ខេត្តតាកែវ មានរោងចក្រ សហគ្រាសជិត​២៥០​មានកម្មករ និយោជិតប្រមាណ៧ម៉ឺននាក់

លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា នៅឆ្នាំ២០២៣នេះ ខេត្តតាកែវ មានរោងចក្រ សហគ្រាសចំនួន២៤៨ មានកម្មករនិយោជិតប្រមាណ៧ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីបានបន្តថា ក្នុងនោះរោងចក្រ សហគ្រាសក្នុងវិស័យកាត់ដេរចំនួន៦៦ មានកម្មករនិយោជិតសរុបជាង៥ម៉ឺន ៨ពាន់នាក់ ហើយខេត្តតាកែវ ជាខេត្តទី៤ដែលមានការអភិវឌ្ឍរោងចក្រ សហគ្រាសច្រើន។ លោករដ្ឋមន្ត្រីបានបន្តទៀត​ថា សម្រាប់រងចក្រដែល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី​ នៃព្រះរាជាណាចក្រកម្ពុជា
បាន​អញ្ជើញចុះជួបសំណេះសំណាលជាមួយបងប្អូនកម្មករ កម្មការិនីនៅព្រឹកថ្ងៃទី១១ ខែមិថុនា ឆ្នាំ២០២៣សរុបជិត​២ម៉ឺននាក់ មកពីរោងចក្រ សហគ្រាសចំនួន១២។

លោករដ្ឋមន្ត្រីបានឱ្យ​ដឹងថា សម្តេចតេជោនាយករដ្ឋមន្ត្រីធ្លាប់អញ្ជើញជួបសំណេះសំណាលជាមួយបងប្អូនកម្មករ
កម្មការិនី​នៅទីតាំងខាងលើរួចម្តងមកហើយ កាលពីឆ្នាំ២០១៩ ដោយមានកម្មករកម្មការិនីចូលរួមជិត២ម៉ឺននាក់ផងដែរ។​ រោងចក្រ សហគ្រាសទាំង១២ ដែលអនុញ្ញាត​ឱ្យ​កម្មករ កម្មការិនីជួបសំណេះ សំណាលនឹងសម្តេចតេជោនេះ
កំពុងដំណើរការអាជីវកម្ម​នៅក្នុង​ស្រុកត្រាំកក់ និងស្រុក​សំរោង ខេត្តតាកែវ។

លោករដ្ឋមន្ត្រីបានឱ្យដឹងទៀតថា រោងចក្រ សហគ្រាសទាំង១២នេះ ជាប្រភេទរោង​ចក្រផលិតគ្រឿងអេឡិចត្រូនិកចំនួន៦,កាត់ដេរសម្លៀកបំពាក់ចំនួន៣, ផលិតស្បែកជើងចំនួន២ និងផលិតផលិតផលធ្វើដំណើរ និងកាបូបចំនួន១។ផលិត​ផលរបស់​រោងចក្រ​ទាំង​នេះ គឺនាំចេញទៅទីផ្សារអន្តរជាតិជាពិសេសសហគមន៍​អឺរ៉ុប និងសហរដ្ឋអាមេរិក៕

អត្ថបទ៖ សំអឿន