទី១៨ ខែកុម្ភៈ ឆ្នាំ២០២០កន្លងទៅនៅប្រទេសថៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសដាក់ឱ្យប្រើប្រាស់ការទូទាត់ឆ្លងដែនតាមរយៈឃ្យូអរកូតនេះ ធ្វើឡើងនៅព្រឹកថ្ងៃទី០៦ខែមិថុនាឆ្នាំ២០២៣ ក្រោមអធិបតីភាពលោក បណ្ឌិត ជា ចាន់តូ ទេសាភិបាលធនាគារជាតិនៃកម្ពុជា និងលោក បណ្ឌិត Sethaput Suthiwart-Narueput ទេសាភិបាលធនាគារកណ្តាលថៃនៅរាជធានីភ្នំពេញប្រទេសកម្ពុជា ។

លោក ជា ចាន់តូ បានមានប្រសសន៍ថា ការដាក់ឱ្យដំណើរទូទាត់ឆ្លងដែនតាមរយៈឃ្យូអរកូត(QR Code)នេះ មានអត្ថប្រយោជន៍ណាស់សម្រាប់លើកកម្ពស់ការទូទាត់រូបិយវត្ថុជាតិ ហើយ បានរួមចំណែកយ៉ាងសំខាន់​ក្នុងការជំរុញបរិយាបន្នហិរញ្ញវត្ថុ សម្រួលការធ្វើពាណិជ្ជកម្មឆ្លងដែន និងកំណើនភ្ញៀវទេសចរទៀតផង។

លោកបានបន្តថា គម្រោងនេះ មានជាពីរដំណាក់កាល ដែលដំណាក់កាលទី១ ប្រជាជន កម្ពុជា អាចស្កេនឃ្យូអរកូត​នៅប្រទេសថៃ និងដំណាក់កាលទី២ ប្រជាជន ថៃស្កេនឃ្យូអរកូតបាននៅប្រទេសព្រះរាជាណាចក្រកម្ពុជា ដែលគម្រោងនេះ នឹងចាប់ដាក់ឱ្យប្រើប្រាស់ចាប់ពីទី៦ ខែមិថុនា ឆ្នាំ២០២៣នេះតទៅ ដោយប្រជាពលរដ្ឋថៃ​នឹងអាចប្រើប្រាស់កម្មវិធីធនាគារចល័តរបស់ប្រទេសថៃ ដើម្បីស្កេនឃ្យូអរកូតទៅកាន់ពាណិជ្ជករប្រមាណ ១.៥ លានពាណិជ្ជករ ក្នុងព្រះរាជាណាចក្រកម្ពុជា។

គួរបញ្ជាក់ថា នៅក្នុងឱកាសនោះដែរ ធនាគារជាតិនៃកម្ពុជា បានរៀបចំកិច្ចប្រជុំទ្វេភាគីរវាងធនាគារជាតិនៃកម្ពុជា និងធនាគារកណ្តាលថៃ ក្នុងគោលបំណង ពង្រឹងសាមគ្គីភាព មិត្តភាព ពង្រឹងទំនាក់ទំនងសេដ្ឋកិច្ច និងជំរុញការរីក​ចម្រើននៃម៉ាក្រូសេដ្ឋកិច្ចវិស័យធនាគារ និងបច្ចេកវិទ្យាហិរញ្ញវត្ថុ (FinTech) ក្នុងប្រទេសទាំងពីរ ឱ្យកាន់តែប្រ​សើរថែមទៀត៕

អត្ថបទ ៖ សំអឿន